Karen María Jónsdóttir forstöðumaður Höfuðborgarstofu | Reykjavíkurborg

Karen María Jónsdóttir forstöðumaður Höfuðborgarstofu

þriðjudagur, 6. nóvember 2018

Karen María Jónsdóttir hefur verið settur forstöðumaður Höfuðborgarstofu. Höfuðborgarstofa ber ábyrgð á verkefnum tengdum ferðamálum og fylgir eftir ferðamálastefnu Reykjavíkurborgar.

  • Karen María Jónsdóttir, forstöðumaður Höfuðborgarstofu
    Karen María Jónsdóttir, forstöðumaður Höfuðborgarstofu

Karen María hefur verið deildarstjóri Upplýsingamiðstöðvar ferðamanna í Reykjavík (UMFR) í á þriðja ár en UMFR var lögð niður nú um mánaðamótin. Í staðinn verður lögð aukin áhersla á upplýsingamiðlun á rafrænu formi. Þar áður var Karen María verkefnastjóri viðburða hjá Höfuðborgarstofu í á fimmta ár. Hún er ráðin í starf forstöðumanns Höfuðborgarstofu tímabundið, fram á næsta haust, eða þar til liggur fyrir ný ferðamálastefna og útfærsla á henni.

Karen María er með diplóma á meistarastigi í opinberri stjórnsýslu og meistaragráðu í stjórnun stofnana frá Háskóla Íslands, meistaragráðu í leikhúsfræðum og meistaragráðu í þverfaglegri listgreinakennslu frá Háskólanum í Amsterdam og BA gráðu í listdansi frá ArtEZ listaháskólanum í Arnhem.

Höfuðborgarstofa, sem heyrir undir menningar- og ferðamálasvið Reykjavíkurborgar, styður við markaðssetningu höfuðborgarsvæðisins gagnvart erlendum ferðamönnum, heldur utan um Gestakort Reykjavíkur og miðlar upplýsingum um menningu og afþreyingu í gegnum rafræna miðla. Hlutverk Höfuðborgarstofu felst auk þess í því að stuðla að góðu samstarfi við ferðaþjónustu í borginni, aðra rekstraraðila og íbúa. Innan borgarinnar er nú unnið að nýrri ferðamálastefnu fyrir Reykjavíkurborg sem mun líta dagsins ljós næsta vor.

Karen María Jónsdóttir hefur þegar tekið til starfa.