English translation
Hi! The English site is only a beta for now and still has many errors (especially in names and locations).
We are working hard to fix them and making more content available than ever before so expect constant updates.
Nær þrjú hundruð leikskóla- og grunnskólabörn gengu fylktu liði frá Hallgrímskirkju og niður í Ráðhús Reykjavíkur í dag til að minna á réttindi sín samkvæmt Barnasáttmála Sameinuðu þjóðanna sem er 24 ára um þessar myndir.
Frístundamiðstöðvin Kampur skipulagði gönguna á afmælisdegi Barnasáttmálans og tóku börn úr 1. bekk Austurbæjarskóla og Háteigsskóla, leikskólanum Miðborg og frístundaheimilunum Draumalandi, Eldflauginni og Halastjörnunni þátt í göngunni.
Börnin vissu vel af réttindum sínum og báru þau kröfuspjöld með áletrunum úr ákvæðum Barnasáttmálans, s.s. öll börn eiga rétt á að eiga nafn og búa við frið.
Jón Gnarr borgarstjóri tók á móti börnunum þegar þau komu í Ráðhús Reykjavíkur þar sem göngunni lauk og veitingar biðu þeirra. Börnin færðu borgarstjóra myndverk að gjöf og sungu fyrir hann baráttusöngva sem orðið hafa til á frístundaheimilunum á undanförnum vikum.
Á hverju ári vinna börn á þessum frístundaheimilum með Barnasáttmála Sameinuðu þjóðanna, þar sem þeim eru kynnt grunnréttindi sín í gegnum listir og leik.
Dagana 21.-24.nóvember verður sýning í anddyri Borgarbókasafns með verkefnum úr þemavinnu barnanna.