Velferðarráð
VELFERÐARRÁÐ
Ár 2008, miðvikudaginn 12. nóvember, var haldinn 91. fundur velferðarráðs og hófst hann kl. 12.25 á velferðarsviði, Borgartúni 12-14. Mættir: Jórunn Frímannsdóttir, Hallur Magnússon, Jóhanna Hreiðarsdóttir, Sif Sigfúsdóttir, Björk Vilhelmsdóttir, Marsibil Sæmundardóttir og Þorleifur Gunnlaugsson. Af hálfu starfsmanna: Stella K. Víðisdóttir, Ellý A. Þorsteinsdóttir, Hulda Dóra Styrmisdóttir og Helga Jóna Benediktsdóttir sem ritaði fundargerð.
Áheyrnarfulltrúi: Gunnar Hólm Hjálmarsson.
Þetta gerðist:
1. Lögð fram úttekt Capacent á starfsendurhæfingarúrræðum fyrir ríki og sveitarfélög þ.e. Grettistaki og Ekron sbr. samþykkt velferðarráðs frá 76. fundi 12. mars sl. Á fundinn mættu til að kynna niðurstöður úttektarinnar: Guðrún Reykdal, verkefnisstjóri á velferðarsviði ásamt Friðfinni Hermannssyni og Hákoni Gunnarssyni, ráðgjöfum frá Capacent.
Fulltrúi Vinstri grænna lagði fram eftirfarandi bókun:
Eins og fram kemur í skýrslu Capacent sem liggur fyrir hér á fundi velferðarráðs er auðvelt að sjá mikinn þjóðhagslegan ávinning af starfsendurhæfingu fíkla í bata. Í skýrslunni kemur fram að starfsendurhæfingarverkefnið Grettistak sem rekið er af borginni er meira en helmingi ódýrara en samsvarandi verkefni sem rekið er af verktaka á vegum sviðsins en Ekron virðist jafnframt skila heldur lakari árangri. Útúrsnúningar meirihlutans sem finna má í bókun gegn minnihlutanum í fundargerð ráðsins frá 27. júní 2007 eru því með ólíkindum. Nú þegar velferðarsvið þarf að velta fyrir sérhverri krónu er það einsýnt að samningurinn við Ekron verði ekki endurnýjaður en Grettistak þróað áfram.
2. Lagt fram til kynningar minnisblað dags. 10. nóvember 2008 um stöðu aðgerðaráætlunar velferðarsviðs vegna aðstæðna í efnahagslífi.
Sviðsstjóri velferðarsviðs gerði grein fyrir málinu.
3. Lögð fram tillaga velferðarráðs dags. 10. nóvember 2008 um breytingu á verkefnum og samsetningu stýrihóps um húsnæðismál frá 24. september 2008.
Skrifstofustjóri velferðarmála gerði grein fyrir málinu.
Tillagan var samþykkt samhljóða með áorðnum breytingum.
4. Lögð fram starfsskýrsla um heimili fyrir karla með áfengisvanda og annan vímuefnavanda frá október 2008. Ennfremur lögð fram tillaga velferðarráðs dags. 10. nóvember 2008 ásamt greinargerð.
Skrifstofustjóri velferðarmála gerði grein fyrir málinu.
Tillagan var samþykkt samhljóða.
5. Lögð fram samantekt starfshóps um ferðaþjónustu fatlaðra á höfuðborgarsvæðinu.
María Rúnarsdóttir, verkefnisstjóri á velferðarsviði mætti á fundinn og gerði grein fyrir samantektinni.
Málinu er frestað til næsta fundar.
6. Lögð fram samantekt úr áfangaskýrslum starfshópa um bætta nærþjónustu við aldraða Reykvíkinga, september 2008.
Skrifstofustjóri velferðarþjónustu gerði grein fyrir málinu.
Velferðarráð lagði fram eftirfarandi bókun:
Velferðarráð vill ítreka bókun sína frá 22. ágúst 2007 um mikilvægi þess að tengslanet í hverfum borgarinnar sé eflt með skipulegum hætti og að komið verði á fót því markvissa samstarfi sem nærþjónustuhópar eiga að vinna að.
7. Sviðsstjóri velferðarsviðs tilkynnti um afhendingu karlastyrks sem fram fer nk. föstudag.
8. Sviðsstjóri gerði grein fyrir málefnum unglingasmiðja í Reykjavík.
Fundi slitið kl. 14.50
Jórunn Frímannsdóttir
Hallur Magnússon Jóhanna Hreiðarsdóttir
Sif Sigfúsdóttir Björk Vilhelmsdóttir
Marsibil Sæmundardóttir Þorleifur Gunnlaugsson