Aðventuhátíð - Ljósin tendruð á Oslóartrénu | Reykjavíkurborg

Aðventuhátíð - Ljósin tendruð á Oslóartrénu

Ljósin eru tendruð á Oslóartrénu á Austurvelli fyrsta sunnudag í aðventu. Í mörg ár hefur verið til siðs að halda upp á þessa vinargjöf með bæði hátíðlegum söng og skemmtilegum uppákomum. Fjölskyldur safnast saman á Austurvelli þennan sunnudag og taka við trénu frá sendiherra Noregs.

Fyrsta Oslóartréð kom 1951

Rúm hálf öld er síðan Norðmenn færðu Íslendingum í fyrsta sinn grenitré að gjöf til að skreyta Reykjavík. Í mörg ár hefur verið til siðs að halda upp á þessa vinargjöf með hátíðlegum söng og skemmtilegum uppákomum. Fjölskyldur safnast saman á Austurvelli þennan sunnudag og taka við trénu frá sendiherra Noregs.

Dagskráin

Ljósin á Oslóartrénu verða tendruð kl.16.00 fyrsta sunnudag í aðventu þann 2. desember nk. við hátíðlega athöfn á Austurvelli. 
Svala og Friðrik Ómar flytja falleg jólalög ásamt hljómsveit. Einnig munu jólasveinar stelast í bæinn og syngja og skemmta kátum krökkum. 
Lúðrasveit Reykjavíkur leikur jólatónlist frá kl.15.30. 

Kynnir er Katla Margrét Þorgeirsdóttir og verður dagskráin túlkuð á táknmáli. 

Tendrun jólatrésins markar upphaf jólaborgarinnar Reykjavíkur en tréð verður sótt í norska lundinn í Heiðmörk.  Þetta er í 67. skipti sem kveikt er á trénu og minnir sem fyrr á áratuga vinasamband Reykjavíkur og Oslóarborgar.

Jólaórói Styrktarfélags lamaðra og fatlaðra prýðir jólatréð ár hvert. Í honum sameinast íslenskur menningararfur,  hönnun og mikilsvert málefni.  Reykjavíkurborg hefur frá upphafi stutt verkefnið en óróar Styrktarfélagsins hafa verið eina skrautið á Oslóartrénu auk jólaljósanna.

Dagskrá hátíðarinnar verður túlkuð á táknmáli, Rauði Krossinn verður með sölu á heitu kakói til að verma kalda kroppa og bílastæðahúsið í Ráðhúsinu verður opið til að auðvelda gestum aðgengi að hátíðarsvæðinu.

Jólaskógurinn í Tjarnarsal ráðhússins opnar þann 5. desember með skemmtilegri dagskrá þar sem búast má við jólasveinum/jólavættum. Tjarnarsalurinn breytist í jólalegan skóg og börnin geta leikið sér á verkstæði jólasveinsins í skóginum.

Jólavættirnar verða svo á vappi víðs vegar um borgina það eru þau Grýla, Leppalúði, Jólakötturinn, Rauðhöfði, Leiðindaskjóða, Stekkjastaur, Hurðaskellir, Gluggagægir, Skyrgámur, Bjúgnakrækir,  Stúfur, tvíburarnir Surtla og Sighvatur og Kattarvali. Nú er bara að taka þátt í hinum skemmtilega fjölskylduleik sem byggist á því að hafa upp á vættunum og svara léttum og skemmtilegum spurningum um þessa fjölbreyttu jólasveinafjölskyldu. Hægt er að nálgast ratleikinn í Ráðhúsi Reykjavíkur, í Listasafni Reykjavíkur, Hafnarhúsinu og á Kjarvalsstöðum en á þessum stöðum er einnig hægt að sjá allar jólavættirnar á einum stað. Þá er hægt að nálgast leikinn á vefnum jolaborgin.is. Vegleg verðlaun eru í boði fyrir þann sem sigrar í leiknum en hægt er að skila svörum í Ráðhús Reykjavíkur fyrir 19. desember. 

Það verður margt skemmtilegt í boði á aðventunni í Reykjavík. Meginmarkmiðið er að skapa áhrifaríka og skemmtilega jólaupplifun í borginni á einfaldan hátt í góðu samstarfi við fjölda samstarfsaðila víðs vegar á höfuðborgarsvæðinu.

 Sjá skemmtilega dagskrá á aðventunni á Jolaborgin.is

 

Þarfnast þessi síða lagfæringar?

2 + 17 =