Þjóðarhöll
Ný og glæsileg Þjóðarhöll mun rísa í Laugardalnum. Þjóðarhöllin er fjölnota íþróttamannvirki sem mætir kröfum nútímans með fyrirmyndaraðstöðu fyrir landslið, íþróttafélög og almenning til íþróttaiðkunar, áhorfs og samveru.
Stórbætt aðstaða
Ný Þjóðarhöll mun umbylta umgjörð í kringum landsliðsfólk í fjölmörgum íþróttagreinum, stórbæta aðstöðu fyrir börn og ungmenni og aðra íþróttaiðkendur auk þess að vera fjölnota hús fyrir þjóðina alla.
Hún mun rísa í hjarta Laugardals, sunnan Laugardalshallar, með góðri tengingu við borgarlínu, göngu- og hjólaleiðir og fyrirliggjandi mannvirki: Laugardalshöll og Frjálsíþróttahöll. Notendur verða íþróttafélög, landsliðshópar sérsambanda fyrir æfingar og keppni, skólar í nágrenninu, háskólar fyrir íþróttakennslu og ýmsir viðburðahaldarar.
Höllin verður aðgengileg öllum, vettvangur lýðheilsuverkefna og samkomustaður íþróttafólks og almennings með tilheyrandi veitingarekstri sem tengist safnsvæði áhorfenda.
Myndir
Stærð
Þjóðarhöllin verður allt að 19.000 fermetrar með 8.600 manns í sæti og allt að 12.000 manns á viðburðum.
Kostnaður
Áætlaður kostnaður við framkvæmdirnar nemur 16,8 milljörðum.
Tímalína
Áformað er að framkvæmdir við bygginguna hefjist í haust og að þeim ljúki á vormánuðunum 2030.
Hvernig nýtist Þjóðarhöllin Reykvíkingum?
Það er ljóst að ný þjóðarhöll í Laugardalnum mun verða mikil lyftistöng fyrir íþrótta- og menningarstarf í Reykjavík. Hún styrkir Laugardalinn sem miðstöð afreksíþrótta á Íslandi og með henni skapast aðstaða fyrir ýmsa menningarviðburði.
Notendur Þjóðarhallar verða nærliggjandi íþróttafélög, skólar, sérsambönd, almenningur og rekstraraðilar svo sem fyrir kennslu, æfingar, keppnir, viðburðahald og aðra stoðstarfsemi.
Þjóðarhöllin verður aðgengileg almenningi og mun styrkja lýðheilsumarkmið með leiðum sem þróast í hönnunarferlinu í samstarfi við hagsmunaaðila.
Val á teymi
Árið 2024 var auglýst eftir teymum til að taka að sér verkefnið. Með teymum var leitast við að semja við hóp aðila til að annast framkvæmdina frá upphafi til enda, allt frá hönnun að fullkláruðu mannvirki. Í forvalinu voru þrjú teymi valin til þátttöku í samkeppnisútboði. Tvö endanleg tilboð bárust í samkeppnisútboðinu, annars vegar frá teymi Ístaks hf. og hins vegar frá teymi Íslenskra aðalverktaka hf.
Í mati á tilboðum tók þrettán manna matsnefnd afstöðu til 32 ítarlegra matsliða á grundvelli krafna ríkis og borgar til mannvirkisins. Horft var til þess að tryggja framúrskarandi gæði í hönnun, byggingu og rekstri Þjóðarhallar með áherslu á notagildi, útlit, frágang, aðgengi, sjálfbærni og hagkvæmni. Í lokavalinu stóð teymi Íslenskra aðalverktaka hf. ásamt ASK arkitektum, COWI, LPO arkitektum, Ísloft, EOH og Landhönnun uppi sem sigurvegari.