Borgarstjóri kallar eftir húsnæðissáttmála fyrir höfuðborgarsvæðið.
Dagur B. Eggertsson borgarstjóri kynnti áform Reykjavíkurborgar um tvöföldun á lóðaframboði í borginni á hverju ári næstu fimm ár á opnum fundi um húsnæðismál í Ráðhúsi Reykjavíkur í morgun. Borgarstjóri kallaði þar eftir húsnæðissáttmála fyrir höfuðborgarsvæðið í anda samgöngusáttmálans. Þetta er meðal þess sem fram kom á opnum fundi um húsnæðismál í Reykjavík undir yfirskriftinni Áratugur Reykjavíkur í uppbyggingu íbúðarhúsnæðis.
Þar kynntu fjölmargir aðilar áform sín um stórfellda uppbyggingu, m.a. einkaaðilar og fulltrúar óhagnaðardrifinna félaga sem hafa byggt hundruð íbúða á liðnum árum og eru að fara af stað með mikla uppbyggingu á næstu misserum.
Tvöföldun á lóðaframboði í Reykjavík er sett fram í ljósi þess skorts sem nú er á nýjum eignum á húsnæðismarkaði og er í takti við breytt mat Húsnæðis- og mannvirkjastofnunar um þörf á fjölda íbúða. Stofnunin hefur metið þarfir markaðarins um 3.500-4.000 íbúðir á ári á öllu landinu. Með tvöföldun myndi hlutur Reykjavíkur í uppbyggingu á landinu vaxa frá því að vera þriðjungur í að verða að minnsta kosti helmingur uppbyggingar.
Framboð aukið í tvö þúsund íbúðir á ári
Dagur B. Eggertsson borgarstjóri segir þessa tvöföldun á lóðaframboði nema meira en helmingi þess húsnæðis sem þörf er fyrir á landinu hverju sinni. „Þarna erum við að tvöfalda framboð þeirra íbúða sem fer í byggingu úr 1.000 íbúðum á ári í yfir 2.000. Borgin hefur þegar samþykkt skipulag sem mætir þessum markmiðum á þessu ári og því næsta og birt áætlanir um næstu lóðaúthlutanir. Þetta eru skýr skilaboð út á markaðinn og þótt Reykjavík hafi dregið vagninn í uppbyggingu íbúða undanfarin fimm ár þá ætlum við okkur enn stærri hlut og hvetjum önnur sveitarfélög til þess sama. Fjármálastofnanir og byggingariðnaðurinn þurfa einnig að gera sitt. Þetta er risastórt samfélagslegt verkefni. Borgin hefur tryggt að hluti þessarar uppbyggingar sé óhagnaðardrifin og á viðráðanlegu verði. Bæði með verkefnum fyrir ungt fólk og fyrstu kaupendur en líka stórfjölgun leiguíbúða í samvinnu við Bjarg, íbúðafélag verkalýðshreyfingarinnar, stúdenta og félög sem byggja í þágu aldraðra. Það er hins vegar ekki nóg að bara Reykjavík sé að stórauka framboð öruggra íbúða frá óhagnaðardrifnum félögum og félagslegum íbúðum. Húsnæðismálin þarf að nálgast heildstætt og til lengri tíma. Það er ekki gott fyrir neinn að íbúðamarkaðurinn sé eins sveiflukenndur og hann hefur verið undanfarið. Ég kalla því eftir því að gerður verði húsnæðissáttmáli ríkis, sveitarfélaga og aðila vinnumarkaðarins, eins og gert var með samgönguinnviðina sem kallast samgöngusáttmáli. Í húsnæðissáttmála myndi koma fram áætlun um alla húsnæðisuppbyggingu til lengri tíma, fjallað um staðsetningu í tengslum við trausta innviði, hvort sem fjármögnun væri af hálfu ríkis, sveitarfélag eða einkaaðila. Lykilatriði í þessu samhengi er að tryggja að hluti uppbyggingarinnar verði fyrir þá hópa sem eiga erfiðast að ná endum saman og fjármagna uppbyggingu leiguíbúða fyrir alla aldurshópa og búseturéttaríbúða - að ógleymdum íbúðum fyrir ungt fólk og fyrstu kaupendur,“ segir Dagur B. Eggertsson borgarstjóri.
Áratugur Reykjavíkur í uppbyggingu íbúðahúsnæðis
