Rúmlega fjögur þúsund hafa þegar kosið í íbúakosningum í Reykjavík

Nú þegar rúmur sólarhringur er þar til rafrænum íbúakosningum í Reykjavík lýkur hafa rúmlega fjögur þúsund manns kosið. Íbúakosningarnar hafa staðið yfir frá 4. apríl en kosningakerfið verður opið fram yfir miðnætti á morgun, fimmtudaginn 11. apríl.

Allir íbúar í Reykjavík  sem fæddir eru 1996 eða fyrr geta kosið um framkvæmdir í hverfinu sínu en hægt er að velja á milli allt að 30 verkefna í hverju hverfi.  Kosningin fer þannig fram að hvert hverfi hefur ákveðna fjárupphæð og geta íbúar nýtt hana alla í því hverfi sem þeir kjósa.

Kosið er á vefslóðinni kjosa.betrireykjavik.is en kjósendur auðkenna sig með aðalveflykli ríkisskattstjóra eða rafrænum skilríkjum.

 

Gott að hafa í huga

Hér eru fáein atriði sem gott er að hafa í huga þegar kosið er:

 

•         Einungis er hægt að kjósa um framkvæmdir í einu hverfi, að eigin vali.

•         Verkefni er valið með því að smella á heiti þess. Verkefnið verður dökkblátt og birtist í stikunni fyrir ofan verkefnalistann.

•         Í stikunni er hægt að sjá hversu mikið fjármagn hefur verið notað og hversu mikið er eftir.

•         Hægt er að hætta við að velja verkefni með því að smella á það aftur.

•         Hægt er að velja verkefni þar til öll fjárheimild hverfisins er nýtt eða þar til ekkert þeirra verkefna sem eftir eru rúmast innan hennar (litur þeirra verður ljósblár).

•         Þegar smellt á Greiða atkvæði hnappinn birtist staðfesting á því að atkvæði hafi verið móttekið.

•         Þú getur endurtekið kosninguna eins oft og þú vilt en athugaðu að aðeins síðasta kosningin er tekin gild.

 

 

* Aðalveflykill er sá sami og notaður er til skila á skattframtali. Ef aðalveflykill hefur týnst er hægt að fá hann sendan samstundis í heimabanka. Þar birtist hann undir rafræn skjöl eða netyfirlit. Sjá hér: https://secure.rsk.is/Thjonustusidur/Vefur/TyndurVeflykill.aspx

 

Nokkur einföld skref

Kosningin er rafræn og einfalt að greiða atkvæði:

 

1.       Smelltu á slóðina http://kjosa.betrireykjavik.is

2.       Smelltu á hnappinn island.is

3.       Auðkenndu þig með því að nota aðalveflykil ríkisskattstjóra* eða rafræn skilríki á debetkorti

4.       Smelltu á það hverfi sem þú vilt kjósa í

5.       Smelltu á þau verkefni sem þú vilt kjósa

6.       Smelltu á Greiða atkvæði hnappinn til að ljúka kosningunni

 

-------------------------------------------

Nánari upplýsingar veitir Hilmar Magnússon, verkefnisstjóri Betri Reykjavíkur. Hilmar.magnusson@reykjavik.is.