Borgarráð - Fundur nr. 5634

Borgarráð

Ár 2021, fimmtudaginn 2. september, var haldinn 5634. fundur borgarráðs. Fundurinn var haldinn í Ráðhúsi Reykjavíkur og hófst kl. 09:06. Viðstödd voru auk borgarstjóra Þórdís Lóa Þórhallsdóttir, Líf Magneudóttir, Heiða Björg Hilmisdóttir, Dóra Björt Guðjónsdóttir, Eyþór Laxdal Arnalds, Hildur Björnsdóttir og Valgerður Sigurðardóttir. Einnig sátu fundinn áheyrnarfulltrúarnir Sanna Magdalena Mörtudóttir, Vigdís Hauksdóttir og Kolbrún Baldursdóttir. Eftirtaldir fulltrúar, auk borgarstjóra, tóku sæti á fundinum með fjarfundarbúnaði með vísan til heimilda í auglýsingu nr. 354/2021 um ákvörðun samgöngu- og sveitarstjórnarráðherra, skv. VI. bráðabirgðaákvæði sveitarstjórnarlaga nr. 138/2011: Dóra Björt Guðjónsdóttir. Eftirtaldir embættismenn og aðrir starfsmenn sátu fundinn: Ebba Schram, Þorteinn Gunnarsson og Ólöf Magnúsdóttir.
Fundarritari var Bjarni Þóroddsson.

Þetta gerðist:

  1. Lagt fram bréf umhverfis- og skipulagssviðs, dags. 30. ágúst 2021, sbr. synjun skipulags- og samgönguráðs frá 25. ágúst 2021 á breytingu á deiliskipulagi Breiðholts, Hólahverfis, vegna lóðarinnar nr. 4 við Fýlshóla, ásamt fylgiskjölum. R21080197
    Synjun skipulags og samgönguráðs er staðfest.

    Ólöf Örvarsdóttir tekur sæti á fundinum undir þessum lið með fjarfundarbúnaði.

    Fylgigögn

  2. Lagt fram bréf umhverfis- og skipulagssviðs, dags. 30. ágúst 2021, sbr. samþykkt skipulags- og samgönguráðs frá 25. ágúst 2021 á tillögu að breytingu á deiliskipulagi Laugardals, ásamt fylgiskjölum. R21060019
    Samþykkt.

    Ólöf Örvarsdóttir tekur sæti á fundinum undir þessum lið með fjarfundarbúnaði.

    Fylgigögn

  3. Lagt fram bréf umhverfis- og skipulagssviðs, dags. 30. ágúst 2021, sbr. samþykkt skipulags- og samgönguráðs frá 25. ágúst 2021 á tillögu að breytingu á deiliskipulagi fyrir lóðina nr. 1 við Lækjargötu, ásamt fylgiskjölum. R21080201
    Samþykkt.

    Ólöf Örvarsdóttir tekur sæti á fundinum undir þessum lið með fjarfundarbúnaði.

    Fylgigögn

  4. Lagt fram bréf umhverfis- og skipulagssviðs, dags. 30. ágúst 2021, sbr. samþykkt skipulags- og samgönguráðs frá 25. ágúst 2021 á tillögu að breytingu á deiliskipulagi Nýlendureits 1.131  vegna lóðarinnar nr. 14 við Nýlendugötu, ásamt fylgiskjölum. R21080200
    Samþykkt.

    Ólöf Örvarsdóttir tekur sæti á fundinum undir þessum lið með fjarfundarbúnaði.

    Fylgigögn

  5. Lagt fram bréf umhverfis- og skipulagssviðs, dags. 30. ágúst 2021, sbr. samþykkt skipulags- og samgönguráðs frá 25. ágúst 2021 á tillögu að breytingu á deiliskipulagi Einholts-Þverholts vegna lóðarinnar nr. 13 við Þverholt, ásamt fylgiskjölum. R21020102
    Samþykkt.

    Áheyrnarfulltrúi Flokks fólksins leggur fram svohljóðandi bókun:

    Þverholt 13 – deiliskipulag: Fulltrúi Flokks fólksins hefur samúð með fólki sem telur sig hafa keypt húsnæði með einhverju ákveðnu útsýni en næsta sem gerist er að byggt er þannig við hlið þess að útsýni er ýmist skert eða hverfur alveg. Í sumum þessara mála er um hrein svik að ræða því fólki hefur verið sagt að ekki verði byggt þannig að útsýni þeirra verði skert. Í mörgum tilfellum hefur fólk jafnvel fjárfest í eigninni mikið til vegna útsýnis eða sólarlags nema hvort tveggja sé.

    Ólöf Örvarsdóttir tekur sæti á fundinum undir þessum lið með fjarfundarbúnaði.

    -    Kl. 9:31 tekur Dóra Björt Guðjónsdóttir sæti á fundinum og aftengist fjarfundarbúnaði.

    Fylgigögn

  6. Lagt fram bréf umhverfis- og skipulagssviðs, dags. 1. september 2021, sbr. samþykkt skipulags- og samgönguráðs frá 1. september 2021 á trúnaðarmerktum tillögum að fegrunarviðurkenningum Reykjavíkurborgar fyrir 2021. R20080136
    Samþykkt.
    Trúnaður er um efni tillagnanna fram að afhendingu viðurkenninganna.

    Áheyrnarfulltrúi Flokks fólksins leggur fram bókun sem færð er í trúnaðarbók.

    Ólöf Örvarsdóttir tekur sæti á fundinum undir þessum lið með fjarfundarbúnaði.

  7. Lagt fram bréf umhverfis- og skipulagssviðs- samgöngurstjóra, dags. 30. október 2021, varðandi reglur um sérmerkt bílastæði erlendra sendiráða. R21080198
    Samþykkt.

    Ólöf Örvarsdóttir tekur sæti á fundinum undir þessum lið með fjarfundarbúnaði.

    Fylgigögn

  8. Lagt fram bréf mennta- og menningarmálaráðuneytisins, dags. 24. ágúst 2021, þar sem óskað er eftir tilnefningum í skólanefnd Borgarholtsskóla 2021-2025. R21080196
    Frestað.

  9. Lagt fram bréf mennta- og menningarmálaráðuneytisins, dags. 24. ágúst 2021, þar sem óskað er eftir tilnefningum í skólanefndir framhaldsskóla í Reykjavík. R21070129
    Frestað.

  10. Lögð fram svohljóðandi tillaga borgarstjóra, dags. 31. ágúst 2021, ásamt fylgiskjölum:

    Lagt er til að borgarráð samþykki hjálagða samstarfsyfirlýsingu Reykjavíkurborgar, Félagsvísindastofnunar Háskóla Íslands og Women Political Leaders um framkvæmd rannsóknarinnar Reykjavík Index á Íslandi. Kostnaðurinn verður fjármagnaður af kostnaðarstað 09204. R21080186

    Samþykkt.

