Skóla- og frístundaráð hefur samþykkt að leita eftir samstarfi við Embætti landlæknis og Landvernd um leiðir til að efla lýðheilsu barna, auka umhverfisvitund þeirra, minnka matarsóun og hagræða í rekstri mötuneyta skóla og frístundamiðstöðva með það að markmiði að hámarka næringargildi máltíða.
Í greinargerð með tillögunni sem samþykkt var á fundi ráðsins 3. desember kemur fram að mötuneyti skóla- og frístundasviðs framleiði um 8 milljónir matarskammta á hverju skólaári í 139 mötuneytum. Þau veiti um 18.000 börnum á aldrinum 1 -16 ára matarþjónustu. Mikilvægt sé að hafa yfirsýn yfir mötuneytin m.t.t. matargæða, fæðuöryggis, næringargildis máltíða, hagræðingar í vöruinnkaupum og til að afstýra matarsóun.
Með samstarfssamningi Reykjavíkurborgar og Embættis landlæknis frá 4. júní 2013, um markvisst samstarf til að efla heilsu og auka lýðheilsu, var samþykkt að skólar í borginni yrðu heilsueflandi. Stefnt að því að flestir þeirra, svo og frístundaheimilin nái því markmiði fyrir lok árs 2015.
Um 70% lífstílssjúkdóma má rekja til mataræðis og því mikilvægt að efla þekkingu og lýðheilsu með faglegu samstarfi sem bætir þekkingu og næringarvitund barna og unglinga. Með formlegu samstarfi við Embætti landlæknis hefur Reykjavíkurborg möguleika á að nýta sérþekkingu og auka fræðslu innan skólanna. Stýrihópur um lýðheilsu og heilsueflingu barna og unglinga í leik-, grunn- og frístundastarfi á vegum skóla- og frístundasviðs er ætlað að tryggja að samningur Reykjavíkurborgar og landlæknisembættisins gangi eftir.
Minni matarsóun meira hagræði
Samkvæmt rannsóknum á vegum Evrópusambandsins er matarsóun á öllum framleiðslustigum að jafnaði um 30%. Með því m.a. að breyta matseðlum má draga úr sóun og ná fram mikilli hagræðingu í mötuneytum skóla- og frístundasviðs. Með formlegu samstarfi við Landvernd skapast jafnframt tækifæri til að nýta sérþekkingu fagfólks á sviði umhverfismála og stuðla þannig að minni matarsóun og aukinni umhverfisvitund. Góð reynsla er einnig kominn á örútboð til mötuneyta skóla- og leikskóla í borginni, þ.e. á kjöti og fiski, til að ná fram hagræðingu í innkaupum, en með því að bjóða út sameiginlega hráefnismatseðla má draga úr flutningskostnaði, fækka sótsporum og vernda umhverfið.
Tölfræði;
• Leikskólabörn fá um 70% af daglegri næringarþörf í leikskólum
• Grunnskólabörn sem eru eingöngu í hádegismat fá um 33% af daglegri næringarþörf í skólanum.
• Grunnskólabörn sem eru í hádegismat og fá síðdegisnesti fá um 50% af daglegri næringarþörf í skólanum.
• Um 12.000 grunnskólabörn eru í mataráskrift, mötuneytin starfa í 176 daga á skólaárinu.
• Um 6.000 leikskólabörn eru í mataráskrift, mötuneytin starfa í 224 daga á skólaárinu.