Nýir garðar og endurbætur á eldri görðum eru meðal þeirra verkefna sem íbúar í Háaleitis og Bústaðahverfi völdu og komust til framkvæmda í tengslum við verkefnaval „Betri hverfa“ í fyrra. Íbúar sendu fyrst inn hugmyndir sem síðan var kosið um í opinni rafrænni kosningu.
Óskir íbúa í Háaleiti og Bústöðum beindust einkum að útivist og bættu umhverfi, en einnig var leiksvæði fyrir börn og fullorðna á óskalistanum.
-
Göngustígur og leiksvæði fyrir ofan Kvistaborg var lagfært.
-
Sett upp timburgirðing meðfram leiksvæði við Austurborg.
-
Gangstétt við vestanverða Háaleitisbraut milli Austurvers og Listabrautar var lagfærð.
-
Útivistarsvæði í austanverðum Fossvogsdal var lagfært og fegrað m.a. með gróðursetningu.
-
Í Grundargerðisgarði voru settur bekkur og bætt við gróður.
-
Göngustígur frá Háagerði að þjónustuíbúðum við púttvöll var malbikaður.
-
Áningarstaðir með bekkjum voru settir upp við hituveitustokkinn.
-
Hverfisgarður var útbúinn vestan Grensáskirkju.
-
Leiksvæði í Ásgarði var snyrt og leiktæki lagfærð.
-
Endurnýjuð leiktæki og körfuboltavöllur við Háaleitisskóla.
-
Útivistaraðstaða var bætt í garði milli Hæðargarðs og Hólmgarðs.
-
Umhverfi leikskólans Garðaborgar var snyrt.
-
Endurnýjaðar voru merkingar við Hákonarlund.
Framkvæmdafé vegna verkefna Betri hverfa í Háaleitis- og Bústaðhverfi var í fyrra um 34 milljónir króna og verður það óbreytt í ár. Vefurinn Betri Reykjavík – Betri hverfi er nú opinn fyrir móttöku hugmynda og rökræðum íbúa vegna smærri hverfaverkefna. Í mars verður kosið um verkefni til framkvæmda.
Borgarstjóri stendur fyrir íbúafundum í öllum hverfum nú í janúar. Fundur með íbúum í Háaleitis og Bústaðahverfi verður mánudaginn 21. janúar kl. 17 í Réttarholtsskóla.