    Fylgigögn

  11. Lagt fram trúnaðarmerkt bréf fjármála- og áhættustýringarsviðs, dags. 31. ágúst 2021, varðandi áhættuskýrslu A-hluta Reykjavíkurborgar fyrir 2. ársfjórðung 2021. R21080189

    Áheyrnarfulltrúi Flokks fólksins leggur fram svohljóðandi bókun:

    Áhættuskýrsla A-hluta: Fulltrúi Flokks fólksins hefur alvarlegar áhyggjur af stöðu fjármála í borginni og þá helst þeim sviðum sem standa undir beinni þjónustu við borgarbúa. Þessi svið þurfa meiri athygli borgaryfirvalda vegna vaxandi umsvifa og óvæntrar neikvæðrar þróunar. Nýlega kom enn ein könnunin út um vaxandi vanlíðan barna og fjölgun er í málum til barnaverndar. Biðlisti barna eftir sálfræðingum skóla er langur og ef fram heldur sem horfir mun ekki sjá högg á vatni því það vantar fleiri fagaðila. Fulltrúi Flokks fólksins vill „stokka upp á nýtt“. Velferðarsvið og skóla- og frístundasvið þurfa meira fjármagn til að mæta þörfum minnihlutahópa og viðkvæmra hópa. Oft hlýtur að mæða mikið á starfsfólki. Þetta má sjá á háu veikindahlutfalli. Reykjavíkurborg á því ekki annan kost en að vinna úr stöðunni sem hér er uppi. Sækja má fé til annarra sviða eins og þjónustu- og nýsköpunarsviðs, sem ekki hefur fæði, klæði og húsnæði borgarbúa á sínum herðum en hefur sogað til sína gríðarlegt fjármagn á stuttum tíma. Mörg verkefni mega bíða og einnig getur sviðið gengið til samstarfs við Stafrænt Ísland, island.is, sem spara myndi milljónir ef ekki milljarða eins og fram kom á ráðstefnunni Tengjum ríkið.

    Halldóra Káradóttir tekur sæti á fundinum undir þessum lið með fjarfundarbúnaði.
     

  12. Lagðar fram tillögur borgarstjóra, dags. 30. ágúst 2021, að viðaukum við fjárhagsáætlun Reykjavíkurborgar 2021, ásamt fylgiskjölum. Greinargerðir fylgja tillögunum. R21010107
    Vísað til borgarstjórnar.

    Halldóra Káradóttir tekur sæti á fundinum undir þessum lið með fjarfundarbúnaði.

    Fylgigögn

  13. Lögð fram svohljóðandi tillaga borgarstjóra, dags. 31. ágúst 2021, ásamt fylgiskjölum:

    Lagt er til að borgarráð samþykki meðfylgjandi drög að nýju hluthafasamkomulagi og samþykktum fyrir Rekstrarfélagið Stæði ehf.

    Greinargerð fylgir tillögunni. R21080124
    Samþykkt.

    Halldóra Káradóttir og Óli Jón Hertervig taka sæti á fundinum undir þessum lið með fjarfundarbúnaði.

    Fylgigögn

  14. Lagt fram bréf fjármála- og áhættustýringarsviðs, dags. 27. ágúst 2021, þar sem óskað er eftir að borgarráð samþykki leigusamning um húsnæði við Kirkjustétt 2-6, ásamt fylgiskjölum. R21080184
    Samþykkt.

    Halldóra Káradóttir og Óli Jón Hertervig taka sæti á fundinum undir þessum lið með fjarfundarbúnaði.

    Fylgigögn

  15. Lagt fram bréf skóla- og frístundasviðs, dags. 26. ágúst 2021, sbr. samþykkt skóla- og frístundaráðs frá 24. ágúst 2021 á tillögu að sameiningu á yfirstjórnum frístundamiðstöðvanna Ársels og Gufunesbæjar, ásamt fylgiskjölum. R21080182
    Samþykkt.

    Áheyrnarfulltrúi Flokks fólksins leggur fram svohljóðandi bókun:

    Bókun Flokks fólksins við tillögu meirihlutans í skóla- og frístundaráði að frístundamiðstöðvarnar Ársel og Gufunesbær verði sameinaðar undir einni yfirstjórn: Ánægja er með frístundastarf en er ánægja með þessa sameiningu? Fram kemur að sameining hefur ekki verið borin undir notendur, foreldrahópinn. Það var ekki talið nauðsynlegt að mati skóla- og frístundasviðs en kannski hefði mátt upplýsa notendur um þessa breytingu. Fulltrúi Flokks fólksins óskar þess að þetta verði farsælt. Gæta þarf vel að þjónustan skerðist ekki, aukist frekar og verði bara enn betri ef eitthvað er. Einnig þarf að huga að því að enginn „týnist“ þegar eining er orðin svo stór sem raun ber vitni.

    Helgi Grímsson og Ingibjörg M. Gunnlaugsdóttir taka sæti á fundinum undir þessum lið með fundarbúnaði.

    Fylgigögn

  16. Lagt fram bréf skóla- og frístundasviðs, dags. 26. ágúst 2021, sbr. samþykkt skóla- og frístundaráðs frá 24. ágúst 2021 á samstarfssamningi um samrekið almennings- og skólabókasafn í Úlfarssárdal, ásamt fylgiskjölum. R21080183
    Samþykkt.

    Helgi Grímsson og Ingibjörg M. Gunnlaugsdóttir taka sæti á fundinum undir þessum lið með fundarbúnaði.

    Fylgigögn

  17. Lagt fram bréf skóla- og frístundasviðs, dags. 26. ágúst 2021, sbr. samþykkt skóla- og frístundaráðs frá 24. ágúst 2021 á tillögu um opnunartíma leikskóla og tillögum stýrihóps um umbætur á skipulagi og umhverfi leikskólastarfs Reykjavíkurborgar, ásamt fylgiskjölum. R20010252
    Samþykkt með fjórum atkvæðum borgarráðsfulltrúa Samfylkingar, Viðreisnar, Pírata og Vinstri grænna gegn þremur atkvæðum borgarráðsfulltrúa Sjálfstæðisflokksins.

    Málið fer til endanlegrar staðfestingar borgarstjórnar með vísan til ákvæða 1. mgr. 48. gr. samþykktar um stjórn Reykjavíkurborgar og fundarsköp borgarstjórnar.

    Borgarráðsfulltrúar Samfylkingarinnar, Viðreisnar, Pírata og Vinstri grænna leggja fram svohljóðandi bókun:

    Það hefur verið sérstakt forgangsmál meirihlutans að bæta starfsaðstæður í leikskólum, grunnskólum og frístundastarfi og tillögur um breyttan opnunartíma, breytt skipulag leikskóladagsins, nýtt úthlutunarlíkan og fleira þjóna sama markmiði. Lögð er áhersla á að viðhalda gæðum leikskólastarfsins með styttri viðverutíma barna en jafnframt er gripið til mótvægisaðgerða sem taka mið af niðurstöðum jafnréttismats. Þar verður sérstaklega komið til móts við þarfir foreldra sem eiga erfitt með að mæta styttingu opnunartíma um 15-30 mínútur á dag. Reykjavík gengur þar með lengra til móts við þarfir foreldra en gert hefur verið í öðrum sveitarfélögum sem stytt hafa opnunartíma leikskóla, s.s. Kópavogi, Akureyri, Reykjanesbæ og víðar. Um er að ræða tveggja ára tilraunaverkefni.

