Vika6

""

Vika6 er sjötta vika ársins. Hún hefur fest sig í sessi sem árleg vika kynheilbrigðis í öllum grunnskólum og frístundamiðstöðvum. Leikskólar eru velkomnir að taka þátt í vikunni á þann hátt sem á við hverju sinni. í Viku6 ættu öll börn og unglingar í borginni að fá kynfræðslu sem tengist því þema sem unnið er með hverju sinni. 

Hvernig virkar Vika6

Engin formleg dagskrá er í Viku6 en markmiðið er að öll börn og unglingar í borginni fái fræðslu í vikunni á þann hátt sem hentar hverjum starfsstað best. 

Hluti af andliti barns sem málað er í regnbogalitum.

Þema 2022 - Kynlíf og menning

Unglingarnir í borginni sjá um að velja þema fyrir hvert ár. Hægt er að vinna með þemað á afar fjölbreyttan hátt, út frá aldri og þroska hvers barnahóps. Ekki er nauðsynlegt að helga þemanu alla vikuna  heldur snýst þetta um að vera með fræðslu sem tengist þemanu og annað efni um kynheilbrigði þegar tími gefst til innan vikunnar. 

Tvær ungar stúlkur að horfa á hvor aðra

Fræðslumyndbönd

Í tilefni Viku6 hefur Jafnréttisskólinn staðið fyrir gerð fræðslumola á myndbandaformi í samstarfi við UngRÚV og Mixtúru sem fjalla um kynlíf og kynvitund ungs fólks út frá ólíkum sjónarhornum. Myndböndin eru birt á heimasíðu UngRÚV og hér á síðu Jafnréttisskólans. 

""

Veggspjöld

Jafnréttisskóli Reykjavíkur lætur útbúa veggspjöld á hverju ári með litlum fræðslumolum sem tengjast þema vikunnar hverju sinni og sendir í alla grunnskóla og félagsmiðstöðvar borgarinnar. 

Yfirlit yfir veggspjöld

Gott að hafa í huga

Samkvæmt fræðslulögum eiga öll börn að fá kynfræðslu á öllum skólastigum. Með því að veita góða kynfræðslu erum við:

  • Að þjálfa börn og unglinga í að koma auga á og virða sín eigin mörk og mörk annarra. Að þau átti sig á að hver einstaklingur er einstakur og mörk fólks geta verið misjöfn.
  • Að auka þekkingu barna og unglinga varðandi kyn, kynvitund og kynhneigð, líkama, tilfinningar, réttindi, samskipti og kynheilbrigði.
  • Að efla sjálfsmynd barna og unglinga og þjálfa þau í gagnrýnni hugsun. Að efla þau í að taka ákvarðanir sem valda þeim og öðrum vellíðan en ekki skaða.
  • Að gera börn og unglinga meðvituð um kynheilsu sína og hvetja þau til að velja og hafna út frá sínum eigin forsendum en með virðingu fyrir öllum hlutaðeigandi að leiðarljósi.

Áður en þú byrjar kynfræðslu getur verið gott að hafa eftirfarandi í huga

  • Byrja á því að skapa öruggt andrúmsloft og umhverfi
  • Leggið áherslu á virðingu innan hópsins

Muna fjölbreytileikann svo sem kynvitund, kynhneigð, fötlun, menningu og fleira

  • Reyna að tala eins kynhlutlaust og opið og hægt er. Gott er að nota orð eins og sumir, flestir, margir og tala til dæmis um þau sem eru með typpi og þau sem fara á blæðingar
  • Ekki vera útilokandi og ekki áætla neitt fyrirfram til dæmis varðandi áhuga og reynslu nemenda.

Hafa aldursviðeigandi fræðsluefni

  • Undirbúa sérstaklega þá einstaklinga sem gætu átt erfitt með umræðuefnið, sumum þykir umræðan erfið og öll fræðsla hentar ekki á sama hátt fyrir alla

Hvernig er best að nálgast viðkvæma umræðu

Fara fyrst í gegnum ákveðna sjálfskoðun 

  • Mundu að þú ert í uppeldis- og fræðsluhlutverki, gættu þess að vera hlutlaus í fræðslunni þinni og hafa velferð nemenda að leiðarljósi.
  • Ef þú treystir þér ekki í ákveðna umræðu þá skaltu ekki taka hana, fáðu einhvern annan til þess eða undirbúðu þig mjög vel og taktu umræðuna þegar þú upplifir að þú getir gert það vel.

Velja orðin okkar vel 

  • Talaðu af virðingu við nemendur og taktu tillit til þess að innan hópsins eru ólíkir einstaklingar.
  • Setjum okkar eigin mörk og virðum mörk annarra í umræðu
    • Vertu óhrædd/ur/t við að setja mörk fyrir þig og passaðu að fara ekki yfir mörk nemenda til dæmis með því að tala alltof gróft eða fara að lýsa eigin kynlífsreynslu á yngri árum. EKKI tala um þína reynslu í kynfræðslu, sumum nemendum getur þótt það virkilega óþægilegt og breytt því hver þú ert í þeirra huga. Þú getur vitnað í eigin reynslu en settu hana þá í annan búning eins og til dæmis: Einn félagi minn lenti einmitt stundum í því að… eða: Ég þekki eina stelpu sem…
  • Verum einlæg
  • Munum að við erum ekki endastöð upplýsinga

 

Vika6 er á Instagram

Á Instagram er síða sem ætluð er elstu bekkjum grunnskólans og ber nafnið #vika6_island. Þar má finna ýmsan fróðleik um kynheilbrigði og hægt er að fylgjast með í 'story' hvað félagsmiðstöðvar og grunnskólar borgarinnar eru að gera í tilefni vikunnar.

Drengur með sítt hár og í pilsi heldur á skilti sem segir Make up is genderless