Helgi Grímsson, sviðsstjóri skóla- og frístundasviðs skrifaði undir samning við Pólska skólann og samtökin Móðurmál, á dögunum, sem gerir móðurmálskennslu á þeirra vegum gjaldfrjálsa fyrir börn í Reykjavík. Katarzyna Rabeta skrifaði undir fyrir hönd Pólska skólann og Renata Emilsson Pesková fyrir Móðurmál sem eru samtök um tvítyngi.
Geta nýtt frístundastyrkinn í annað
Með samningnum eykst stuðningur við Móðurmál og Pólska skólann svo að þeirra mikilvæga kennsla verði endurgjaldslaus fyrir börn og fjölskyldur þeirra. Þannig verði tryggt aðgengi að móðurmálskennslu án tillits til efnahags og stuðlað að því að börn geti fengið kennslu í sínu móðurmáli án þess að nýta sinn frístundastyrk. Um leið gefst tækifæri til að nýta frístundastyrkinn í aðrar frístundir sem er mikilvægt og nauðsynlegt öllum börnum.
Reykjavíkurborg mun greiða gjöld barna, á aldrinum þriggja til sextán ára, með lögheimili í Reykjavík sem stunda nám í sínu móðurmáli. Greiddar verða 20 þúsund krónur fyrir hvern nemanda hjá Samtökunum móðurmál. Miðað er við að nemendurnir verði að hámarki 350 talsins og fjárhæðin að hámarki sjö milljónir. Í Pólska skólanum er miðað við 100 þúsund krónur á hvern nemanda en að hámarki fyrir 180 nemendur, þannig að hámarksupphæðin nemi 18 milljónum króna. Ástæðan fyrir hærri styrk til handa Pólska skólanum liggur í fjölda kennslustunda fyrir hvern nemenda.
Samþykktu viðbótarfjármagn fyrir kennsluna
Borgarráð samþykkti samninginn á fundi 19. október síðastliðinn sem og að veita auka fjármagn vegna þessa þar sem ekki er gert ráð fyrir kostnaðinum í fjárhagsramma skóla- og frístundasviðs. Samningurinn gildir þetta skólaár og er viðbótarskref í að styðja við móðurmálskennslu barna með fjölbreyttan tungumála bakgrunn. Fram að þessu hafa bæði Pólski skólinn og Móðurmál þurft að reiða sig á staka styrki. Reykjavíkurborg hefur fram að þessu stutt vel við kennsluna með því að útvega húsnæði fyrir kennsluna og í formi styrkja.
Á myndinni eru fulltrúar Móðurmáls, Pólska skólans, skóla- og frístundasviðs Reykjavíkur og þar á meðal starfsfólk Miðju og læsis.