    Borgarráðsfulltrúar Sjálfstæðisflokksins leggja fram svohljóðandi bókun:

    „Fjölskyldur í forgang“ er slagorð Samfylkingar fyrir alþingiskosningar. Það er kaldhæðnislegt nú þegar blasa við þjónustuskerðingar á leikskólum borgarinnar sem koma munu illa niður á fjölskyldufólki í Reykjavík. Sjálfstæðisflokkur leggst eftir sem áður alfarið gegn skerðingunni. Það hefur fulltrúi foreldra leikskólabarna í skóla- og frístundaráði jafnframt gert. Jafnréttismat hefur sýnt glöggt hvernig skerðingin kemur verst niður á vinnandi mæðrum, lágtekjufólki, fólki af erlendum uppruna og þeim sem hafa lítinn sveigjanleika í starfi. Fjölmargir eru á biðlistum eftir leikskólaplássi og frístund um alla borg. Dagforeldrum fer fækkandi ár frá ári. Nemendur Fossvogsskóla hafa ekki fengið varanlega lausn í áralangri baráttu fyrir heilnæmu skólahúsnæði. Málefni fjölskyldunnar virðast afgangsstærð í borginni – allt í boði Samfylkingar, Viðreisnar, Vinstri grænna og Pírata.

    Áheyrnarfulltrúi Sósíalistaflokks Íslands leggur fram svohljóðandi bókun:

    Hér eru lagðar fram tillögur um umbætur og skipulag leikskólastarfs og þ.m.t. tillaga um að opnunartími leikskóla tíma styttist til 16:30. Jafnréttismat sýndi fram á að ýmsir eigi erfitt með að mæta breyttum opnunartíma. Mikilvægt er að skólastarf taki tillit til þarfa og aðstæðna ólíkra barna og fjölskyldna þeirra og að frekar sé leitast við að skoða eflingu skólastigsins í stað þess að ábyrgðinni sé velt yfir á fjölskyldur til að mæta breytingum. Jafnréttismat sýnir fram á að ekki geta allir foreldrar sótt börn sín fyrr úr leikskólanum né treyst á félagslegt tengslanet. Tillaga meirihluta felur í sér að einn til tveir leikskólar verði opnir í hverju hverfi til 17:00 fyrir þau sem þurfa sem leiðir til þess að börn þurfi að skipta um leikskóla. Fulltrúi sósíalista telur mikilvægt að byggja skólastarfið upp í kringum núverandi þarfir barna í stað þess að börn þurfi að aðlaga sig að breytingum. Mikilvægt er að allt verði skoðað til að tryggja að starfsfólk leikskóla fái það sem þau þurfi til að tryggja að skólarnir geti verið opnir til 17:00 án þess álags sem þau lýsa í meðfylgjandi skýrslu og þannig að starfið geti verið byggt upp með þeim leiðum sem þau telja farsælast.

    Áheyrnarfulltrúi Flokks fólksins leggur fram svohljóðandi bókun:

    Áheyrnarfulltrúi Flokk fólksins mótmælir fyrirhugaðri styttingu á opnunartíma leikskóla Reykjavíkurborgar og tekur þar með undir með foreldrum og foreldrafélaginu. Stytting opnunartíma leikskóla og skerðing á þjónustu sem lögð er til mun hafa neikvæð áhrif á fjölmargar fjölskyldur og oft þær fjölskyldur sem hafa minnst bakland og þurfa mest á leikskólavist að halda. Skert þjónusta leikskóla eykur ekki endilega gæðasamverustundir foreldra og barna heldur getur aukið álag á fjölskyldur. Þessi breyting mun minnka þjónustu í nærumhverfi íbúa og leiða til meiri aksturs í andstöðu við markmið borgarinnar í umhverfismálum. Niðurstöður jafnréttismatsins sýna líka ótvírætt að stytting opnunartíma hefur meiri áhrif á mæður en feður. Mikilvægt er að vandað verði til verka þegar mælikvarðar og markmið til þessa að meta áhrif þessa tilraunaverkefnis verða skilgreind og haft verði samráð við fulltrúa foreldra við það.

    Helgi Grímsson og Ingibjörg M. Gunnlaugsdóttir taka sæti á fundinum undir þessum lið með fundarbúnaði.

    Fylgigögn

  18. Fram fer kynning á starfsemi, fjármagnsskipun, stöðu og framgangi verkefna Betri samgangna. R21030058

    Borgarráðsfulltrúar Samfylkingar, Viðreisnar, Pírata og Vinstri grænna leggja fram svohljóðandi bókun:

    Betri samgöngur eru gagngert stofnaðar til að hrinda samgöngusáttmálanum í framkvæmd. Fulltrúum fyrirtækisins er þakkað fyrir greinargóðar kynningar þar sem fram kom að verkefni sáttmálans eru komin á fulla ferð. Þar með talið þétt hjólastíganet á höfuðborgarsvæðinu og það sem skilgreint hefur verið sem hryggjarstykkið í betri almenningsamgöngum, borgarlína.

    Áheyrnarfulltrúi Miðflokksins leggur fram svohljóðandi bókun:

    Lítið er að græða á kynningu sem haldin var af Betri samgöngum ohf. fyrir borgarráði sem ekki var vitað áður. Hlutverk Betri samgangna á að vera yfirumsjón og eigandaeftirlit með uppbyggingu samgöngumannvirkjanna gagnvart Vegagerðinni og að tryggja fjármögnun verkefna í samræmi við samþykktir Alþingis og sveitarfélaga. Hlutverk Vegagerðarinnar á að vera undirbúningur, hönnun og verklegar framkvæmdir sem ráðist verður í og samráð við viðkomandi sveitarfélög. Síðan á að stofna verkefnastofur eða verkefnateymi um einstök verkefni til að tryggja skilvirkni og gott samstarf aðila við undirbúning og framkvæmdir. Það er hreint með ólíkindum hvert þetta félag er farið. Borgarfulltrúi Miðflokksins hefur spáð og spáir því að félagið verði pengingalegt svarthol eins og Nýi Landspítalinn. Það er óábyrg fjármálastjórn og kjörnum fulltrúum verður aldrei hleypt inn í kjarna félagsins til að hafa eftirlit með fjárhagslegum skuldbindingum og spillingu í rekstrinum.

    Áheyrnarfulltrúi Flokks fólksins leggur fram svohljóðandi bókun:

    Fulltrúi Flokks fólksins vill koma því að að Arnarnesvegur mun hafa mjög neikvæð umhverfisáhrif. Á þetta hefur fulltrúi Flokks fólksins og Vinir Vatnsendahvarfs margsinnis bent og vonast til að fengið verði nýtt umhverfismat í stað þess að byggja á 18 ára gömlu mati. Það mun gríðarlegt ónæði hljótast af þessum framkvæmdum fyrir íbúa nágrennisins. Möguleiki er á að hús í nálægð við veginn muni skemmast vegna sprenginga og fleira. Hætta er á að verðgildi húsa í nágrenni við veginn muni falla. Framkvæmdir munu taka allt að ár eða lengur og allan þann tíma þurfa íbúar í nágrenni að búa við skert lífsgæði. Þetta verður að skoða betur og því er ekki hægt að byggja svona stórar framkvæmdir á umhverfismati sem er nær tveggja áratuga gamalt. Fulltrúi Flokks fólksins og Vinir Vatnsendahvarfs eru mjög ósammála úrskurði í umhverfismati, sem var unnið fyrir Vegagerðina árið 2003, um að lagning 3. kafla Arnarnesvegar muni hafa óveruleg áhrif á umhverfi, útivist og hljóðvist. Það er vert að hafa í huga að verkfræðistofurnar sem vinna þessar skýrslur fyrir Vegagerðina koma ávallt með niðurstöður sem samræmast væntingum Vegagerðarinnar. Vegagerðin og þessar verkfræðistofur virðast aldrei setja náttúru og lífríki í fyrsta sætið.

