Á vörum þeirra verður tungan þjál | Reykjavíkurborg

Á vörum þeirra verður tungan þjál

föstudagur, 16. nóvember 2018

Íslenskuverðlaun unga fólksins í bókmenntaborginni Reykjavík voru afhent við hátíðlega athöfn í Norðurljósasal Hörpu í dag. Aldrei hafa fleiri fengið verðlaunin en 67 nemendur og einn nemendahópur fengu viðurkenningu.

  • Marta Guðjónsdóttir, formaður nefndarinnar og aðalhvatamaður verðlaunanna og Vigdís Finnbogadóttir fv. forseti Íslands.
    Marta Guðjónsdóttir, formaður nefndarinnar og aðalhvatamaður verðlaunanna og Vigdís Finnbogadóttir verndari verðlaunanna og fv. forseti Íslands.
  • Alexandra Briem, varaborgarfulltrúi og Pawel Bartozek, borgarfulltrúi.
    Alexandra Briem, varaborgarfulltrúi kynnti verðlaunahafa á svið og Pawel Bartozek, borgarfulltrúi, kynnti dagskrá.
  • Norðurljósasalur var troðfullur af ættingjum og vinum auk skólafólks.
    Norðurljósasalur var troðfullur af ættingjum og vinum auk skólafólks.
  • Einn nemendahópur fékk verðlaun í ár og það var fyrir verkefni tengt hafinu.
    Einn nemendahópur fékk verðlaun í ár og það var fyrir verkefni tengt hafinu.
  • Karan Gurung, verðlaun fyrir að vera einstakur nemandi og einn sterkasti nemandi síns bekkjar í íslensku.
    Karan Gurung fékk verðlaun fyrir að vera einstakur nemandi og einn sterkasti nemandi síns bekkjar í íslensku þrátt fyrir að koma ekki úr íslensku málumhverfi.
  • Hver nemandinn á fætur öðrum tók við verðlaunum fyrir notkun tungumálsins.
    Hver nemandinn á fætur öðrum tók við verðlaunum fyrir notkun tungumálsins.
  • Nemendur voru verðlaunaðir fyrir framúrskarandi færni og kunnáttu á öllum sviðum íslenskrar tungu, áhuga og metnað.
    Nemendur voru verðlaunaðir fyrir framúrskarandi færni og kunnáttu á öllum sviðum íslenskrar tungu, áhuga og metnað.
  • Gestir standa upp og taka lagið saman. Á íslensku má alltaf finna svar .........
    Gestir standa upp og taka lagið saman. Á íslensku má alltaf finna svar .........
  • Stoltir verðlaunahafar.
    Stoltir verðlaunahafar.

Verðlaunin, sem nú eru afhent í tólfta sinn á Degi íslenskrar tungu, fóru til lestrarhesta, tvítyngdra nemenda sem sýnt hafa framfarir í íslenskunámi, ung-ljóðskálda, sögusnillinga, bókaorma og góðra upplesara. 

Allir grunnskólar í borginni geta tilnefnt nemendur eða nemendahópa, einn á hverju skólastigi. Verndari verðlaunanna er frú Vigdís Finnbogadóttir og nemendur fá viðurkenningarskjal undirritað af verndara verðlaunanna og bókina Ljóðaúrval með ljóðum Jónasar Hallgrímssonar í samantekt Böðvars Guðmundssonar. Að auki fengu verðlaunahafar bókamerki að gjöf frá Reykjavík bókmenntaborg UNESCO.

Auk ávarpa og verðlaunaafhendingar flutti sönghópur frá Söngskóla Sigurðar Demetz  lagið Dimmalimm eftir Atla Heimi Sveinsson og eldri kór Laugarnesskóla söng Orðin mín eftir Braga Valdimar Skúlason. Að lokum sungu allir saman Á íslensku má alltaf finna svar, sem nánast er orðið  einkennislag íslenskrar tungu, en lagið samdi Atli Heimir og ljóðið á Þórarinn Eldjárn.

Verðlaunin eru á vegum skóla- og frístundráðs Reykjavíkurborgar í samstarfi við Reykjavík bókmenntaborg UNESCO og er þeim ætlað að auka áhuga grunnskólanema í Reykjavík á íslenskri tungu og hvetja þá til framfara í tjáningu í töluðu og rituðu máli.

Nefnd um verðlaunin er skipuð Mörtu Guðjónsdóttur, formanni nefndarinnar og fulltrúa í skóla- og frístundaráði, Kristínu Jóhannesdóttur fyrir hönd skólastjóra, Láru Guðrúnu Agnarsdóttur fyrir hönd kennara, Nönnu K. Christiansen fyrir hönd grunnskólaskrifstofu og Kristínu Viðarsdóttur fyri hönd Reykjavíkur Bókmenntaborgar UNESCO. Starfsmenn skóla- og frístundasviðs sem sáu um undirbúning og framkvæmd voru Anna Garðarsdóttir, Guðrún Hjartardóttir og Sigfríður Björnsdóttir.