Borgarráð hefur samþykkt tveggja ára aðgerðaáætlun til að ná fram hagræðingu í rekstri borgarinnar. Samkvæmt áætluninni á miðlæg stjórnsýsla og stjórnsýsla á fagsviðum að taka á sig 5% hagræðingu á útgjöld samkvæmt frumvarpi að fjárhagsáætlun 2016 og þjónusta fagsviða á að hagræða um 1,5% að jafnaði í útgjöldum og annarri þjónustu. Alls nemur hagræðingin 1.780 milljónum í stjórnsýslu borgarinnar á næsta fjárhagsári.
| Skipting hagræðingar 2016 | Samtals hagræðing |
|---|---|
| Íþrótta- og tómstundasvið | 127.384 |
| Menningar- og ferðmálasvið | 72.861 |
| Skóla- og frístundasvið | 669.760 |
| Umhverfis og skipulagssvið | 172.459 |
| Velferðarsvið | 412.418 |
| Ráhús og miðlæg stjórnsýsla | 325.119 |
| 1.780.001 |
Í frumvarpi að fjárhagsáætlun er jafnframt gert ráð fyrir að brugðist verði við horfum á hallarekstri A-hluta með aðgerðaáætlun til ársins 2018 sem felur í sér að:
- Útgjöld dragist saman á föstu verðlagi til ársins 2018.
- Jafnvægi verði í rekstri A-hluta árin 2016-2018 og jafnvægi verði í grunnrekstri árið 2018, þ.e. reglulegar tekjur standi undir rekstrarútgjöldum.
- Veltufé frá rekstri verði a.m.k. 9% af tekjum árið 2018.
- Markmið verði sett um hlutfall hreinna vaxtaberandi skulda af tekjum.
Við mótun aðgerðaáætlunar á fagsviðum borgarinnar vegna A-hluta árin 2016-2018 verði byggt almennt á stefnumótun borgarstjórnar, gætt að kynjasjónarmiðlum og mannréttindastefnu og leikreglum um gerð fjárhagsáætlunar.
Leiðarljós í hagræðingu fagsviða er:
- Grunnþjónusta: Staðinn verður vörður um grunnþjónustu við íbúa en leitað hagkvæmari leiða til að veita hana.
- Gjaldskrár: Staðinn verður vörður um hagsmuni barnafjölskyldna. Gjaldskrám vegna þjónustu leikskóla, grunnskóla og frístund verður áfram stillt í hóf.
- Starfsmenn: Fjöldi stöðugilda verði takmarkaður og hægt á nýráðningum eftir því sem kostur er.
- Húsnæði: Stefnt verði að því að nýta betur húsnæði, og samnýta fyrir starfsemi og þjónustu borgarinnar, með uppsögn leigusamninga og fækkun fermetra í notkun borgarinnar.
- Innkaup: Stefnt verði að aukinni hagkvæmni í innkaupum, með aukinni samræmingu, rammasamningum og notkun örútboða þvert á svið og stofnanir borgarinnar í þeim vöru- og þjónustuflokkum þar sem tækifæri eru til að ná fram sparnaði.
Til að styðja við aðgerðaáætlun verður stofnaður stýrihópur samhliða því að hagræðingarhópar taka til starfa á fagsviðunum og í miðlægri þjónustu. Starfstími stýrihóps og hagræðingarhópa er frá 1. desember 2015 til 31. desember 2017. Í stýrihópi eiga sæti oddvitar allra flokka í borgarstjórn, borgarritari, fjármálastjóri Reykjavíkurborgar og skrifstofustjóri SEA.
Í hagræðingarhópum eigi sæti sviðsstjórar, fjármálastjórar fagsviða, skrifstofustjórar fagskrifstofa, fulltrúar fjármálaskrifstofu ráðhúss, auk annarra.