Borgarráð
Ár 2026, þriðjudaginn 25. ágúst, var haldinn aukafundur borgarráðs nr. 5833. Fundurinn var haldinn í Ráðhúsi Reykjavíkur og hófst kl. 08:04. Viðstödd voru, auk borgarstjóra, Einar Þorsteinsson, Ari Edwald, Bjarni Guðjónsson, Björg Magnúsdóttir, Heiða Björg Hilmisdóttir, Pétur Hafliði Marteinsson og Ragnhildur Alda María Vilhjálmsdóttir. Einnig sátu fundinn áheyrnarfulltrúarnir Sanna Magdalena Mörtudóttir og Silja Sóley Birgisdóttir. Eftirtaldir embættismenn og aðrir starfsmenn sátu fundinn: Heimir Snær Guðmundsson og Þorsteinn Gunnarsson.
Fundarritari var Helga Björk Laxdal.
Þetta gerðist:
-
Lögð fram trúnaðarmerkt tillaga borgarstjóra, dags. 25. ágúst 2026, um breytt stjórnskipulag velferðarsviðs og skóla- og frístundasviðs. Greinargerð fylgir tillögunni.
Samþykkt með fimm atkvæðum borgarráðsfulltrúa Sjálfstæðisflokksins, Miðflokksins, Viðreisnar og Framsóknarflokksins gegn tveimur atkvæðum borgarráðsfulltrúa Samfylkingarinnar.Málið er fullnaðarafgreitt á vettvangi borgarráðs með vísan til ákvæða 3. mgr. 48 gr. samþykktar um stjórn Reykjavíkurborgar og fundarsköp borgarstjórnar.
Arnar Haraldsson, Lóa Birna Birgisdóttir, Rannveig Einarsdóttir, Ragnheiður Agnarsdóttir Steinn Jóhannsson taka sæti á fundinum undir þessum lið.
Borgarráðsfulltrúar Sjálfstæðisflokksins, Viðreisnar og Framsóknarflokksins leggja fram svohljóðandi bókun:
Stigið er stórt skref í að tryggja börnum og fjölskyldum í Reykjavík öflugri, samræmdari og áreiðanlegri þjónustu. Heimilisföng og stjórnkerfi borgarinnar ráða ekki lengur skipulagi þjónustunnar heldur þarfir barna og fjölskyldna. Í núverandi kerfi dreifist fagþekking á margar einingar og smærri teymi eru viðkvæm fyrir álagi, fjarvistum og manneklu. Stærri og öflugri fagteymi skapa betri möguleika á sérhæfingu sem nýtist þvert á borgina, eru álagsþolnari og veita starfsfólki öflugri faglegan stuðning. Þjónusta, verklag og viðmið verða samræmd svo fjölskyldur geti treyst á sambærilega þjónustu óháð búsetu. Jafnframt fæst betri yfirsýn yfir þjónustuþörf, biðtíma, álag og árangur þjónustunnar. Verkaskipting velferðarsviðs og skóla- og frístundasviðs skýrist og einstaklingsmiðuð þjónusta við börn og fjölskyldur verður betur samþætt. Talmeinafræðingar, þroskaþjálfar, hegðunarráðgjafar og farteymi færast undir barna- og fjölskylduþjónustu velferðarsviðs. Þannig styttast boðleiðir, samfella í eftirfylgni styrkist og betri forsendur skapast til snemmtæks stuðnings. Á sama tíma verður faglegur stuðningur við skóla- og frístundastarf sameinaður í öflugri skóla- og frístundaþjónustu. Breytingarnar taka mið af þróun rafrænna lausna en nærþjónusta í hverfum, skólum og frístundastarfi verður áfram tryggð og styrkt. Þeim fylgir ekki þjónusturof og útfærslu þeirra verður haldið áfram næstu mánuði. Minni yfirbygging og fækkun stjórnendastöðugilda skila um 900 milljóna króna hagræðingu á ársgrundvelli samhliða styrkingu framlínuþjónustu. Leiðin inn í velferðarþjónustuna verður jafnframt einfaldari með sameiginlegri móttöku sem beinir erindum í réttan farveg eftir þjónustuþörf. Kjarninn er öflugri fagleg umgjörð, skýrari þjónustuleiðir og rétt þjónusta á réttum tíma. Málið verður tekið til formlegrar umræðu á fyrsta fundi borgarstjórnar 8. september.