    Davíð Þorláksson, Árni M. Mathiesen og Þröstur Guðmundsson taka sæti á fundinum undir þessum lið með fjarfundarbúnaði.

  19. Lögð fram skýrsla Betri samgangna ohf., dags. júní 2021, um stöðu og framgang verkefna félagsins. R21070022

    Borgarráðsfulltrúar Sjálfstæðisflokksins leggja fram svohljóðandi bókun:

    Verulegur misbrestur hefur orðið á efndum samgöngusáttmálans, svo sem endurbætt gatnamót við Bústaðaveg, við Arnarnesveg og ljósastýringar en öllum þessum mikilvægu verkefnum átti að vera lokið á þessu ári. Engar framkvæmdir eru hafnar. Þessi staða gerir það nauðsynlegt að endurmeta forsendur samgöngusáttmálans. Þá liggur fyrir að mikil aukning hefur verið í bæði hjólreiðum og notkun rafhlaupahjóla sem kallar einnig á endurmat á forsendum sáttmálans.

    Áheyrnarfulltrúi Miðflokksins leggur fram svohljóðandi bókun:

    Hér er talin upp löng runa af óskaverkefnum. Stokkar og göng, borgarlína og aftur borgarlína. Brýnasta málið sem uppi er er að auka umferðarflæði á höfuðborgarsvæðinu og minnka tafatíma með bættri ljósastýringu og var hún í forgangi í samgöngusáttmálanum. Borgarstjóri og meirihlutinn í Reykjavík leggur ofuráherslu á að skrúfa niður umferðarhraða með umferðarhindrunum og tilheyrandi auknum útblæstri. Vegagerðin, ríkið, samgönguráðherra og hin sveitarfélögin á höfuðborgarsvæðinu láta það yfir sig ganga. Freki karlinn ræður alltaf í þessu samfélagi. Það sem sagt er um ljósastýringar er þetta: „Öryggi og flæði. Vegagerðin og SSH lögðu í apríl fram aðgerðaáætlun í ljósastýringarmálum á höfuðborgarsvæðinu. Fyrirtækinu er ætlað að fjárfesta í tækjabúnaði fyrir ljóstastýringu. Taka þarf ákvörðun um hvort unnið verði áfram eftir núverandi umferðaljósakerfi eða hvort farnar verði nýjar leiðir. Unnið er að því að undirbyggja þá ákvarðanatöku. Til þess að hægt sé að taka ákvörðun þarf að liggja fyrir samanburður á kostnaði, tímalínu og árangri við báðar leiðirnar.“ Almáttugur hvað er hægt að flækja málin í þeirri einföldu ákvörðun að stilla umferðarljósin og kaupa nýjan búnað. Ljóst er að ákvörðun um að stofna Betri samgöngur ohf. leiðir af sér algjöra stöðnun í samgöngumálum í Reykjavík.

    Áheyrnarfulltrúi Flokks fólksins leggur fram svohljóðandi bókun:

    Sagt er frá störfum í stýrihópi milli ríkis og sveitarfélaganna á höfuðborgarsvæðinu í þessari skýrslu. Stýrihópurinn á að koma að stefnumótandi ábendingar  um fyrirtækið Betri samgöngur sem koma til meðferðar Alþingis og sveitarfélaganna.  Er þessu eitthvað sinnt af hálfu borgarinnar? spyr fulltrúi Flokks fólksins. Borðleggjandi er að tvöfalda þarf legginn milli Jafnasels og Rauðavatns áður eða ef  gatnamót verða gerð við Arnarnesveg. Á síðasta ári kom fram vel rökstutt gagnrýni á að Vegagerðin stýri framkvæmdum við borgarlínu því sérþekking Vegagerðarinnar liggur frekar í að koma fólki fljótt á milli staða, en borgarlínan á að bæta umhverfið og liðka til við að flytja fólk. Til margra annarra þátta þarf að líta en umferðarhraða sem Vegagerðin leggur áherslu á. Vaknað hafa upp spurningar um hvort Vegagerðin sé rétti aðilinn til að stjórna uppbyggingu borgarlínunnar. Sérþekking hennar liggur ekki í að hanna almenningssamgöngukerfi, heldur í því að hanna umferðarmannvirki svo sem mislæg gatnamót og hraðbrautir.

     

    Davíð Þorláksson, Árni M. Mathiesen og Þröstur Guðmundsson taka sæti á fundinum undir þessum lið með fjarfundarbúnaði.

    Fylgigögn

  20. Lagt fram bréf Samtaka sveitarfélaga á höfuðborgarsvæðinu, dags. 7. júlí 2021, varðandi fjármagnsskipun Betri samgangna ohf.

    Davíð Þorláksson, Árni M. Mathiesen og Þröstur Guðmundsson taka sæti á fundinum undir þessum lið með fjarfundarbúnaði. R20080082

    Fylgigögn

  21. Lagt fram svar skrifstofu borgarstjórnar, dags. 1. september 2021, við fyrirspurn áheyrnarfulltrúa Miðflokksins um kynningu varðandi minnisblað Betri samgangna vegna fjármagnsskipunar félagsins sbr. 51. lið fundargerðar borgarráðs frá 4. mars 2021. R21030058

    Áheyrnarfulltrúi Miðflokksins leggur fram svohljóðandi bókun:

    Þann 4. mars sl. lagði ég fram fyrirspurnir um fjármálaskipun Betri samgangna ohf. Lengi var beðið eftir svari og því lagði ég fram ósk í borgarráði um að fulltrúar félagsins kæmu fyrir borgarráð. Nú fimm mánuðum seinna fær borgarráð loks kynningu á fyrirbærinu. Þegar Betri samgöngur ohf. voru kynntar til sögunnar voru nokkrar væntingar bundnar við fyrirkomulagið en borgarfulltrúi Miðflokksins varaði við flóknu eignarhaldi strax í upphafi. Félagið er í eigu ríkissins og sveitafélaganna á höfuðborgarsvæðinu og er rekið sem opinbert ohf. sem er uppskrift að peningalegu svartholi sbr. önnur ohf. ríkissins. Lengi vel var látið í það skína að allar framkvæmdir á höfuðborgarsvæðinu væru inni í félaginu en á síðari stigum varð ljóst að félagið á eingöngu að sjá um fjármálahluta en ekki framkvæmdahluta framkvæmdanna. Þarna strax er komin skörun því Vegagerðin ræður för og félagið því aðeins gjaldkeri misvitra ákvarðana í samgöngumálum. Nú eru áform um rúmlega 116 milljarða áform í bættum samgöngum. Nú þegar hafa 4 starfsmenn verið ráðnir og fá verkefni farin af stað. Því má segja að stofnun félagsins séu ákveðin mistök því Reykjavíkurborg heldur því í gíslingu vegna krafna um borgarlínu og fjármálaráðherra gerði mistök þegar ákveðið var að leggja Keldnalandið blindandi inn í félagið.

