Tvær tillögur unnu til verðlauna í hugmyndasamkeppni um skipulag Vogabyggðar í Reykjavík, en það er landsvæðið í kringum Elliðavog. Úrslitin voru tilkynnt við hátíðlega athöfn í Höfðatorgi í dag. Teiknistofan Tröð og jvantspijker + FELIXX frá Hollandi áttu vinningstillögurnar og hlutu 500.000 hvor í verðlaun.
Hugmyndasamkeppnin gekk út á að útfæra hugmyndir og tillögur að skipulagi svæðisins í samræmi við markmið Aðalskipulags Reykjavíkur 2010–2030 þar sem gert er ráð fyrir nýrri blandaðri og vistvænni byggð íbúða og atvinnuhúsnæðis á svæðinu. Alls voru fimm tillögur í úrslitum í keppninni sem Reykjavíkurborg hélt í samstarfi við Arkitektafélag Íslands og Hömlur ehf.
Dómnefnd valdi tvær tillögur og segir í niðurstöðu dómnefndar að þær nálgist verkefnið á ólíkan hátt en vegi hvor aðra upp á spennandi hátt.
Tillögu jvantspijker + FELIXX (nr. 3) telur dómnefndin að sé áræðin og frumleg. „Samgöngukerfi hverfishlutans er vel leyst og tenging Súðarvogs við Dugguvog er sannfærandi. Sameinaðar eru þær megin akstursleiðir gegnum hverfið. Nýtt miðlægt torg sem býður upp á sterka hverfismiðju er annarsvegar skemmtilega tengt göngu- og hjólabrú yfir Sæbraut og hinsvegar göngubrú yfir Naustavog leiðin tengist þannig aðalleið að skóla. Feiknarlega vel unnin tillaga og skemmtileg. „
Tillögu Teiknistofunnar Traðar (nr. 5) telur dómnefndin að sé jarðbundin og raunsæ. „Tillagan byggir á skýrri landnotkun með atvinnuhúsnæði við Sæbraut, því næst blandaðri byggð sem nær yfir Súðavog og austast íbúðabyggð að Naustavogi. Byggðin er 3-5 hæða. Núverandi gatnakerfi er lagt til grundvallar og Súðavogur er megin ásinn í norður-suður. Dugguvogur og Súðavogur halda sér að mestu og þvergötur frá Súðavogi liggja niður að strandgönguleið. Tillagan er vel unnin og skýr, bæði í framsetningu og hugsun.“
Dómnefndin telur að saman gefi tillögurnar svo áhugaverða framtíðarsýn á svæðið að ákveðið var að velja þær báðar sem verðlaunatillögur.
Á vef Reykjavíkurborgar má sjá allar tillögurnar:
http://reykjavik.is/frettir/tillogur-ur-hugmyndasamkeppni-um-vogabyggd-til-synis