Viltu fá rafreiðhjól lánað í sumar? | Reykjavíkurborg

Viltu fá rafreiðhjól lánað í sumar?

fimmtudagur, 15. mars 2018

Reykjavíkurborg ætlar í sumar að lána áhugasömum einstaklingum rafreiðhjól í 5 – 6 vikur til að komast ferða sinna.  Með þessu framtaki vill borgin hvetja fólk til umhverfisvænni ferðavenja.

  • Rafreiðhjól létta stigið
    Rafreiðhjól létta stigið
  • Skoða á sérstaklega ferðahegðun til og frá vinnu
    Skoða á sérstaklega ferðahegðun til og frá vinnu

Í boði verða 25 reiðhjól og fær fyrsti hópurinn þau afhent um miðjan apríl. Þau sem verða svo lánsöm að fá rafhjól til afnota í sumar undirgangast þá skyldu að svara spurningum sem varpa ljósi á ferðahegðun og þarfir rafreiðhjólafólks. Einnig er skylda að nota hjólin til að komast til og frá vinnu þrisvar sinnum í viku hið minnsta. Alls stendur 100 manns til boða að taka þátt í þessu tilraunaverkefni.

„Við viljum fá mynd af því hvort rafreiðhjól hjálpi fólki að breyta um lífsstíl,“ segir Kristinn J. Eysteinsson verkefnisstjóri hjá umhverfis- og skipulagssviði Reykjavíkurborgar. Hann segir að rafhjólin henti mörgum til að fara til vinnu og létti stigið í mótvindi og upp brekkur, auk þess sem margir velji þau frekar til að hjóla í vinnu þar sem síður þarf að fara í sturtu eftir hjólatúrinn.  Kostirnir séu margir við rafreiðhjólin en hins vegar vilji borgin einnig fá mynd af þeim vandkvæðum sem upp kunna að koma til að geta gert nauðsynlegar úrbætur ef fleiri velja þennan ferðamáta.

Á vef Reykjavíkurborgar er nánari lýsing á verkefninu og umsóknarform fyrir áhugasama >  www.reykjavik.is/rafhjol