Verðlaunaafhending í hönnunarsamkeppni um skemmtilegri Öskjuhlíð
Jón Gnarr borgarstjóri veitti í gær viðurkenningar í hönnunarsamkeppni um skemmtilegri Öskjuhlíð. Í samkeppnina bárust tillögur frá 58 aðilum og voru margar þeirra mjög fjölbreyttar og frjóar. Dómnefnd veitti 10 tillögum viðurkenningu og verða þær til sýnis fram í október á sýningarsvæði þjónustuvers borgarinnar, Borgartúni 12 – 14 og á vef Reykjavíkurborgar.
Greina mátti samhug meðal langflestra þeirra er sendu inn tillögur á þann veg að ekki sé þörf á gagngerri umbyltingu á Öskjuhlíð heldur frekar að gera eigi svæðið fjölbreyttara, þörf sé á að efla útivistarmöguleika Öskjuhlíðarinnar og að styrkja svæðið sem fræðslu og safnasvæði. Þessi niðurstaða veitir góða leiðsögn fyrir forsögn að fyrirhugaðri fagsamkeppni fyrir rammaskipulag. Dómnefnd skipuðu: Jón Gnarr borgarstjóri, formaður dómnefndar, Gunnar Hersveinn Sigursteinsson, heimsspekingur og rithöfundur, Ragnhildur Skarphéðinsdóttir landslagsarkitekt FÍLA, Sigrún Helga Lund, stærðfræðingur og Ómar Ragnarsson, fréttamaður.
Í 1. til 3. sæti urðu:
1-2 sæti, 150.000 kr. Öskjuhlíð, höf. Guðný Marta Guðlaugsdóttir
Skýrar hugmyndir sem byggja á því að styrkja landfræðilega eiginleika svæðisins, undirstrika sérkenni Öskjuhlíðarinnar og tengsl þess við menningu og sögu. Höfundur leggur fram margar góðar hugmyndir af tengingum, hvíldarstöðum og almenna nýtingu svæðisins.
1-2, sæti, 150.000 kr. Herminjar í hlíðinni, höf. Magdalena Sigurðardóttir
Mjög vel framsett hugmynd í máli og myndum um afmarkað og vel skilgreint viðgangsefni. Fram kemur hvernig varðveita megi og miðla sögu þeirra herminja frá seinni heimsstyrjöldinni sem eru í Öskjuhlíðinni.
3 sæti, 100.000 kr. Rathlaupabraut, höf. Rathlaupaklúbburinn Hekla
Tillagan sýnir hugmynd að varanlegum rathlaupabrautum í Öskjuhlíðinni sem nýst gætu reynslumiklum rathlaupurum, ferðamönnum, skólum eða hverjum þeim sem áhuga hafa á að spreyta sig í rathlaupi og til að gera Reykjavík fært að taka þátt í alþjóðlegri rathlaupakeppni.
Aukaviðurkenningar, 50.000 hver :
Hugmynd að náttúruvísindaskóla og ævintýragarði, Hildur Steinþórsdóttir
Skemmtilegri Öskjuhlíð, Eirný Þórólfsdóttir og Garðar Adolfsson og dæturnar Hekla, Eyja og Katla
Náttúru – og listaupplifunarstígar, Perla Dís Kristinsdóttir og Niklas Dahlström
Hjólabrautir í Öskjuhlíð, Arnaldur Gylfason, Kári Halldórsson, Rúnar Theodórsson, Böðvar Þórisson
Útivistarsvæðið Öskjuhlíð, Edda Ýr Garðarsdóttir og synirnir Nökkvi og Garðar Logi
Gróður í Öskjuhlíð, Kristbjörn Egilsson
Fróðleikur, lesið- leikið-lært, Þorbjörg Jónsdóttir
