Vesturbæjarlestur

Dagana 15. - 19. október efna skólarnir í Vesturbænum til lestrarhátíðar.  Hátíðin er skipulögð í tengslum við Reykjavík bókmenntaborg UNESCO.  Þessa daga verður fjölbreytt dagskrá í gangi en alla dagana verður sameiginleg lestrarstund frá kl. 9.00 til 9.30 þar sem allir eru hvattir til að taka sér bók í hönd og lesa. 

Borgarbókasafnið kemur að þessari hátíð með ýmsum hætti og lánar meðal annars grænar bækur í fyrirtæki og verslanir fyrir starfsmenn og viðskiptavini til að glugga í. Einnig mun María Þórðardóttir leikkona og starfsmaður safnsins lesa upp í Pétursbúð og Kjötborg.  Nemendur verða á faraldsfæti um hverfið og lesa ljóð og texta í skólum, fyrirtækjum og stofnunum.  Allir eru hvattir til að taka þátt í hátíðinni og að taka vel á móti nemendum.