Borgarráðsfulltrúar Samfylkingarinnar leggja fram svohljóðandi bókun:
Reykjavíkurborg á að sjálfsögðu ávallt að sýna ábyrgð í rekstri og nýta fjármuni og mannauð vel. Við styðjum skynsamlega samþættingu stoðþjónustu og skýrari stjórnunarspönn, og teljum mikilvægt að ljúka yfirferð á hlutverki stjórnenda sem hófst í janúar sl. Af því leiðir samt ekki að nauðsynlegt sé að fórna hverfamiðaðri nærþjónustu fyrir miðlægt skipulag. Miðlæg stjórnun getur verið skynsamleg. Miðlæg þjónusta sem fjarlægist fólk er það ekki. Það eru varhugaverð vinnubrögð að samþykkja meiriháttar stefnubreytingu án þess að rekstrarleg útfærsla, þjónustumælikvarðar eða mat á afleiðingum liggi fyrir. Tillagan skapar óþarfa óvissu um störf 400 starfsmanna og mikilvæga þjónustu við tugþúsundir borgarbúa. Eftir lokun mannréttindaskrifstofu og nú niðurlagningu alþjóðateymisins er ómögulegt að sjá hver stefna borgarinnar á að vera í málefnum innflytjenda, sem eru þó fimmtungur íbúa Reykjavíkur. Jafnréttisskimanir hafa ekki verið gerðar við þessar breytingar og það er ekki nóg að lýsa yfir að nærþjónusta eigi að halda áfram þegar útfærslu vantar. Breytingar af þessari stærðargráðu á ekki að keyra í gegnum aukafund borgarráðs á harðahlaupum til þess eins að komast hjá opinni umræðu. Ákvörðunartaka án samráðs við starfsfólk, notendur, fagráð og borgarstjórn sýnir lýðræðislegu ferli og hagsmunum borgarbúa litla virðingu. Miklu betri bragur hefði verið á því að undirbúa málið af yfirvegun og leyfa því að fá eðlilega umræðu í borgarstjórn enda um pólitíska stefnumótun að ræða.
Borgarráðsfulltrúi Miðflokksins leggur fram svohljóðandi bókun:
Miðflokkurinn telur málið mjög jákvætt og mikilvægt að nýsamþykktar breytingar séu líklegar til að bæta þjónustu við borgarbúa. Ennfremur er mikilvægt að fjárhagslegt hagræði af fyrirhuguðum skipulagsbreytingum er áætlað um 900 m.kr. sem er um 15% af áætluðu gati milli tekna og rekstrarútgjalda borgarinnar og enn frekari áskoranir framundan á næsta ári. Það væri algerlega óábyrgt af borgaryfirvöldum að bregðast ekki við þessari grafalvarlegu stöðu, sem er ógn við alla þjónustu sem borgin veitir. Jafnframt er ljóst að frekari umbóta er þörf í rekstri borgarinnar svo hann verði sjálfbær.
