Skóla- og frístundaráð
MENNTARÁÐ
Ár 2010, 12. maí var haldinn 121. fundur menntaráðs. Fundurinn var haldinn í Klébergsskóla á Kjalarnesi og hófst kl. 10.05. Fundinn sátu Kjartan Magnússon formaður, Anna Margrét Ólafsdóttir, Lilja Dögg Alfreðsdóttir, Marta Guðjónsdóttir, Oddný Sturludóttir, Sigrún Elsa Smáradóttir og Sigríður Pétursdóttir. Auk þeirra sátu fundinn Kjartan Eggertsson, áheyrnarfulltrúi F-lista, Bryndís Jónsdóttir, áheyrnarfulltrúi SAMFOK, Hreiðar Sigtryggsson, áheyrnarfulltrúi Skólastjórafélags Reykjavíkur og Þorgerður L. Diðriksdóttir, áheyrnarfulltrúi Kennarafélags Reykjavíkur. Jafnframt sátu fundinn Ragnar Þorsteinsson fræðslustjóri, Auður Árný Stefánsdóttir og Valgerður Janusdóttir.
Fundarritari var Aðalbjörg Dísa Guðjónsdóttir.
Þetta gerðist:
1. Fundurinn hófst á því að hópur leik- og grunnskólabarna leiddu göngu fundarmanna frá íþróttahúsinu á Kjalarnesi að svæði þar sem verið er að skipuleggja útikennslustofu. Þar sungu börnin og Elín Þóra Böðvarsdóttir, leikskólastjóri Bergs og Björgvin Þór Þórhallsson, skólastjóri Klébergsskóla, tóku skóflustungu að útikennslustofunni og afhjúpuðu skilti merkt henni. Þá kynnti Elín Þóra starfsemi leikskólans. Í framhaldi fylgdu fundarmenn Björgvini inn í Klébergsskóla þar sem hann kynnti starfsemi skólans.
Bókun menntaráðs:
Menntaráð þakkar fyrir hlýlegar og skemmtilegar móttökur í grunn- og leikskólanum á Kjalarnesi. Ljóst er að gott samstarf er á milli leik- og grunnskóla á svæðinu sem mun skila sér í aukinni samfellu í skólastarfi milli þessara stiga. Einnig er áhugavert að sjá að tónlistarskólinn er staðsettur í grunnskóla og mun það sjálfsagt greiða fyrir betra aðgengi nemanda að tónlistarmenntun. Fulltrúum menntaráðs fannst sérlega ánægjulegt að hafa fengið að taka þátt í fyrstu skóflustungunni að sameiginlegri útikennslustofu grunn- og leikskóla á Kjalarnesi.
2. Guðrún Edda Bentsdóttir, verkefnastjóri á grunnskólaskrifstofu Menntasviðs kynnti vinnu starfshóps um skólahald á Kjalarnesi.
3. Lagt fram minnisblað frá fræðslustjóra, dags. 6. maí 2010, um lestrarverkefni í grunnskólum Reykjavíkur. Guðrún Edda Bentsdóttir gerði grein fyrir málinu og svaraði fyrirspurnum.
Svohljóðandi tillaga samþykkt:
Menntaráð fagnar hinum fjölbreyttu lestrarverkefnum sem hafa verið unnin í grunnskólum Reykjavíkur á síðustu misserum, þar má nefna Byrjendalæsi, alþjóðlegt samstarf við Ardleigh Green skólann í Englandi, samstarf Menntasviðs og Rannsóknarstofu um þroska, mál og læsi og verkefnið Lesum enn meira ásamt öðrum mikilvægum verkefnum. Menntaráð leggur til að næsti áfangi í lestrarverkefnum verði á mið- og unglingastigi. Góður lesskilningur er grunnurinn að allri frekari menntun. Í ljósi þessa góða árangurs með lestrarverkefnin hefur menntaráð jafnframt áhuga á að fara í samstarf við háskóla um skólaþróunarverkefni í stærðfræði og náttúruvísindum. Fræðslustjóra verður falið að útfæra næstu skref í þessum málaflokkum.
4. Lagt fram bréf fræðslustjóra og sviðsstjóra Íþrótta- og tómstundasviðs og Velferðarsviðs, dags. 6. maí sl. um Skólaselið í Keilufelli þar sem lagt er til að úrræðið verði formgert og fest í sessi sem eitt af sérúrræðum Reykjavíkurborgar fyrir börn á grunnskólaaldri. Jafnframt lagður fram núgildandi samstarfssamningur um Skólaselið.
Samþykkt.
- Kl. 11.55 vék Ragnar Þorsteinsson af fundi.
5. Lögð fram skýrsla starfshóps um Samstarf grunnskóla og tónlistarskóla – tillögur starfshóps um verklagsreglur, dags. í maí 2010. Laufey Ólafsdóttir, forstöðumaður tónlistarmála og formaður hópsins gerði grein fyrir vinnu starfshópsins.
Samþykkt.
6. Lagt fram minnisblað fræðslustjóra, dags. 23. apríl sl., um stöðu mála varðandi vinnu samráðshóps um samhæfða þjónustu við nemendur með einhverfu í grunnskólum. Ragnheiður Axelsdóttir, verkefnastjóri á grunnskólaskrifstofu gerði grein fyrir málinu og svaraði fyrirspurnum.
Fundi slitið kl. 12.34
Kjartan Magnússon
Anna Margrét Ólafsdóttir Lilja Dögg Alfreðsdóttir
Marta Guðjónsdóttir Oddný Sturludóttir
Sigrún Elsa Smáradóttir Sigríður Pétursdóttir