David Leitch og Kelly McCormick hljóta heiðursverðlaun RIFF

Ritstjórn
Leikstjórinn David Leitch og framleiðandinn Kelly McCormick hlutu heiðursverðlaun Alþjóðlegrar kvikmyndahátíðar í Reykjavík fyrir framúrskarandi listfengi.
Leikstjórinn David Leitch og framleiðandinn Kelly McCormick hljóta heiðursverðlaun Alþjóðlegrar kvikmyndahátíðar í Reykjavík.

Leikstjórinn David Leitch og framleiðandinn Kelly McCormick hlutu í gær, laugardaginn 26. september, heiðursverðlaun Alþjóðlegrar kvikmyndahátíðar í Reykjavík fyrir framúrskarandi listfengi.

Kraftmikil sjónræn frásögn, húmor og úthugsuð áhættuatriði

Verðlaunin voru afhent við móttöku og Reykjavíkurborgar og RIFF í Listasafni Reykjavíkur – Hafnarhúsi. Rúnar Freyr Gíslason, formaður menningarráðs Reykjavíkur, afhenti verðlaunin. 

Leitch og McCormick eru meðal heiðursgesta RIFF í ár og hafa sett sterkan svip á hasarkvikmyndir samtímans, þar sem kraftmikil sjónræn frásögn, húmor og úthugsuð áhættuatriði fara saman.

Leitch á að baki langan feril sem áhættuleikari og stjórnandi áhættuatriða áður en hann sneri sér að leikstjórn. Meðal þekktustu mynda hans eru Atomic Blonde, Deadpool 2, Bullet Train og The Fall Guy. Í verkum hans nýtur nákvæm þekking á hreyfingu, hrynjandi og líkamlegri frammistöðu sín í hasaratriðum sem þjóna jafnt persónusköpun og framvindu sögunnar.

Rúnar Freyr Gíslason, formaður menningarráðs, afhendir David Leitch og Kelly McCormick heiðursverðlaun RIFF
Rúnar Freyr Gíslason, formaður menningarráðs, afhendir David Leitch og Kelly McCormick heiðursverðlaun RIFF.

McCormick hefur sem framleiðandi staðið að baki myndum á borð við Nobody, Violent Night, Bullet Train og The Fall Guy. Þau hjónin hafa með samstarfi sínu skapað vettvang fyrir hasarmyndir þar sem frumlegar hugmyndir og metnaðarfull útfærsla haldast í hendur.

Hjartað í hasarnum - meistaraspjall

Í tengslum við heimsókn þeirra Leitch og McCormick eru kvikmyndirnar Atomic Blonde og Bullet Train á dagskrá RIFF. Í Meistaraspjalli sem fram fór síðastliðinn laugardag ræddu þau David Leitch, Kelly McCormick og Elísabet Ronaldsdóttir um hvernig hasaratriði í samtímakvikmynd væri í raun byggt upp? Í meistaraspjallinu mættust sjónarhorn leikstjórans, framleiðandans og klipparans og var ferlið krufið frá fyrstu hugmynd að endanlegri útgáfu. Með sýningu valinna brota – þar á meðal, með fyrirvara, atriði úr nýjustu mynd þeirra – How to Rob a Bank 

Gestir RIFF fengu þannig einstakt tækifæri til að kynnast fólkinu á bak við nokkrar af þekktustu hasarmyndum síðari ára og fá innsýn í þá fjölþættu sköpun sem liggur að baki.

Alþjóðleg kvikmyndahátíð í Reykjavík stendur til 4. október. Dagskrá og miðasala eru á riff.is.