    Davíð Þorláksson, Árni M. Mathiesen og Þröstur Guðmundsson taka sæti á fundinum undir þessum lið með fjarfundarbúnaði.

    Fylgigögn

  22. Lagt fram svar fjármála- og áhættustýringarsviðs, dags. 27. ágúst 2021, við fyrirspurn áheyrnarfulltrúa Flokks fólksins um áhættustefnu Reykjavíkurborgar, sbr. 35. lið fundargerðar borgarráðs frá 21. janúar 2021. R20050004

    Áheyrnarfulltrúi Flokks fólksins leggur fram svohljóðandi bókun:

    Fulltrúi Flokks fólksins spurði um áhættustefnu borgarinnar og hvort ferlið er gegnsætt og ferlið að fullu opið. Óskað var eftir að fá framlagðan gagnsæisferil þessara fyrirhuguðu áhættustefnu. Segir í svari að þann 21. janúar 2021 voru drög að áhættustefnu kynnt í borgarráði. Þann 10. júní sl. voru síðan lögð fram lokadrög að áhættustefnu Reykjavíkurborgar ásamt bréfi til borgarráðs með áhættustefnu. Vísað er til framlagðra skjala frá 10. júní sl. sem svar við þessari fyrirspurn. Allt er þetta rétt en fulltrúi Flokks fólksins sér hins vegar ekkert skrifað um gegnsæi ferilsáhættu stefnunnar í fyrri gögnum. Fulltrúi Flokks fólksins ítrekar að stefna að þessu tagi, sé hún vel og rétt úr garði gerð, er af hinu góða og gæti aukið traust borgarbúa á meirihluta borgarstjórnar. Hefði svona stefna verið til þegar endurgerð braggans var, hefði bruðl og óráðsía kannski ekki náð að þrífast.

    Fylgigögn

  23. Lagt fram svar fjármála- og áhættustýringarsviðs, dags. 27. ágúst 2021, við fyrirspurn áheyrnarfulltrúa Flokks fólksins um kostnað vegna uppfærslu á aðbúnaði í Borgartúni 12-14, sbr. 56. lið fundargerðar borgarráðs frá 30. apríl 2021. R21040322

    Áheyrnarfulltrúi Flokks fólksins leggur fram svohljóðandi bókun:

    Þessu máli var frestað á þeim forsendum að tölur væru rangar. Einu tölurnar sem leiðréttar hafa verið eru um velferðarsvið og er því þessu máli óviðkomandi. Fulltrúi Flokks fólksins veltir fyrir sér hvort mikið sé að marka þessar tölur. Vitað er að búið er að uppfæra allt og endurnýja á skrifstofum þjónustu- og nýsköpunarsviðs í Höfðatorgi. Fjármálastjóri er bara milliliður og fær tölur beint frá sviðinu. Einn lykill 5556 er settur á allt en vel gæti verið að um fleiri kostnaðarlykla sé að ræða. Það er löngu ljóst að sú stafræna umbreyting sem boðuð er með græna planinu er orðin grunsamlega umfangsmikil og þarfnast því eftirlits og rannsóknar hvað fjármálaumsýslu þessa sviðs varðar. Einnig þarf að rýna í fortíðina og skoða  ýmislegt eins og óeðlilega mikil erlend ráðgjafarkaup í næstum áratug fyrir tugi milljóna, fyrir utan alla aðra aðkeypta ráðgjöf og tilraunastarfsemi. Innri endurskoðun þarf að leggja fram ítarlega úttektaráætlun fyrir endurskoðunarnefnd undir lok árs, þar sem vonandi verða teknar ákvarðanir um að skoða mál þessa sviðs ofan í kjölinn.

    Fylgigögn

  24. Lagt fram svar skóla- og frístundasviðs, dags. 13. júlí 2021, við fyrirspurn áheyrnarfulltrúa Flokks fólksins um tillögu um styttingu opnunartíma leikskóla sbr. 52. lið fundargerðar borgarráðs frá 23. janúar 2021. R20010252

    Áheyrnarfulltrúi Flokks fólksins leggur fram svohljóðandi bókun:

    Fyrirspurnin var lögð fram í janúar 2020 sem sagt fyrir 1½ ári. Þá var uppi tillagan að stytta opnunartíma leikskóla um hálftíma með bráðabirgðaákvæðum. Svarið sem nú loks berst á því ekki lengur við. Staðan í dag er sú að skellt verður innan tíðar í lás á leikskólum kl. 16:30. Þurfi foreldrar nauðsynlega á hálftíma lengri vistun fyrir börn sín að halda eða til kl. 17:00 er barnið flutt á annan leikskóla. Almennt séð mótmælir fulltrúi Flokks fólksins skerðingu á þjónustu við foreldra og börn enda mun það hafa neikvæð áhrif á fjölmargar fjölskyldur og oft þær fjölskyldur sem hafa minnst bakland og þurfa mest á leikskólavist að halda. Skert þjónusta leikskóla eykur ekki endilega gæði samverustunda foreldra og barna heldur getur aukið álag á fjölskyldur.

    Fylgigögn

  25. Lagt fram svar endurskoðunarnefndar, dags. 23. ágúst 2021, við fyrirspurn áheyrnarfulltrúa Flokks fólksins um ummæli Einars S. Hálfdánarsonar um endurskoðunarnefnd, sbr. 29. lið fundargerðar borgarráðs frá 16. apríl 2021. R17080091

    Áheyrnarfulltrúi Flokks fólksins leggur fram svohljóðandi bókun:

    Þessi fyrirspurn Flokks fólksins er eldgömul, hún var lögð fram 16. apríl 2020 og er um ummæli Einars S. Hálfdánarsonar í Fréttablaðinu 14. apríl sama ár að „braggaskýrslunni hafi verið stungið undir stól og að það hafi ekki verið nefndinni til sóma að hafa ekki fylgt braggaskýrslunni eftir eins og endurskoðunarnefndum ber að gera þegar vart verður við mögulega sviksemi í stofnunum sem undir þær heyra“. Það er athyglisvert að rifja upp þetta mál nú tveimur árum síðar og er fulltrúi Flokks fólksins enn á því að meðvirkni hafi ríkt innan meirihlutans gagnvart braggamálinu og ríki hún enn. Sá endurskoðandi sem hér um ræðir steig fram og sagði hlutina eins og þeir voru, braggaskýrslunni var stungið undir stól og sennilega fékk hann bágt fyrir að hafa tjáð sig um málið. Umsögn endurskoðunarnefndar liggur loks fyrir nú í ágúst 2021 meira en ári síðar. Nefndinni var ekki kunnugt um fyrirspurn Flokks fólksins frá 16. apríl 2020 fyrr en nú nýlega og er beðist velvirðingar á því að hún hafi ekki verið afgreidd fyrr. Fulltrúi Flokks fólksins sér að hér hefur eitthvað misfarist í stjórnsýslunni og er ekki meira við því að segja.

