Hátíðardagskráin á 17. júní
Á þjóðhátíðardaginn 17. júní verður boðið upp á fjölbreytta og veglega dagskrá. Skrúðganga verður frá Hallgrímskirkju, skátarnir verða með leiktæki, VÆB og Páll Óskar taka lagið.
Skemmtidagskrá verður í Hljómskálagarði og á Klambratúni þar sem boðið verður upp á dansveislu, sirkus, matarvagna, fornbílasýningu og tónlist.
Morgundagskrá á Austurvelli
Hátíðarathöfn á vegum Alþingis og forsætisráðuneytisins hefst á Austurvelli kl. 11:00 en henni verður sjónvarpað og útvarpað á RÚV. Forsætisráðherra Íslands, Kristrún Frostadóttir, leggur blómsveig frá íslensku þjóðinni að minnisvarða Jóns Sigurðssonar og forseti Íslands, frú Halla Tómasdóttir, flytur hátíðarræðu.
Fjallkonan flytur ávarp en ávallt hvílir leynd yfir því hver hún er þar til á hátíðarathöfninni. Að lokinni athöfn fer skrúðganga frá Austurvelli í kirkjugarðinn við Suðurgötu þar sem Björg Magnúsdóttir, forseti borgarstjórnar, leggur blómsveig frá Reykvíkingum á leiði Jóns Sigurðssonar forseta og Ingibjargar Einarsdóttur konu hans. Lúðrasveit verkalýðsins leikur við athöfnina.
Skrúðganga
Klukkan 13:00 leiða skátar glæsilega skrúðgöngu frá Hallgrímskirkju að hátíðarsvæðinu í Hljómskálagarði. Í skrúðgöngunni kennir ýmissa grasa og má búast við að furðuverur muni láta sjá sig í göngunni, sirkuslistafólk leikur listir sínar og Lúðrasveit Reykjavíkur leikur undir.
Hljómskálagarður
Um leið og skrúðgangan kemur á hátíðarsvæðið um klukkan 13:45 hefst skemmtidagskráin í Hljómskálagarðinum. Hátíðarsvæðið verður stútfullt af fjölbreyttri skemmtun fyrir alla fjölskylduna.
Skátarnir bjóða upp á hoppukastala, leiktæki og skátaþrautabraut víðs vegar um garðinn. Krúseraklúbburinn, Húlladúllan, Dans Afrika, skylmingar og matarvagnar verða á sínum stað. Hringleikur verður með sirkusatriði og Listhópar Hins Hússins leika listir sínar. Á stóra sviðinu verður Leikhópurinn Lotta, Dansskóli Birnu Björns, Dansstúdío World Class, Danslistaskóli JSB og Dans Brynju Péturs verða með danssýningar. Páll Óskar kemur og syngur af sinni alkunnu snilld, Amabadama og Tónhylur stíga á svið og VÆB sjá svo um að ljúka dagskránni með dúndrandi tónlist.
Það er ókeypis aðgangur á alla dagskrárliði og í tæki og engum ætti að leiðast.
Klambratún
Skemmtidagskrá verður einnig á Klambratúni. Dans Brynju Péturs stígur dans, Besti vinur minn Súpermann kemur á svæðið, plötusnúðar sjá um tónlistina, matarvagnar verða á staðnum fyrir svanga þjóðhátíðargesti.
Í Ráðhúsi Reykjavíkur verður Harmonikufélag Reykjavíkur með alvöru harmonikuball og þar verður dansað frá klukkan 15:00 til klukkan 16:30.
Aðgengi og lokanir
Á þjóðhátíðardaginn verður götum lokað í miðborginni vegna hátíðahaldanna. Upplýsingar um aðgengi og kort yfir lokanir.
Þjóðbúningar, þjóðdansar og fornbílar á Árbæjarsafni
Á Árbæjarsafni verður boðið upp á fjölbreytta og skemmtilega dagskrá þar sem þjóðbúningar, þjóðdansar, fjallkonan, fornbílar og harmonikuleikur. Veitingasala verður í Dillonshúsi og gömlu góðu sleikjóarnir verð á sínum stað í Krambúðinni.
Gestir eru hvattir til að fjölmenna og taka þátt í hátíðahöldunum.
Öll velkomin!
Gleðilega hátíð!