Mannréttinda- og ofbeldisvarnarráð
Ár 2022, fimmtudaginn 24. nóvember var haldinn 7. fundur mannréttinda- og ofbeldisvarnarráðs. Fundurinn var haldinn í Ráðhúsi, Tjarnarbúð og hófst kl. 13.05. Fundinn sátu Magnús Davíð Norðdahl, Þorvaldur Daníelsson, Sabine Leskopf, Helga Þórðardóttir, Friðjón R. Friðjónsson og Ásta Þórdís Skjalddal Guðjónsdóttir. Auk þeirra eftirtaldir áheyrnarfulltrúar: Jenný Ingudóttir, Embætti Landlæknis; Steinunn Gyðu- og Guðjónsdóttir, Stígamót og Linda Dröfn Gunnarsdóttir, Samtök um Kvennaathvarf. Eftirtaldir fulltrúar mannréttinda- og ofbeldisvarnarráðs tóku sæti á fundinum með fjarfundarbúnaði með vísan í 1. málsl. 1. mgr. 54. gr. sveitarstjórnarlaga nr. 138/2011, sbr. 4. málsl. 1. mgr. 13. gr. samþykktar um stjórn Reykjavíkurborgar og fundarsköp borgarstjórnar varðandi fjarfundaheimild: Árelía Eydís Guðmundsdóttir. Einnig sátu fundinn Anna Kristinsdóttir og Halldóra Dýrleifar Gunnarsdóttir.
Elísabet Pétursdóttir ritaði fundargerð.
Þetta gerðist:
-
Fram fer kynning á aðgerðaráætlun Reykjavíkurborgar gegn ofbeldi 2022 – 2024. MSS22010193
Fulltrúi Flokks fólksins leggur fram svohljóðandi bókun:
Aðgerðaráætlunin var unnin af ofbeldisvarnarnefnd Reykjavíkurborgar. Hún er ágætur leiðarvísir. Fleiri aðgerðum mætti bæta við s.s. Er varða eldra fólk og heimilisofbeldi/einelti, einnig að lýsing í borginni er stór öryggisþáttur, öryggismyndavélar á leiksvæðum svo fátt sé nefnt. Ýmsar spurningar vakna og þá helst hvernig áætluninni er og verður framfylgt og hvert sé hlutverk ofbeldisvarnarráðs í því sambandi. Talað er um að það eigi að birta tölfræði upplýsingar sem taka á saman velferðarsviði og hjá Lögreglunni á höfuðborgarsvæðinu með reglubundnum hætti á vef borgarinnar. Einnig eiga að vera upplýsingar í tengslum við verkefnið Saman gegn ofbeldi á vefsíðu borgarinnar um hvert brotaþolar og gerendur geta leitað til að fá aðstoð. Fulltrúi Flokks fólksins leitaði að þessum upplýsingum á heimasíðu borgarinnar og fann ekki. Innleiða á verkefnið/verklagið Opinskátt um ofbeldi í öllum hverfum borgarinnar. Í því felst m.a. að ræða á við börn um ofbeldi og gera þau færari í að taka afstöðu gegn því. Þetta eru göfug markmið en segja má að þessi verkefni sé nokkuð út og suður. Nú er komið nýtt fyrirkomulag, ofbeldisvarnarráð, sem Flokkur fólksins telur að koma þurfi sterkar inn í málaflokkinn t.d. hvað varðar eftirfylgni.
Fylgigögn
-
Fram fer kynning á verkefninu Saman gegn ofbeldi. MSS22110176
Fulltrúi Flokks fólksins leggur fram svohljóðandi bókun:
Flokkur fólksins styður svo sannarlega verkefnið Saman gegn ofbeldi. Með góðu samstarfi þeirra aðila sem koma að verkefninu hefur það skilað góðum árangri. Markmiðið á alltaf að vera að útrýma hvers kyns ofbeldi og senda skýr skilaboð um að ofbeldi sé ólíðandi. Fulltrúa Flokks fólksins telur mikilvægt að mannréttinda og ofbeldisvarnarráð hafi góða samvinnu við þá sem fara fyrir verkefninu og hjálpi til með öllum ráðum til að verkefnið skili árangri.
Fylgigögn
-
Fram fer umræða um ofbeldi í almannarými. MSS22110177
Mannréttinda- og ofbeldisvarnarráð leggur fram svohljóðandi bókun:
Mannréttinda- og ofbeldisvarnarráð lýsir yfir miklum áhyggjum af ofbeldi á skemmtistöðum Reykjavíkurborgar með hliðsjón af nýlegum fréttum þar að lútandi. Íbúar Reykjavíkur og aðrir sem sækja sér skemmtun í borginni eiga skýlausan rétt á því að vera öruggir. Ofbeldi í hvaða mynd er óásættanlegt. Þörf er á samhæfðum aðgerðum stjórnvalda til að taka fast á þessu margþætta vandamáli. Með gæsku, mannúð, öflugum forvörnum, heilsueflingu, inngildingu og stuðningi við jákvæða tengslamyndun að leiðarljósi er þörf á aukinni snemmtækri íhlutun til þess að grípa ungmenni í erfiðum og krefjandi aðstæðum.
