Reykjavíkurborg kaupir Sævarhöfða af Faxaflóahöfnum

föstudagur, 12. janúar 2018

Í dag var gengið frá kaupum Reykjavíkurborgar á Sævarhöfða 33 af Faxaflóahöfnum. Dagur B. Eggertsson borgarstjóri og Gísli Gíslason hafnarstjóri skrifuðu undir kaupsamninginn. Kaupin eru gerð í tengslum við fyrirhugaða uppbyggingu á lóðinni og landfyllingu henni tengdri. Heildargreiðslur fyrir landið og húseignir eru nær 1,1 milljarður króna.  Lóðin Sævarhöfði 33 er alls um 76 þús. fermetrar en einnig er keypt 400 fermetra skrifstofubygging, rúmlega 800 fermetra verkstæði og 400 fermetra vörugeymsla, sem og 100 metra viðlegukantur.

  • Gísli Gíslason hafnarstjóri og Dagur B. Eggertsson borgarstjóri skrifa undir kaupsamninginn
    Gísli Gíslason hafnarstjóri og Dagur B. Eggertsson borgarstjóri skrifa undir kaupsamninginn
  • Gísli er praktískur og var með greiðsluupplýsingarnar tiltækar.
    Gísli er praktískur og var með greiðsluupplýsingarnar tiltækar.
  • Hópurinn sem komið hefur að samningagerðinni: Óli Jón , Jón, Hrólfur, Dagur og Gísli
    Hópurinn sem komið hefur að samningagerðinni: Óli Jón , Jón, Hrólfur, Dagur og Gísli
  • Mikil uppbygging verður á lóðinni og hefjast framkvæmdir síðar á árinu.
    Mikil uppbygging verður á lóðinni og hefjast framkvæmdir síðar á árinu.
  • Byggingarkrana ber við himinn enda er uppbygging nærliggjandi bryggjuhverfis í fullum gangi.
    Byggingarkrana ber við himinn enda er uppbygging nærliggjandi bryggjuhverfis í fullum gangi.

Kaupin eru gerð að undangengnum samningum við Björgun ehf. um brottflutning og hreinsun svæðisins ásamt gerð hluta þeirrar landfyllingar sem fyrirhuguð er. Um langt skeið hefur legið fyrir að notkun svæðisins muni breytast úr hafntengd starfsemi yfir í íbúðabyggð. Fyrir liggur rammaskipulag um svæðið og er deilskipulag í auglýsingaferli. Umhverfismat fyrir landfyllingu liggur fyrir ásamt framkvæmdaleyfi og eru framkvæmdir við fyllingargerðina hafnar af hálfu Björgunar samkvæmt verksamningi milli Faxaflóahafna og Björgunar þar um.

Björgun mun afhenda lóðina í áföngum og verður síðasti hlutinn afhentur 1. júní 2019. Byggingarhæfar lóðir verða þó til á hluta svæðisins nokkru fyrr, en lengri tíma mun taka að gera lóðir byggingarhæfar á nýrri landfyllingu. Gert er ráð fyrir að hefja gatnaframkvæmdir á þessu ári á hluta svæðisins.

Vilyrði fyrir tveimur lóðum á svæðinu hefur þegar verið veitt. Annars vegar til Bjargs, íbúðafélags ASÍ og BSRB og hins vegar til Búseta á þeim lóðum sem verða fyrstar byggingarhæfar. Eftir því sem að landfyllingu vindur fram og hægt verður að losa jarðefni af þegar gerðu landi verður fyrsti hluti svæðisins síðan einnig byggingarhæfur.