Áheyrnarfulltrúi Vinstrisins leggur fram svohljóðandi bókun:
Með þessum illa ígrunduðu tillögum og hroðvirknislegu skipulagsbreytingum er meirihlutinn að valda miklum skaða sem bitnar á íbúum og þjónustu við viðkvæma hópa. Þrátt fyrir yfirlýsingar um að vernda grunnþjónustuna munu þessar breytingar gera hið gagnstæða. Hægri meirihlutinn ætlar að breyta þjónustu við viðkvæma hópa, auka miðstýringu sem færir þjónustuna fjær borgurunum með tilheyrandi flækjustigi og segja upp reynslumiklu fólki sem þekkir verkefni Reykjavíkurborgar vel. Skortur er á pólitískri sýn með þessum aðgerðum, líkt og þegar öllum upplýsingafulltrúum borgarinnar og verkefnastjórum á skrifstofu borgarstjóra var sagt upp. Þá liggur engin sjálfstæð rýni þessa meirihluta fyrir á verkefnum og störfum fólks eða yfirlega um hverjar afleiðingarnar verða og ekkert jafnréttismat. Allar umfangsmiklar skipulagsbreytingar krefjast pólitískrar rýni og innleiðing þeirra krefst alúðar og tíma. Það er ekki að finna hér heldur er vaðið áfram af mikilli vanvirðingu með excel-skjalið að leiðarljósi og af algerri vanþekkingu á þeirri mikilvægu þjónustu sem borgin veitir til íbúanna. Með þessum aðgerðum er verið að fletja út kerfið þannig að það taki ekki tillit til ólíkra þarfa fólks í mismunandi hverfum borgarinnar. Með þessum niðurskurðaraðgerðum er meirihlutinn að boða minna frelsi, lakari þjónustu og líklega aukin fjárútlát þegar fram í sækir – þvert á það sem hann hefur sagt í opinberri umræðu. Hér er ekki verið fara vel með fé skattgreiðenda heldur er verið að „spara“ sér til tjóns. Eins er eftirtektarvert að meirihlutinn hefur ekki hugmynd um hvernig eigi að útfæra þessi niðurskurðaráform og lætur það í hendurnar á embættismönnum.
Áheyrnarfulltrúi Sósíalistaflokks Íslands leggur fram svohljóðandi bókun:
Fulltrúi Sósíalistaflokks Íslands gagnrýnir tímasetningu stjórnskipulagsbreytinganna en málið var afgreitt á síðasta mögulega tímapunkti sem borgarráð hefur fullnaðarafgreiðsluheimildir. Tillagan ratar því ekki inn á vettvang borgarstjórnar og fær ekki þá lýðræðislegu umræðu sem stjórnskipulagsbreytingar af þessari stærðargráðu krefjast. Tillögurnar eru ekki nægilega ígrundaðar. Ekki liggur fyrir hvernig verður brugðist við þjónusturofi sem getur myndast þegar u.þ.b. 350 starfsmenn þurfa að aðlagast nýju fyrirkomulagi, heyra undir nýja yfirmenn, endurskipuleggja teymi og flytja á nýjan starfsstað. Ekki hefur verið stigið varlega til jarðar í uppsögnum miðað við viðkvæmt efnahagsástand sem getur verið innspýting til kreppuástands. Miklar áhyggjur vakna yfir stöðu málaflokks fólks af erlendum uppruna eftir niðurlagningu mannréttindaskrifstofu og nú alþjóðateymis. Engin skýr ábyrgð stendur eftir í kringum málaflokkinn. Að lokum er endurskipulagning á þjónustu við börn gagnrýnd þar sem skólaþjónustunni er skipt milli tveggja sviða. Ekki sést hvernig sú breyting á eftir að auka skilvirkni og samþættingu þjónustu ef kennsluráðgjafar, sérkennsluráðgjafar o.fl. heyra undir skóla- og frístundasvið en talmeinafræðingar, sálfræðingar o.fl. heyra undir velferðarsvið. Slík skipting getur leitt til skorts á heildarsýn þar sem virkt samstarf milli allra þeirra sem koma að málum barna er nauðsynlegt til að tryggja skilvirkan og öflugan stuðning við börn og skólastarfsemi.
Fylgigögn
-
Lögð fram fyrirspurn borgarráðsfulltrúa Samfylkingarinnar í 48. tölusettum liðum um breytingar á stjórnskipulagi velferðarsviðs og skóla- og frístundasviðs. MSS26080094
Fylgigögn
Fundi slitið kl. 09:09
Einar Þorsteinsson Ari Edwald
Bjarni Guðjónsson Björg Magnúsdóttir
Heiða Björg Hilmisdóttir Pétur Hafliði Marteinsson
Ragnhildur Alda María Vilhjálmsdóttir
PDF útgáfa fundargerðar
Borgarráð 25.8.26 prentvæn útgáfa