Skóla- og frístundaráð samþykkti á fundi sínum í dag að setja á laggirnar tvö teymi til að bregðast við manneklu í leikskólum og frístundaheimilum borgarinnar.
Hlutverk aðgerðarteymanna verður að móta tillögur um aðgerðir til að bæta stöðuna í ráðningarmálum og styrkja vinnuumhverfi starfsfólks leikskóla og frístundar.
Teymi vegna manneklu í leikskólum mun m.a. greina fram komnar tillögur frá leikskólastjórum og kostnað við þær svo og að leggja fram tillögur að aðgerðum sem hægt verði að ráðast í á næstu vikum með það að markmiði að styðja við starfsmannahaldið í leikskólunum. Teymið verður skipað sérfræðingum á skrifstofu skóla- og frístundasviðs og tveimur leikskólastjórum og á að skila tillögum eigi síðar en 25. september nk.
Teymi vegna manneklu á frístundaheimilum á að móta tillögur um aðgerðir til að bæta stöðuna í ráðningarmálum í frístundastarfi borgarinnar. Það á einnig að leggja fram tillögur um viðbrögð og aðgerðir sem hægt verði að ráðast í á næstu vikum með það að markmiði að styðja við starfsmannahald í frístundaheimilum og sértækum félagsmiðstöðvum.
Staðan í ráðningarmálum
Enn er óráðið í 96 stöðugildi í leikskólum borgarinnar, 8 stöðugildi í grunnskólum og 89 í frístundaheimilum/ sértækum félagsmiðstöðvum og eru það flest hálfar stöður.
60 leikskólakennara vantar inn í leikskólana, þar af 5 í stöðu deildarstjóra. Þá er óráðið í 18 stöður stuðningsfulltrúa. Í liðinni viku vantaði 11 deildarstjóra, 55 leikskólakennara og 20 stuðningsfulltrúa. 23 leikskólar af 64 eru fullmannaðir, í 26 leikskóla vantar fólk í 0,5 – 2,5 stöður og í 14 leikskólum er óráðið í 3-6 stöður.
Staðan í 36 grunnskólum borgarinnar er til muna betri. Í þá á einungis eftir að ráða 2-3 kennara, 5 stuðningsfulltrúa, einn skólaliða og einn starfsmann í mötuneyti.
Í frístundaheimili/sértækar félagsmiðstöðvar vantar 173 starfsmenn í tæplega 89 stöðugildi, þar af 55 starfsmenn í störf með fötluðum börnum og ungmennum. Yfirleitt er um 50% störf að ræða. Sex frístundaheimili eru fullmönnuð, í 29 vantar 1-4 starfsmenn og í fjögur vantar fimm eða fleiri starfsmenn.
Þann 6. september hafði verið sótt um dvöl á frístundaheimilum fyrir 4.468 börn, af þeim eru 3.569 komin með fulla vistun. Börn með sérþarfir og yngstu skólabörnin njóta forgangs en önnur eru tekin inn í samræmi við umsóknartíma. Á biðlista eru 834 börn, en umsóknum fjölgaði um rösklega 200 eftir að skólastarf hófst 22. ágúst. Öll börn, sem sótt hefur verið um fyrir í sértækt félagsmiðstöðvarstarf, eru komin með hlutavistun 3-4 daga í viku.
Á sama tíma í fyrra var ómannað í rúm 70,5 stöðugildi í leikskólunum og 64 stöðugildi í frístundaheimilunum/sértækum félagsmiðstöðvum eða um 125 starfsmenn í hlutastörf og voru þá 413 börn á biðlista.
Ráðningar standa yfir þessa dagana og staðan breytist því dag frá degi.