English translation
Hi! The English site is only a beta for now and still has many errors (especially in names and locations).
We are working hard to fix them and making more content available than ever before so expect constant updates.
Reykjavík – iðandi af lífi kynnir til sögunnar nýjan fræðsluviðburð, Hádegisfuglinn, sem verður á dagskrá mánaðarlega í hádeginu fram að jólum. Um er að ræða fuglaskoðun á léttu nótunum í Miðborg Reykjavíkur.
Fyrsti Hádegisfuglinn mun fara fram núna á fimmtudaginn, 17. október, kl 12:00 á hádegi, fyrir framan Iðnó við Tjörnina. Haustið er frábær tími til að fylgjast með fuglunum á Tjörninni. Þá eru flestir veturgestirnir mættir t.d. álftir og grágæsir.
Skemmtilegast er þó að fylgja með öndunum á þessum árstíma, einkum stokköndinni því þá er tilhugalífið í hámæli. Stokkandasteggirnir skarta sínu fegursta og leika ýmsar kúnstir til að draga kollurnar á tálar en þar sem kynjahlutföllin eru ekki steggjunum í hag getur örvæntingin skapað hádramatískar aðstæður. Allt gerist þetta fyrir augunum á oftar en ekki grunlausum vegfarendum í Miðborginni.
Snorri Sigurðsson fuglafræðingur stillir upp sjónauka og verður með létta fræðslu fyrir áhugasama. Gestir eru hvattir til að taka með sér kíkinn. Sjá nánar á Facebook síðu Reykjavík – iðandi af lífi www.facebook.com/reykjavikidandi.
Hádegisfuglinn mun einnig verða á dagskrá 14. nóvember og 12. desember á sama tíma en mögulega verður staðsetningin önnur, sjá nánar síðar.