    Fylgigögn

  26. Lagt fram svar fjármála- og áhættustýtingarsviðs, dags. 24. ágúst 2021, við fyrirspurn áheyrnarfulltrúa Flokks fólksins um utanlandsferðir á vegum borgarinnar sem farnar voru vegna annarra ástæðna en fundahalds, sbr. 28. lið fundargerðar borgarráðs frá 19. mars 2021. R19090305

    Áheyrnarfulltrúi Flokks fólksins leggur fram svohljóðandi bókun:

    Fulltrúi Flokks fólksins vill byrja á að gagnrýna þann langa tíma sen það tekur að fá svör við fyrirspurnum. Hér er um að ræða fyrirspurn frá miðju ári 2020. Um er að ræða framhaldsfyrirspurn um ferðir erlendis sl. tvö ár á vegum borgarinnar annarra en vegna fundarhalda. Þær voru 517. Ferðirnar voru farnar af alls 34 starfsmönnum, 8 embættismönnum og 10 borgarfulltrúum. Nokkrir fóru fleiri en eina ferð vegna funda.  Flokkur fólksins óskaði eftir að fá sundurliðun á 463 ferðum sem voru farnar vegna annarra ástæðna en fundahalds. Hversu margar ferðir voru námsferðir og í þeim tilfellum og var ekki mögulegt að stunda fjarnám? Í svari segir að ekki séu gerðar kröfum um að tilgreint sé hvort fundur eða ráðstefna hefði getað verið sótt rafrænt. Fulltrúi Flokks fólksins gagnrýnir hversu ónákvæmar skráningar eru. Bak við hverja ferð sem skráð er geta verið margir starfsmenn ef fleiri en einn eru að sækja sama viðburð. Einhver hluti þessara ferða geta verið styrktar af stéttarfélögum. Ráðstefnuferðir voru 182 á tveimur árum og skoðunar- og kynnisferðir til að skoða áhugaverða þætti eru 54. Það er augsýnilegt að eftirlit hefur verið með öllu ófullnægjandi og fyrir þann sem vill misnota þetta kerfi er leiðin greið.

    Fylgigögn

  27. Lagt fram svar fjármála- og áhættustýringarsviðs, dags. 24. ágúst 2021, við fyrirspurn áheyrnarfulltrúa Flokks fólksins varðandi niðurstöðu greiningar á stöðu aldraðra kvenna og karla í heimahjúkrun í Reykjavík, sbr. 71. lið fundargerðar borgarráðs frá 20. maí 2021. R21050232

    Áheyrnarfulltrúi Flokks fólksins leggur fram svohljóðandi bókun:

    Þetta svar og fyrri svör um kynjuð fjármál í niðurstöðu greiningar á stöðu aldraðra kvenna og karla í heimahjúkrun í Reykjavík í verkefni sem borgin vann í samvinnu við m.a. nemendur í HÍ er með ólíkindum ruglingslegt. Höfundur skýrslunnar hrósar borginni i hástert og segir að vinnubrögð borgarinnar um kynjuð fjármál séu til fyrirmyndar og að óskandi væri að fleiri sveitarfélög tileinki sér þessa aðferðafræði. En þegar spurt er um hvaða aðferðafræði verið sé að vísa í, er fátt um svör. Í svari segir að orð höfundar beri því ekki að túlka sem skoðun starfsfólks, embættisfólks eða kjörinna fulltrúa. Dæmi um ruglingslegan málflutning er þetta:  „Konur lýsa meiri þörfum en karlar“ en samt eru þær metnar með minni þörf en karlar sem vísar mögulega til þess að verið sé mismuna mati á þjónustuþörf eftir kynjum. Segir að vegna „vinnubragða/aðferðarfræði eru kynjuð fjármál að bæta konum upp mismun.“ Fulltrúi Flokks fólksins er að reyna að skilja þetta. Í lokaorðum fjármálasviðs segir svo að ekki sé hægt að sjá að höfundur komist að þeirri niðurstöðu og kynjuð fjármál bæti konum upp mismunun líkt og kemur fram í fyrirspurn áheyrnarfulltrúa Flokks fólksins.

    Fylgigögn

  28. Lagt fram svar fjármála- og áhættustýringarsviðs, dags. 11. ágúst 2021, við fyrirspurn áheyrnarfulltrúa Miðflokksins um greiðslur til ráðgjafa- og verkfræðifyrirtækisins VSÓ, sbr. 19. lið fundargerðar borgarráðs frá 5. nóvember 2020. R20110104

    Áheyrnarfulltrúi Miðflokksins leggur fram svohljóðandi bókun: 

    Óheyrilegt fjármagn hefur runnið til ráðgjafar- og verkfræðifyrirtækisins VSÓ sl. 10 ár, reyndar eins og annarra aðila á þessu sviði. Samt þenst kerfið út og skrifborðum fjölgar og fjölgar hjá borginni. Á 10 ára tímabili hefur þetta eina fyrirtæki tekið til sín rúma 2,3 milljarða og er engu líkara en fyrirtækið sé „í áskrift“ hjá Reykjavíkurborg. Getur þetta verið eðlilegt?

    Áheyrnarfulltrúi Flokks fólksins leggur fram svohljóðandi bókun:

    Greiðslur til ráðgjafa- og verkfræðifyrirtækisins VSÓ: Fram kemur að meira en  þrjú hundruð milljónir fara til þessa ráðgjafafyrirtækis árlega. Hvert sem litið er innan kerfisins má sjá ævintýralegar upphæðir sem fara til ráðgjafa- og verkfræðifyrirtækja. Sum eru á spena hjá borginni árum saman. Er þetta ekki eitthvað sem starfsmenn geta unnið að einhverju leyti?

    Fylgigögn

  29. Lagt fram svar fjármála- og áhættustýringarsviðs, dags. 23. ágúst 2021, við fyrirspurn áheyrnarfulltrúa Miðflokksins um greiðslur til verkfræðistofa frá 2008-2019, sbr. 41. lið fundargerðar borgarráðs frá 23. júlí 2020. R19110212

    Áheyrnarfulltrúi Miðflokksins leggur fram svohljóðandi bókun:

    Reykjavíkurborg og dótturfélög borgarinnar hafa greitt rúma 20 milljarða til verkfræðiskrifstofa og skyldra fyrirtækja sl. 12 ár. Ætlar einhver að segja mér að þetta séu eðlilegar upphæðir? Þegar svona miklir fjárhagslegir hagsmunir einkaaðila við Reykjavíkurborg liggja undir þá varpar það ljósi á þá þöggun sem ríkir í rekstri borgarinnar. Það þorir enginn að stíga fram og gagnrýna borgarstjóra, gjörðir hans og fjármálasukk því þá gætu viðskipti tapast. Það hjólar enginn í mjólkurkúna.

    Áheyrnarfulltrúi Flokks fólksins leggur fram svohljóðandi bókun:

    Almennt ætti borgin að sýna aðhald og hagsýni þegar samið er við verkfræðistofur um verkefni. T.d. ætti það að hafa vakið spurningu um hagkvæmni þegar verkfræðistofa er fengin til að sjá um talningar á nagladekkjum með tilheyrandi umsjónarkostnaði, verkefni sem borgin keypti þjónustu verkfræðistofu til að annast. Allir sem kunna að telja hefðu getað talið nagladekkin og haldið utan um verkefnið. Utanaðkomandi verkfræðinga þurfti ekki til.

