Velkomin á nýja heimasíðu Borgarbókasafnsins
Nýr vefur Borgarbókasafnsins hefur verið opnaður. Vefurinn þjónar áfram því hlutverki að auðvelda notendum eftir fremsta megni að nýta sér þjónustu safnsins en lögð var áhersla á að gera hann nútímalegan, skýran og einfaldan auk þess að stytta leiðir inni á vefnum.
Á nýjum vef Borgarbókasafnsins má sjá ýmsar breytingar í útliti og framsetningu efnis en tilgangurinn er óbreyttur, það er að gefa rétta og skýra mynd af öllu því sem finna má á Borgarbókasafninu, sem rekur átta útibú í Reykjavík.
Umfang síðunnar hefur minnkað nokkuð og ný síða beinir notendum á vefinn borgarbokasafn.leitir.is þar sem hægt er að skrá sig inn á „mínar síður“. Þar er til dæmis hægt að:
- skrá sig inn með kennitölu og lykilorði eða rafrænum skilríkjum
- panta frátektir
- framlengja útlán
- skoða útlánasögu
Þá fer leit í bókasafnskerfinu nú fram á borgarbokasafn.leitir.is. Ekki er lengur boðið upp á skráningu eða endurnýjun bókasafnskorta, eða greiðslu sekta, á netinu en unnið er að lausn á því. Þessari þjónustu sinnir starfsfólk bókasafnanna fljótt og vel eftir sem áður, þegar komið er á bókasafnið.
Í undirbúningi opnunar á nýjum vef var unnin þarfagreining og fór þróunarvinna fram í vetur. Vinnustofa var haldin og lágu niðurstöður hennar til grundvallar, þar sem lögð var áhersla á meðal annars aðgengileika, birtu og andrými. Verkefnastjóri vefdeildar hafði umsjón með verkefninu og fékk til liðs við sig sérfræðinga á vegum borgarinnar eftir þörfum. Forritun var í höndum Reload sem sá einnig um hönnun, í samráði við hönnuði Borgarbókasafnsins og stafrænnar vöruhönnunar hjá Reykjavíkurborg. Þá kom starfsfólk deildar miðlunar og nýsköpunar á Borgarbókasafninu að gerð og undirbúningi vefsins.
Enn er unnið að minniháttar lagfæringum og viðbótum á vefnum og er til að mynda stefnt að því að bjóða upp á leit og síun á viðburðayfirliti. Við hvetjum öll til að kynna sér nýjan og bættan vef og nýta sér fjölbreytta þjónustu Borgarbókasafnsins.
