Það ríkti karnivalstemmning í Vogaskóla í dag þegar 60 ára afmæli skólans var fagnað með glæsilegri dagskrá. Dagur B. Eggertsson borgarstjóri færði Jónínu Ólöfu Emilsdóttur skólastjóra blóm frá Reykjavíkurborg í tilefni dagsins.
Jónína setti hátíðina og rifjaði upp sögu skólans sem verið hefur hjartað í Vogahverfinu frá því skólastarf hófst þar fyrir 60 árum. Vogahverfið var eitt helsta nýbyggingarsvæði borgarinnar frá stríðslokum og fram á fyrri hluta sjöunda áratugarins, og Vogaskóli varð fljótlega einn stærsti skóli landsins Vogaskóli var framsækinn og skólastjórnendur þar hafa bryddað upp á mörgum nýjungum sem voru svo innleidd í menntastefnu og grunnskólalög. Þar var fyrst boðið upp á valgreinakerfi, opin hús og samfellda skólagöngu fyrir börn og unglinga.
Borgarstjóri minntist líka upphafsáranna þegar fjöldi nemendanna fór yfir 1600, en faðir hans stundaði nám við skólann á þeim tíma. Hann sagði skólann hafa haldið áfram að vera með framsæknustu skólum borgarinnar, og hefði til að mynda fengið minningarverðlaun Arthurs Morthens á síðasta ári fyrir fjölbreytta kennsluhætti fyrir öll börn með alls konar þarfir.
Skólahljómsveit Austurbæjar tók svo létta karnivalssyrpu fyrir afmælisgesti, og nemendur skólans lokuðu hátíðinni með flottum fjöllistaratriðum og söng.