    Fylgigögn

  30. Lögð fram að nýju tillaga borgarráðsfulltrúa Sjálfstæðisflokksins um að opnunartími leikskóla verði óskertur, sbr. 33. lið fundargerðar borgarráðs frá 4. febrúar 2021. R21020054
    Samþykkt að vísa tillögunni frá með fjórum atkvæðum borgarráðsfulltrúa Samfylkingarinnar, Viðreisnar, Pírata og Vinstri grænna gegn þremur atkvæðum borgarráðsfulltrúa Sjálfstæðisflokksins.

    Borgarráðsfulltrúar Samfylkingarinnar, Viðreisnar, Pírata og Vinstri grænna leggja fram svohljóðandi bókun:

    Tillögunni er vísað frá þar sem þegar hefur verið tekin afstaða til vinnu stýrihóps. Það hefur verið sérstakt forgangsmál meirihlutans að bæta starfsaðstæður í leikskólum, grunnskólum og frístundastarfi og tillögur um breyttan opnunartíma, breytt skipulag leikskóladagsins, nýtt úthlutunarlíkan og fleira þjóna sama markmiði. Lögð er áhersla á að viðhalda gæðum leikskólastarfsins með styttri viðverutíma barna en jafnframt er gripið til mótvægisaðgerða sem taka mið af niðurstöðum jafnréttismats. Þar verður sérstaklega komið til móts við þarfir foreldra sem eiga erfitt með að mæta styttingu opnunartíma um 15-30 mínútur á dag. Reykjavík gengur þar með lengra til móts við þarfir foreldra en gert hefur verið í öðrum sveitarfélögum sem stytt hafa opnunartíma leikskóla, s.s. Kópavogi, Akureyri, Reykjanesbæ og víðar. Um er að ræða tveggja ára tilraunaverkefni.

    Borgarráðsfulltrúar Sjálfstæðisflokksins leggja fram svohljóðandi bókun:

    Enn einu sinni fellir meirihlutinn tillögur Sjálfstæðisflokks um óskertan opnunartíma leikskólanna í Reykjavík. Sjálfstæðisflokkur leggst alfarið gegn fyrirhugaðri skerðingu og leggur áherslu á óskerta þjónustu við fjölskyldur í Reykjavík. Jafnréttismat sýnir glöggt hvernig skerðingin kemur verst niður á vinnandi mæðrum, lágtekjufólki, fólki af erlendum uppruna og þeim sem hafa lítinn sveigjanleika í starfi. Útlit er fyrir að skerðingin verði mikil afturför í jafnréttisbaráttunni. Hvað vakir fyrir jafnaðarmönnum í Reykjavík?

    Fylgigögn

  31. Lögð fram fundargerð endurskoðunarnefndar frá 23. ágúst 2021. R21010018

    Áheyrnarfulltrúi Flokks fólksins leggur fram svohljóðandi bókun:

    Liður 4: Lögð fram að nýju beiðni skrifstofu borgarstjórnar um umsögn endurskoðunarnefndar um fyrirspurn áheyrnarfulltrúa Flokks fólksins. Fyrirspurn sú sem hér er brugðist við er frá apríl 2020 og snýr að ummælum Einars S. Hálfdánarsonar endurskoðanda í endurskoðunarnefnd Reykjavíkur. Þau birtust í Fréttablaðinu 14. apríl sama ár. Þar segir hann „að braggaskýrslunni hafi verið stungið undir stól og að það hafi ekki verið nefndinni til sóma að hafa ekki fylgt braggaskýrslunni eftir eins og endurskoðunarnefndum ber að gera þegar vart verður við mögulega sviksemi í stofnunum sem undir þær heyra“. Það er athyglisvert að rifja upp þetta mál nú tveimur árum síðar og er fulltrúi Flokks fólksins enn á því að meðvirkni hafi ríkt innan meirihlutans gagnvart braggamálinu og ríki enn. Sá endurskoðandi sem hér um ræðir steig fram og tjáði sig um málið af hreinskilni og hefur sennilega fengið bágt fyrir. Bókun endurskoðunarnefndar liggur loks fyrir nú í ágúst 2021. Segir að nefndinni hafi ekki verið kunnugt um fyrirspurn Flokks fólksins frá 16. apríl 2020 fyrr en nú nýlega og er beðist velvirðingar á því að hún hafi ekki verið afgreidd fyrr. Fulltrúi Flokks fólksins sér að hér hefur eitthvað misfarist í stjórnsýslunni og er ekki meira við því að segja.

    Fylgigögn

  32. Lögð fram fundargerð fjölmenningarráðs frá 23. ágúst 2021. R21010020

    Fylgigögn

  33. Lögð fram fundargerð innkaupa- og framkvæmdaráðs frá 26. ágúst 2021. R21010004

    Fylgigögn

  34. Lögð fram fundargerð íbúaráðs Háaleitis og Bústaða frá 26. ágúst 2021. R21010028

    Fylgigögn

  35. Lögð fram fundargerð íbúaráðs Miðborgar og Hlíða frá 24. ágúst 2021. R21010031

    Fylgigögn

  36. Lögð fram fundargerð mannréttinda-, nýsköpunar- og lýðræðisráðs frá 26. ágúst 2021. R21010005

    Áheyrnarfulltrúi Flokks fólksins leggur fram svohljóðandi bókun:

    Liður 1: Tillögur stýrihóps um innleiðingu íbúaráða. Sumar tillögur stýrihópsins eru fínar. Fulltrúi Flokks fólksins leggur til að skipta ætti einnig Breiðholtinu sem er stórt hverfi, eiginlega þrjú hverfi, í tvö íbúaráð. Vandi íbúaráðanna er að þau eru ekki nægjanlega aðgengileg borgarbúum. Formenn geta í raun staðið í vegi fyrir að mál séu tekin á dagskrá. Íbúaráðin mega ekki vera eins og smækkuð útgáfa af borgarstjórn að mati fulltrúa Flokks fólksins. Íbúaráðin eiga að tengjast fólkinu og fólkið þeim. Ráðin hafa hingað til verið of pólitísk. Hugsa þarf íbúaráðin sem rödd borgarbúa og þurfa ráðin að hlusta á íbúana og taka mál inn á fundina sem óskað er eftir. Íbúaráðin ættu að fái aukna ábyrgð við mótun nærþjónustu. Íbúaráð ættu að taka afstöðu til flestra stærri mála sem hverfin snerta. Ekki ætti að setja íbúaráðum of stífar skorður eða ítarlegar reglur. Íbúaráðin eru nefnd sem samskiptaleið í drögum um lýðræðisstefnu þannig að það er mikilvægt að þau virki sem slík.

    Fylgigögn

  37. Lögð fram fundargerð menningar-, íþrótta- og tómstundaráðs frá 23. ágúst 2021. R21010006

    Áheyrnarfulltrúi Flokks fólksins leggur fram svohljóðandi bókun:

    Liður 9: Tillaga Flokks fólksins að koma upp tennisvelli í nýju íþróttabyggingunni í Úlfarsárdal hlaut ekki hljómgrunn meirihlutans í ráðinu. Fulltrúi Flokks fólksins hefði viljað sjá betri rök fyrir höfnun þessarar tillögu. Ekki er séð af hverju ekki megi skoða málið. Fulltrúi Flokks fólksins vill að rætt sé við áhugasama og aðra tengda aðila og að skýrari svör verði lögð fram en aðeins að er sagt að „ekki er grundvöllur að koma fyrir tennisvelli í núverandi íþróttabyggingum í Úlfarsárdal eða á núverandi íþróttasvæði.“ Þetta er með öllu ófullnægjandi afgreiðsla að mati fulltrúa Flokks fólksins.

