Bjarki Karlsson hlýtur Bókmenntaverðlaun Tómasar Guðmundssonar | Reykjavíkurborg

Bjarki Karlsson hlýtur Bókmenntaverðlaun Tómasar Guðmundssonar

föstudagur, 11. október 2013

Bjarki Karlsson hlaut Bókmenntaverðlaun Tómasar Guðmundssonar árið 2013 fyrir ljóðahandritið Árleysi alda. Elsa Hrafnhildur Yeoman forseti borgarstjórnar afhenti Bjarka Verðlaunin við hátíðlega athöfn í Höfða í gær. Verðlaunin nema 600 þúsund krónum og árituðu viðurkenningarskjali frá borgarstjóra. Fyrstu eintök af bókinni komu um leið úr prentun í útgáfu Uppheima.

  • Elsa Yeoman forseti borgarstjórnar og Bjarki Karlsson verðlaunahafi að lokinni verðlaunaathöfninni í Höfða í gær.
    Elsa Yeoman forseti borgarstjórnar og Bjarki Karlsson verðlaunahafi að lokinni verðlaunaathöfninni í Höfða í gær.

Bjarki Karlsson hlaut í Höfða í dag Bókmenntaverðlaun Tómasar Guðmundssonar árið 2013 fyrir ljóðahandritið Árleysi alda. Elsa Hrafnhildur Yeoman forseti borgarstjórnar veitti verðlaunin sem nema 600 þúsund krónum og árituðu viðurkenningarskjali frá borgarstjóra. Fyrstu eintök af bókinni komu um leið úr prentun í útgáfu Uppheima.

Bjarki Karlsson er doktorsnemi í íslenskri íslenskri málfræði og bragfræði við Háskóla Íslands. Rannsóknarsjóður Háskóla Íslands styrkir rannsóknina Bundið mál á vestur-norrænu málsvæði á síðari öldum og Stofnun Árna Magnússonar í íslenskum fræðum veitir honum  vinnuaðstöðu. Bjarki lauk M.A. gráðu í íslenskum fræðum við Hugvísindadeild Háskóla Íslands 2007 og B.A. gráðu í íslensku og almennum málvísindum við HÍ 2005. Árið 1987 varð hann kerfisfræðingur frá Niels Brock-skólanum í Kaupmannahöfn. Bjarki er formaður Óðfræðifélagsins Boðnar, situr í stjórn Ásatrúarfélagsins og í stjórn Málvísindastofnunar Háskóla Íslands. Bjarki hlaut vefverðlaun ÍMARKs og Vefsýnar fyrir besta einstaklingsvefurinn árið 2002.  Á vefnum voru helstu fréttir hvers dags endurskrifaðar í bundnu máli og endurtúlkaðar frjálslega. 

Í umsögn dómnefndar segir m.a. : ,,Verðlaunahandritið árið 2013 er óvenju vel heppnuð blanda af húmor, fornum bragarháttum og samfélagsádeilu. … Handritið snýst í rauninni í kringum leik með gamla bragarhætti og tilfinningin er sú að hin mikla þekking sem höfundur hefur á þeim hafi knúið hann til að nota þá – og ekki síst miðla þeim til yngri eyrna; hann tekur sér stöðu eins og hirðskáld eða höfuðskáld til forna og yrkir um samtíma sinn á fjölbreytilegan hátt. Það er allan tímann skýrt að höfundur hefur framúrskarandi vald á bragarháttunum og hefur náð að flétta það vald saman við skarpa samfélagsádeilu og slynga orðaleiki sem gefa handritinu öllu einstakt gildi og dýpt.  Aukinheldur á sér stað í handritinu lífleg endurvinnsla á menningararfinum og endurvinnsla á hugmyndum okkar um þjóðskáldin og yrkisefni þeirra. …Hér er ort af mikilli íþrótt, metnaði og einurð, en þó er leikurinn með tungumálið, kenningar og arfinn alltaf svo mikill að unun er að lesa.“

Alls bárust 46 handrit að þessu sinni. Í dómefnd sátu Sigurbjörg Þrastardóttir, Ragnhildur Pála Ófeigsdóttir og Davíð Stefánsson formaður nefndarinnar.