Lóð í miðborginni boðin til sölu

mánudagur, 26. maí 2014

Reykjavíkurborg leitar eftir kauptilboðum í byggingarrétt fyrir atvinnuhúsnæði og íbúðarhús á lóðinni Tryggvagötu 13. Hugmyndasamkeppni verður um útlit hússins og borgartorgs framan við bygginguna.  

  • Úr deiliskipulagi.
    Úr deiliskipulagi. Tryggvagata 13 og 15.
  • Hugmynd að útliti vegna Tryggvagötu 13 - Horft í austur.
    Hugmynd að útliti vegna Tryggvagötu 13 - Horft í austur.
  • Hugmynd að útliti vegna Tryggvagötu 13.
    Hugmynd að útliti vegna Tryggvagötu 13 - Horft í vestur.
  • Hugmynd að útliti vegna Tryggvagötu 13.
    Hugmynd að útliti vegna Tryggvagötu 13 og viðbyggingar við Tryggvagötu 15.

Heimilt er að reisa hús fyrir íbúðir með atvinnuhúsnæði á jarðhæð eða byggja alfarið atvinnuhúsnæði á öllum hæðum með þeirri undantekningu að gistirekstur er óheimill í húsinu. Lóðin sem er austan Tryggvagötu, á milli Grófarhúss og Hafnarhvols er um 840 fermetrar að stærð. Á henni má byggja sex hæða hús, ásamt kjallara og heimilar deiliskipulag rúmlega 5.200 fermetra hús. Útboðsskilmálar voru samþykktir í borgarráði 22 . maí 2014.

Borgartorg og samstarf um viðbyggingu við Tryggvagötu 15

Húsið rís á áberandi og mikilvægum stað í miðborginni og í útboðsskilmálum er áréttað að sérstaklega skuli vanda til hönnunar og útlits byggingarinnar. Gert er ráð fyrir hugmyndasamkeppni í samstarfi við Arkitektafélag Íslands um útlit Tryggvagötu 13, auk borgartorgs framan við bygginguna og útfærslu á götunni sunnan við Tryggvagötu 13 og 15. Lóðarhafi og Reykjavíkurborg munu vinna saman að gerð keppnislýsingar. 

Borgarráð samþykkti ítarlega skilmála sem aðgengilegir eru á kynningarsíðu lóðasölunnar. 

Tilboðum í lóðina skal skila 25. júní 2014. Lóðinni verður ráðstafað til hæstbjóðanda sem uppfyllir skilmála útboðsins.