    Fylgigögn

  38. Lögð fram fundargerð neyðarstjórnar Reykjavíkurborgar frá 20. ágúst 2021. R21010069

    Fylgigögn

  39. Lögð fram fundargerð skipulags- og samgönguráðs frá 1. september 2021. R21010008
    B-hluti fundargerðarinnar er samþykktur.

    Fylgigögn

  40. Lögð fram fundargerð skóla- og frístundaráðs frá 24. ágúst 2021. R21010007

    Fylgigögn

  41. Lögð fram fundargerð stjórnar Orkuveitu Reykjavíkur frá 23. ágúst 2021. R21010015

    Fylgigögn

  42. Lagt fram bréf skrifstofu borgarstjórnar, dags. í dag, yfir embættisafgreiðslur erinda sem borist hafa borgarráði, alls 9 mál. R21080190

    Fylgigögn

  43. Lagt fram yfirlit skrifstofu borgarstjórnar, dags. í dag, yfir umsagnir um rekstrarleyfisumsóknir veitinga- og gististaða sem veittar hafa verið skv. heimild í viðauka 2.1 við samþykkt um stjórn Reykjavíkurborgar og fundarsköp borgarstjórnar nr. 1020/2019. R21080191

    -    Kl. 12:03 víkja borgarstjóri og Hildur Björnsdóttir af fundinum.

    Fylgigögn

  44. Áheyrnarfulltrúi Sósíalistaflokks Íslands leggur fram svohljóðandi fyrirspurn:

    Í stefnu í íþróttamálum kemur fram að keiluíþróttin hafi haft aðstöðu í Keiluhöllinni Egilshöll. Þar stendur að nokkur óánægja hafi verið með þá aðstöðu, aðallega vegna sambýlis við almenning. Fram hafa komið hugmyndir um keiluaðstöðu í íþróttamannvirkjum í Suður-Mjódd, í viðbyggingu við Skautahöllina eða í sér keilusal annarsstaðar í borginni. Þá liggja fyrir hugmyndir um byggingu keilusalar í nýju hóteli við KEX hostel við Skúlagötu. Fulltrúi sósíalista spyr hvernig gangi að byggja upp aðstöðu til keiluiðkunar fyrir þau sem æfa keilu og fyrir félög sem stunda keilu. Hvar mun það þá byggjast upp? Mikilvægt er að keiluaðstaða nýtist vel þeim sem æfa keilu og mæti þörfum fatlaðra einstaklinga sem æfa keilu og fulltrúi sósíalista spyr því út í uppbyggingu og hvernig henni miði fram. Einnig spyr fullltrúi sósíalista út í það hvort standi til að fjölga stöðum til keiluiðkunnar svo að þær henti fjölbreyttum þörfum fólks en miðað við stöðuna í dag er t.a.m. erfitt fyrir fólk með flogaveiki að æfa keilu þar sem blikkljós eru reglulega í núverandi keiluaðstöðu, þar sem áherslan er á veislustemmningu frekar en æfingaumhverfi og hefur því truflandi áhrif á margt fólk. R21090019

    Vísað til meðferðar menningar-, íþrótta- og tómstundaráðs.

  45. Áheyrnarfulltrúi Miðflokksins leggur fram svohljóðandi fyrirspurn:

    Eitt af stefnumálum meirihlutans á þessu kjörtímabili var að koma upp ungbarnaleikskólum. Nú er kominn vísir að þeim en gjaldskráin vekur athygli þar sem gjald fyrir eins árs barn er um 90.000 kr. en gjaldið fyrir eldri börn er um 35.000 kr. 1. Hverjar eru ástæður þess að gjaldskrá ungbarnaleikskóla er svo há miðað við þá leikskóla sem þegar eru til staðar fyrir eldri börn? 2. Hvað leggur borgin til mikið fjármagn með hverju barni hjá dagforeldrum? R21090015

    Vísað til meðferðar skóla- og frístundaráðs.

  46. Áheyrnarfulltrúi Miðflokksins leggur fram svohljóðandi fyrirspurn:

    Afskriftartími fasteigna í opinbera geiranum er 50 ár og því eiga 2% af virði eignanna að fara í viðhald á ári. Innri leiga Fossvogsskóla hefði því átt að nema a.m.k. þessari fjárhæð á hverju ári. Fasteignamat skólans samkvæmt álagningu fyrir árið 2022 nam rúmum 1,3 milljarði og því hefði átt að ráðstafa 26-30 milljónum á ári í viðhald. 1. Hver hefur innri leiga Fossvogsskóla verið sl. 20 ár sundurliðað eftir árum? 2. Hvað hafa háar fjárhæðir runnið til viðhalds Fossvogsskóla undanfarin 20 ár sundurliðað eftir árum? Óskað er eftir að borgarráð fái viðhaldssögu Fossvogsskóla samhliða svörum við þessum spurningum. R21090017

    Vísað til umsagnar fjármála- og áhættustýringarsviðs.

  47. Áheyrnarfulltrúi Flokks fólksins leggur fram svohljóðandi fyrirspurn:

    Fyrirspurn frá Flokki Fólksins um stafrænt samstarf við Stafræna Ísland, island.is. Fram kom á ráðstefnunni Tengjum ríkið að slíkt samstarf standi sveitarfélögum til boða. Fulltrúi Flokks fólksins spyr hvort ekki hefði verið skilvirkara og hagkvæmara ef Reykjavíkurborg hefði leitað samstarfs við island.is líkt og mörg sveitarfélög og stofnanir á Íslandi gera með góðum árangri. Gríðarlegar upphæðir, 10 milljarðar á þremur árum, fara í stafræn verkefni, mest tilraunir, lítið sést af afurðum. Til að átta sig á stærðarhlutföllunum má taka dæmi, þá jafngildir þetta því að setja 330 milljónir í áþekkt verkefni í Borgarbyggð en Reykjavík er um 30 sinnum fjölmennari. Til dæmis hefur komið fram að hægt er að nota island.is fyrir mínar síður. Á island.is eru 74 mínar síður og 240 vefir. Þar er verið að hanna, búa til ímyndir og vörumerki. Fulltrúi Flokks fólksins spyr: af hverju hefur þjónustu- og nýsköpunarsvið ekki samnýtt afurðir úr þróun Stafræns Íslands? Island.is hjálpar stofnunum og fyrirtækjum að veita betri þjónustu. Þar eru búnar til stofnanasíður til að styðja við sveitarfélög. Island.is á allt til, þar er til sniðmát fyrir allt sem þarf, allur grunnur er til staðar. Miðlæg þjónustugátt er mikilvæg og í henni á Reykjavík að vera. R21090010

    Vísað til meðferðar mannréttinda-, nýsköpunar og lýðræðisráðs.

Fundi slitið klukkan 12:08

Þórdís Lóa Þórhallsdóttir Heiða Björg Hilmisdóttir

Dóra Björt Guðjónsdóttir Hildur Björnsdóttir

Líf Magneudóttir