Afsláttur af leikskólagjaldi

Teikning af eldri manni með ungabarni og ketti úti í garði.

Umsókn um afslátt af leikskólagjaldi fer fram í gegnum Völu þegar barn er byrjað í leikskóla. Hægt er að sækja um afslátt vegna ýmissa ástæðna. Athugið að til að geta sótt um þarf umsækjandi að vera með sama lögheimili og barnið. Afslátturinn á einnig við um sjálfstætt starfandi leikskóla og dagforeldra. Afsláttur er ekki veittur afturvirkt, sjá þó undanþágu í 6. gr.

Sækja um afslátt af leikskólagjaldi

Á ég rétt á afslætti af leikskólagjaldi?

Þú gætir átt rétt á afslætti fyrir barnið þitt ef

  • Báðir foreldrar (giftir eða í sambúð) eru í fullu námi.
  • Þú ert einstætt foreldri.
  • Þú ert öryrki eða á endurhæfingarlífeyri TR.
  • Þú vinnur í leikskóla á vegum Reykjavíkur í meira en 50% starfshlutfalli.
  • Þú átt tvö eða fleiri börn í leikskóla í borginni. Þennan afslátt þarf ekki að sækja um því hann reiknast sjálfkrafa.
  • Barnið þitt getur ekki mætt í leikskólann vegna langvarandi veikinda.

Þarf að endurnýja umsóknina?

Umsóknir um afslátt þarf að endurnýja reglulega, oftast í ágúst á hverju ári. Upplýsingapóstar varðandi afslætti eru sendir tvisvar á ári.

Þau sem hafa fengið samþykkta umsókn um afslátt af leikskólagjöldum greiða samkvæmt gjaldflokki II í gjaldskrá leikskólanna.

Systkinaafsláttur



Systkinaafsláttur reiknast sjálfkrafa fyrir börn sem eiga sama lögheimili. Þessi afsláttur gildir þvert á þjónustu leikskóla, grunnskóla og frístundaheimila. Systkinaafsláttur af dvalargjaldi er 100% fyrir hvert barn umfram eitt. Systkinaafsláttur af fæði er 100% hjá börnum umfram tvö.

Veikindaafsláttur

Ef barnið þitt er veikt í fjórar vikur samfellt eða lengur getur þú sótt um allt að 50% afslátt af leikskólagjöldum. Framvísa þarf læknisvottorði.

Athugaðu að þú þarft að sækja um afsláttinn innan þriggja mánaða frá því veikindum lýkur. Foreldrar bera ábyrgð á að upplýsa skóla- og frístundasvið þegar barnið byrjar aftur í leikskólanum. 

Teikning af foreldrum og tveimur börnum.

Afsláttur einstæðra foreldra

Fólk sem er skráð sem einstætt foreldri í Þjóðskrá á rétt á afslætti.

Við skilnað eða slit sambúðar er afsláttur veittur frá þeim degi sem umsókn berst. Upplýsingar um breytta hjúskaparstöðu þurfa að koma fram í Þjóðskrá.

Umsókn þarf að endurnýja árlega fyrir 15. ágúst.

Afsláttur vegna örorku

Veittur er afsláttur vegna örorku eða endurhæfingarlífeyris TR. Umsókn þarf annað hvort að fylgja afrit af örorkuskírteini TR sem staðfestir að lágmarki 75% örorku eða staðfesting frá TR á tímabili endurhæfingarlífeyris.

Afsláttur starfsfólks

Starfsfólk leikskóla borgarinnar í að minnsta kosti 50% starfi á rétt á afslætti af leikskólagjöldum barna sinna.

Þú getur sótt um afslátt fyrir barn í heilsdagsvistun ef þú ert í 70% starfi og fyrir barn í hálfsdagsvistun ef þú ert í 50% starfi.

Getum við aðstoðað?

Þarftu frekari aðstoð eða fannstu ekki það sem þú varst að leita að? Þjónustuver borgarinnar getur aðstoðað þig í síma 411 1111, á netspjalli og í gegnum netfangið innritun.leikskolar@reykjavik.is.