Málþing um skil skólastiga

Ritstjórn

Hinn 13. nóvember nk.stendur skóla- og frístundsvið Reykjavíkur ásamt Menntavísindasviði HÍ fyrir málþingi um skila skólastiga, frá leikskóla til grunnskóla og grunnskóla til framhaldsskóla. Málþingið er haldið í tilefni af útgáfu bókar Gerðar G. Óskarsdóttur um þetta efni. Það er haldið í Norðlingaskóla, kl. 14.00 - 17.00. Hátt á þriðja hundrað manns skráðu sig á málþingið en skráningu er nú lokið. 

 

Dagskrá Málþingsins:

14.00   Setning– Oddný Sturludóttir, formaður skóla- og frístundaráðs Reykjavíkur.

Söngur barna af leikskólanum Rauðhóli.

14.15   Gerður G. Óskarsdóttir: Hugmyndin að bókinni, niðurstöður og hugsanleg nýting þeirra.

14.45   Viðbrögð við bókinni:

  • Ólöf Helga Pálmadóttir, leikskólastjóri Sunnuási.
  • Árný Inga Pálsdóttir, skólastjóri Kelduskóla

15.15   Kaffihlé

15.45   Viðbrögð við bókinni:

  • Hjördís Þorgeirsdóttir, rektor MS.

16.00   Pallborðsumræður - Stjórnandi Jón Torfi Jónasson, forseti Menntavísindasviðs HÍ.

  • Málþingsslit – Ragnar Þorsteinsson, sviðsstjóri  skóla- og frístundasviðs Reykjavíkur.

Málþingsstjóri er Ingvar Sigurgeirsson, prófessor HÍ.

 

Um bókina Skil skólastiga - frá leikskóla til grunnskóla OG grunnskóla til framhaldsskóla

Tengsl skólastiga, sveigjanleiki á skilum þeirra og samfella í námi hefur talsvert verið til umræðu hér á landi en mjög hefur skort á upplýsingar um efnið. Úr því er bætt með þessari bók.

Í Skilum skólastiga dregur höfundur upp ítarlega mynd af starfi á síðasta ári í leikskóla og 1. bekk grunnskóla annars vegar og 10. bekk grunnskóla og fyrsta ári í framhaldsskóla hins vegar. Varpað er ljósi á mun og samfellu í umgjörð starfsins og starfsháttum og tengslin við næsta skólastig. Lýsingarnar byggjast á vettvangsathugunum í 30 skólum, spurningakönnunum og yfir 50 viðtölum við nemendur og kennara.

Höfundur færir rök fyrir því að starfshættir séu með mjög líku sniði í skólum á sama skólastigi og samfella milli skólastiga talsverð þó að rof hafi komið fram og þá stundum það sem höfundur nefnir afturhverft rof. Því sé breytinga og jafnvel mikilla umbóta þörf á vissum sviðum en tillögur í þá veru má finna í lokakafla bókarinnar ásamt hugmyndum að frekari rannsóknum.

Skil skólastiga er hugsuð sem veganesti fyrir kennara, stjórnendur og aðra þá sem móta stefnuna í leik-, grunn- og framhaldsskólum. Hún er jafnframt samin með fræðimenn á sviði menntamála og kennaranema í huga.

Gerður G. Óskarsdóttir hefur verið kennari á grunnskóla-, framhaldsskóla- og háskólastigi, skólastjóri, skólameistari, kennslustjóri í kennaranámi framhaldsskólakennara við Háskóla Íslands, ráðunautur menntamálaráðherra og yfirmaður leik- og grunnskóla hjá Reykjavíkurborg. Hún er nú forstöðumaður Rannsóknastofu um þróun skólastarfs á Menntavísindasviði HÍ. Gerður lauk doktorsprófi í menntunarfræði frá Kaliforníuháskóla í Berkeley árið 1994 og hefur stundað fræðistörf og rannsóknir um árabil.