English translation
Hi! The English site is only a beta for now and still has many errors (especially in names and locations).
We are working hard to fix them and making more content available than ever before so expect constant updates.
Framkvæmdir við verkefni sem íbúar völdu í hverfakosningum í mars undir merkjum „Betri hverfa“ ganga vel. Dagur B. Eggertsson borgarstjóri leit við á verkstað í morgun í Árbæ, en þar var verið að ljúka frágangi við hringtorg á gatnamótum Bæjarbrautar og Hraunbæjar. Aðgengi gangandi hefur verið bætt þar til mikilla muna og í morgun viðraði loksins vel til steypuvinnu. Að sögn Þorkels Heiðarssonar formanns hverfisráðs Árbæjar er mikil ánægja í hverfinu með framkvæmdirnar en kostnaður við þær var áætlaður 15 milljónir.
Fjölbreytni í hugmyndum íbúa var mikil en þær miða þó allar að því að bæta umhverfi og auka lífsgæði í hverfunum. Leikvellir, sleðabrekkur, frisbígolfvellir, upplýsingaskilti, gróðursetning, áningastaðir og gönguleiðir eru meðal þeirra verkefna sem íbúar kusu til framkvæmdar í íbúakosningum í mars.
Í dag var opnað fyrir innsetningu á nýjum hugmyndum fyrir verkefni Betri hverfa 2015 og er hægt að skila inn hugmyndum í einn mánuð eða til 7. nóvember. Slóðin er einfaldlega www.betrireykjavik.is.
Betri hverfi 2015 er samráðsverkefni íbúa og stjórnsýslu um forgangsröðun og úthlutun fjármagns til smærri nýframkvæmda- og viðhaldsverkefna í hverfum Reykjavíkurborgar.
Alls voru 78 verkefni kosin til framkvæmda í hverfakosningum. Íbúar sendu hins vegar inn 400 hugmyndir á vefinn Betri Reykjavík. Framkvæmdum við flest þessara verkefna er lokið eða þau eru á lokasprettinum. Nokkur stærri verkefni eru enn á undirbúningsstigi, þ.á.m. er leikvöllur á Klambratúni, stígur á milli Laugardalslaugar og tjaldsvæðisins í Laugardal og ævintýragarður í Gufunesi.