Heilbrigðiseftirlit Reykjavíkur mælir gegn sjósundi á baðstaðnum í Nauthólsvík vegna hugsanlegrar gerlamengunar frá dælustöðinni í Faxaskjóli í dag og á morgun.
Enn stendur yfir viðgerð í dælustöðinni við Faxaskjól en samkvæmt Veitum ohf. er áætlað að henni ljúki í dag sjá nánar. Heilbrigðiseftirlit Reykjavíkur hefur tekið sýni á völdum stöðum í nágrenni dælustöðvarinnar meðan á viðgerð hefur staðið. Niðurstöður sem bárust Heilbrigðiseftirlitinu í dag 27. nóvember vegna sýna sem tekin voru 24. nóvember, sýna hækkun á gerlamagni í nágrenni dælustöðvarinnar eins og við var að búast. Þann dag sýndu sýnin einnig nokkra hækkun á gerlamagni á baðstaðnum í Nauthólsvík. Aðstæður við sýnatöku þann 24. nóvember voru óhagstæðar veðurfarslega, m.a. mikið upprót sjávar og mikið af fugli á sýnatökustöðum. Ekki er hægt að staðfesta orsök tilfallandi mengunar í Nauthólsvík þennan dag. Heilbrigðiseftirlit Reykjavíkur mælir því ekki með sjósundi í Fossvogi í dag og á morgun þó að aðstæður núna séu ágætar, lygnt og bjart.
Sýni verða tekin aftur í dag.
Hægt er að fylgjast með upplýsingum hér
Athugið að endanlegar niðurstöður liggja fyrir tveimur til þremur sólarhringum eftir sýnatöku.