Á að sameina sveitarfélögin á höfuðborgarsvæðinu?

Umhverfis- og skipulagssvið Reykjavíkurborgar stendur fyrir  fundarröð með Hjálmari Sveinssyni, formanni umhverfis- og skipulagsráðs um þróun og mótun borgarinnar. Fundirnir eru haldnir klukkan 20.00 á Kjarvalsstöðum á Klambratúni, kaffihúsið er opið og allir velkomnir. Næsti fundur er 13. janúar 2015 og þar verður spurningin „Á að sameina sveitarfélögin á höfuðborgarsvæðinu?“ á dagskrá.

Yfirskrift fundaraðarinnar er Heimkynni okkar, borgin. en hugmyndin er að færa umræðu um skipulagsmál í vítt og breitt samhengi. Leitað verður eftir gagnrýnni og hressilegri umræðu þar sem ólík sjónarmið og reynsluheimar mætast á málefnalegum grunni.

Á fundinum 13. janúar verða Hjálmar Sveinsson, Svandís Svavarsdóttir alþingismaður, Bryndís Haraldsdóttir bæjarfulltrúi í Mosfellsbæ og formaður Strætó bs. og Hrafnkell Á. Proppé svæðisskipulagsstjóri höfuðborgarsvæðisins með framsögu.

Efnið sem glímt verður við tengist m.a. samkeppni sveitarfélaganna, almenningssamgöngum og stjórnsýslunni. Spurt verður hvað það þýddi fyrir ríki og landsbyggðina ef 65% landsmanna tilheyrðu einu sveitarfélagi og hvort sameining gæti verið kostur fyrir skipulags- og umhverfismálin eða ókostur. Einnig verða áhrifin á stjórnsýsluna og umhverfismálin rædd. 

Eftir framsögur ræðir Hjálmar Sveinsson við gesti kvöldsins út frá fleiri sjónarhornum og opnað verður fyrir spurningar úr sal. Fundurinn er á kaffihúsinu á Kjarvalsstöðum við Klambratún og tilraun verður gerð til að skapa uppbyggilega stemningu. Næstu fundir eftir þennan verða svo 10. febrúar og 10. mars og verða þeir kynntir síðar. Þeir standa yfir frá kl. 20.00 - 21.30.