Bókmenntamerking til heiðurs Sigrúnu Eldjárn barnabókahöfundi

Ritstjórn
Bókmenntamerking til heiðurs Sigrúnu Eldjárn barnabókahöfundi
Bókmenntamerking til heiðurs Sigrúnu Eldjárn

Sérstök bókmenntamerking til heiðurs barnabókahöfundinum Sigrúnu Eldjárn var afhjúpuð með viðhöfn við Lækjargötu 14 í dag.

Merkingin er í formi sérhannaðs brunnloks í gangstétt sem vísar til verka Sigrúnar og þeirra sterku tengsla sem þau hafa við borgarrýmið og ímyndunarafl barna. Með þessari viðurkenningu er sjónum beint að mikilvægu framlagi hennar til íslenskra barnabókmennta, en verk Sigrúnar hafa um áratugaskeið skipað veigamikinn sess í menningarlífi þjóðarinnar.

Teikning á bókarkápunni Allt í plati eftir Sigrúnu Eldjárn
Bókin Allt í plati! eftir Sigrúnu Eldjárn

Fjöldi fólks var viðstatt afhjúpun bókmenntamerkingarinnar við Lækjargötu 14 og sá Líf Magneudóttir borgarfulltrúi um að afhjúpa brunnlokið. Á því er afsteypa af teikningu sem prýðir einmitt bókarkápu bókarinnar Allt í plati! eftir Sigrúnu. Allt í plati! er fyrsta barnabók Sigrúnar, sem hún samdi og myndskreytti, en bókin kom út árið 1980. 

Sigrún Eldjárn hélt tölu og var með Krókófíl með sér.
Sigrún Eldjárn flutti ræðu og sagði sér mikill heiður sýndur með bókmenntamerkingunni. Hún var með Krókófílinn með í för, enn hann er meðal sögupersóna í bókinni Allt í plati!

Sagan segir frá ævintýrum þeirra Höllu og Eyvindar sem leggja upp í könnunarleiðangur um Reykjavík ofan- og neðanjarðar. Þar koma við sögu hinir dularfullu krókófílar, torfbæir í Breiðholti og Loftur lyftuvörður í Hallgrímskirkju.

Sigrún Eldjárn hefur skapað sér einstaka stöðu sem rithöfundur og myndhöfundur, og verk hennar hafa haft djúpstæð áhrif á kynslóðir lesenda. Í bókum hennar mætast frásögn, myndlist og leikgleði á þann hátt sem eflt hefur lestraráhuga barna og leitt þau inn í heim bókmenntanna.

Fjöldi fólks var viðstatt viðburðinn við Tjarnarbakkann.
Fjöldi fólks var viðstatt viðburðinn við Tjarnarbakkann.

Með verkefninu er leitast við að draga fram bókmenntaarf Reykjavíkur í borgarlandslaginu og skapa nýjan áningarstað sem hvetur til uppgötvunar og samtals um bókmenntir.