Miklar breytingar eru að verða á miðborg Reykjavíkur og í tengslum við HönnunarMars verður opnuð sýning í Ráðhúsi Reykjavíkur um þróun byggðar í miðborginni.
Markmiðið með sýningunni er að veita borgarbúum og öðrum áhugasömum innsýn í þá uppbyggingu sem á sér stað um þessar mundir og fyrirhuguð er, auk þess sem saga og þróun miðborgarinnar verður sögð í myndum, módelum, textum og viðtölum við borgarbúa og framkvæmdaaðila.
Sýningin ber yfirskriftina Hvað er í gangi? – Þróun byggðar í miðborg Reykjavíkur. Opnað verður formlega fimmtudaginn 23. mars og er gert ráð fyrir að hún verði uppi næstu tvö ár. Sýningin mun taka breytingum á þeim tíma og munu uppbyggingarverkefni og þeir reitir sem fara í þróun hverju sinni verða kynntir sérstaklega. Gestir geti þannig glöggvað sig á þeim framkvæmdum sem fyrirhugaðar eru eða eru í gangi á hverjum tíma. Í tengslum við sýninguna er gert ráð fyrir fyrirlestrum og uppákomum.
Sýningarhönnun er í höndum Studio Granda.
Enginn aðgangseyrir er á sýninguna. Ráðhúsið er opið alla daga kl. 8 – 20.
Tengt efni:
- Facebook viðburður - Hvað er í gangi? Þróun byggðar í miðborg Reykjavíkur - opnar 23. mars.
- Íbúafundur borgarstjóra um málefni miðborgarinnar - þriðjudag 21. mars