Leikirnir á Heimsmeistaramótinu í knattspyrnu í Rússlandi verða sýndir á risaskjám í Hljómskálagarðinum og Ingólfstorgi í sumar. Þetta var tilkynnt á blaðamannafundi sem KSÍ og stuðningsaðilar héldu í Hljómskálanum í hádeginu.
Útsendingar frá Heimsmeistaramótinu í knattspyrnu munu fara fram á risaskjám í Hljómskálagarðinum og á Ingólfstorgi í sumar. Leikir Íslands verða sýndir í Hljómskálagarðinum en allir leikir mótsins á Ingólfstorgi.
"Reykjavíkurborg býður alla velkomna að fylgjast með leikjunum og upplifa einstaka stemningu í fallegu umhverfi og góðri aðstöðu. HM er risaviðburður og við erum stolt af því að geta boðið öllum landsmönnum jafnt sem erlendum gestum upp á þennan möguleika," sagði Dagur B. Eggertsson borgarstjóri.
Hljómskálagarðurinn og Ingólfstorg verða því hin opinberu HM torg í sumar. Þetta var meðal þess sem fram kom á blaðamannafundi í Hljómskálanum í dag þar sem KSÍ og bakhjarlar þeirra ásamt Reykjavíkurborg kynntu áformin. Þá mun RÚV verða með útsendingar frá HM torgi og með umfangsmikla aðstöðu á staðnum.
"Knattspyrnuhátíðin í miðborginni heldur áfram þetta sumarið og nú tekur HM-torgið við af EM-torgum síðustu ára. Það er auðvitað mikið gleðiefni að við séum í þeirri stöðu á hverju ári að bjóða til annarrar eins knattspyrnuveislu. Samstarf KSÍ, Reykjavíkurborgar og bakhjarla KSÍ hefur verið öflugt og reynsla síðustu ára mun gera okkur kleift að gera enn betur í sumar," sagði Guðni Bergsson formaður KSÍ
Einstök stemning myndaðist á Arnarhóli fyrir tveimur árum þegar strákarnir kepptu á Evrópumótinu í knattspyrnu en til þess að geta tekið á móti þessum fjölda fólks var talið heppilegra að vera í Hljómskálagarðinum með tilliti til stærðar og umhverfis, aðkomu og aðgengismála. Á meðfylgjandi mynd má sjá hvernig skipulagi verður háttað í garðinum á meðan útsendingum stendur en þar er m.a. gert ráð fyrir leiktækjum fyrir börn og veitingaaðstöðu.
Bakhjarlar Knattspyrnusambandsins eru N1, Advania, Landsbankinn, Coca Cola, Vodafone og Icelandair
Leikir Íslands verða gegn Argentínu í Moskvu þann 16. júní, gegn Nígeríu í Volgograd 22. júní og Króatíu í Rostov 26. júní.
Fari svo að Ísland komist upp úr riðlinum verða þeir leikir jafnframt sýndir í Hljómskálagarðinum. Talsvert mörg bílastæði eru hinum megin Hringbrautar auk þess sem Hljómskálagarðurinn er ágætlega tengdur göngu- og hjólastígum borgarinnar.