Fulltrúi Flokks fólksins leggur fram svohljóðandi bókun:
Fréttir um ofbeldi í almannarými undanfarna daga og mánuði vekur ugg hjá borgarbúum. Greinilegt er að ofbeldi er að færast í aukana. Auknar hópamyndanir svokallaðra gengja og almennt aukinn vopnaburður. Flokkur fólksins tekur þessar vísbendingar alvarlega og vill að farið verði í markvissar aðgerðir og rýna þetta aukna ofbeldi. Í því samhengi má nefna tillögu Flokks fólksins um samvinnu vegna aukins ofbeldis ungmenna. Mikilvægt er að auka sýnileika lögreglu í almannarýmum en það hefur verið gert á Norðurlöndum og gefist vel. Í aðgerðaáætlun Reykjavíkurborgar gegn ofbeldi 2022 - 2024 segir: Samfélagslögreglur verði starfandi á öllum lögreglustöðvum höfuðborgarsvæðisins. Tilraunaverkefni um samfélagslögreglur á öllum lögreglustöðvum höfuðborgarsvæðisins verði sett á fót í þeim tilgangi að auka nærveru við borgarbúa, vera sýnilegri og aðgengilegri og auka með þeim hætti traust borgarbúa til lögreglu. Segir jafnframt í aðgerðaráætluninni að verkefnið eigi að vera komið til framkvæmda haustið 2022. Við viljum öll búa í öruggu samfélagi frá vöggu til grafar. Við viljum að börnin okkar geti leikið sér á öruggum leikvöllum, að öryggismál skólanna sé í lagi og að þar sé unnið gegn einelti og hvers kyns ofbeldi. Þegar við eldumst viljum við finna fyrir öryggi og að við getum verið örugg þegar við hreyfum okkur utandyra.
-
Umræða um tækifæri til ofbeldisvarna. MSS22110178
Frestað. -
Fram fer umræða um opinn fund mannréttinda- og ofbeldisvarnarráðs í tengslum við Alþjóðlegan dag mannréttinda þann 10. desember 2022. MSS22110179
Samþykkt að fela formanni og mannréttinda- og lýðræðisskrifstofu að hefja undirbúning í samræmi við umræðu fundarins.Fylgigögn
-
Lögð fram svohljóðandi fyrirspurn fulltrúa Flokks fólksins:
Aðgerðaáætlun Reykjavíkurborgar gegn ofbeldi 2022 – 2024 er unnin af ofbeldisvarnarnefnd Reykjavíkurborgar. Hún er sett fram til að fá yfirsýn yfir þau fjölmörgu verkefni sem borgin sinnir í vinnu gegn ofbeldi. Henni er einnig ætlað að vera vegvísir í baráttunni gegn ofbeldi og tryggja að þau verkefni sem tilgreind eru verði framkvæmd. Aðgerðaráætlunin er sannarlega viða mikil og metnaðarfull. Metnaðarfullum hugmyndum þarf að fylgja eftir. Hver er ábyrgð ofbeldisvarnarráðs á þessari aðgerðaráætlun? Í áætluninni eru vissulega nefndir ábyrgðaraðilar fyrir sérstökum verkefnum og víða nefnt að verkefni eigi að vera komin til framkvæmda haustið 2022. Það sem Flokki fólksins langar að vita er hvað gerist ef einhver ábyrgðaraðili fer ekki eftir aðgerðaráætluninni? Það er ekki nóg að skrifa fallegar stefnur/ áætlanir það þarf að fylgja þeim eftir annars verða þau bara orðin tóm. MSS22110219
Vísað til umsagnar mannréttinda- og lýðræðisskrifstofu.
Fundi slitið kl. 16:10
Magnús Davíð Norðdahl
Þorvaldur Daníelsson Helga Þórðardóttir
Árelía Eydís Guðmundsdóttir Friðjón R. Friðjónsson
Ásta Þórdís Skjalddal Guðjónsdóttir Sabine Leskopf
Magnús Davíð Norðdahl Þorvaldur Daníelsson
Árelía Eydís Guðmundsdóttir Ásta Þórdís Skjalddal Guðjónsdóttir
Helga Þórðardóttir Friðjón R. Friðjónsson
Sabine Leskopf