Fjögur framsækin verkefni og einn framúrskarandi starfsmaður fengu í dag hvatningarverðlaun skóla- og frístundaráðs fyrir metnaðarfullt fagstarf á vettvangi frístundastarfsins í borginni.
Hvatningarverðlaunin voru afhent á fjölmennri fagstefnu starfsfólks frístundamiðstöðvanna fimm, Höfuð í bleyti, sem haldin var í Gerðubergi.
Hinsegin félagsmiðstöð Tjarnarinnar og Samtakanna 78 fékk hvatningarverðlaunin fyrir einstakt og mikilvægt starf með viðkvæmum hópi barna og unglinga. Félagsmiðstöðin hefur verið rekin undanfarin tvö ár og er fyrir unga hinsegin einstaklinga, þau sem hafa áhuga á hinsegin málefnum, eru í hinsegin pælingum eða vilja vera stuðningur eða hvatning fyrir ungmenni sem tengja við hinsegin málefni. Meðal þess sem verkefnið hefur leitt af sér er að fleiri hinsegin ungmenna á aldrinum 12 – 17 ára taka þátt í starfinu og mikilvægri þekkingu hefur verið miðlað á milli félagsmiðstöðva í borginni.
Frístundaheimilið Glaðheimar fékk hvatningarverðlaunin fyrir verkefnið Glaðheimapopp, skapandi tónlistarverkefni, þar sem börnin hafa fengið tækifæri til að semja lög og texta og syngja undir handleiðslu fagfólks. Þau hafa samið lög í spuna, hljóðritað þau og miðlað á tónlistarveitunni Spotify. Þar hafa lögin vakið mikla lukku og eru spiluð nánast daglega í Glaðheimum og víðar. Þetta metnaðarfulla tónsköpunarverkefni, þar sem farið er alla leið með börnunum, hefur ýtt undir sjálfstraust þeirra og hvatt þau til frekari sköpunar.
Félagsmiðstöðin Frosti fékk hvatningarverðlaunin fyrir verkefnið Amicos non ficta sem miðar að því að hjálpa strákum að tala opinskátt um tilfinningar sínar í öruggu umhverfi og ræða m.a. karlmennskuhugmyndir og samskipti kynja. Strákarnir, sem eru í 10. bekk, kalla sig Amicos non Ficta, eða vinir og einlægni. Þeir hafa lært að dýpka sig í tilfinningaumræðu, einlægni og sönnum vinskap. Einnig hafa þeir skapað saman tónlist, smíðað, prentað á föt og búið til skart.
Samuel Levesque, starfsmaður frístundamiðstöðvarinnar Kringlumýri fékk sérstaka viðurkenningu fyrir mikilvægt frumkvöðlastarf í skapandi útikennslu. Hann hefur á undanförnum árum farið á milli frístundaheimila í Laugardal, Háaleiti og Bústöðum á sérútbúnu hjóli með útieldunargræjum og verkfærum og virkjað börnin með sér í skapandi útivist. Þannig hefur hann búið til vettvang fyrir börnin til að tálga, fara í bogfimi og aðra spennandi útileiki.
Frístundaheimilið Laugarsel og Laugarnesskóli fengu hvatningarverðlaunin fyrir réttindastarf með börnum, en þessar stofnanir eru í samstarfi um að innleiða réttindaskólaverkefni UNICEF. Þetta í fyrsta skipti á heimsvísu sem það verkefni er innleitt samhliða í skóla- og frístundastarfi en Laugarsel og Laugarnesskóli eru m.a. með sameiginlegt réttindaráð barna. Barnasáttmáli Sameinuðu þjóðanna er grundvöllur fagstarfsins og læra börnin um réttindi sín í máli og myndum.
Skúli Helgason, formaður skóla- og frístundaráðs, afhenti hvatningarverðlaunin í dag en markmið þeirra er að vekja athygli á því gróskumikla skóla- og frístundastarfi sem fram fer í Reykjavík. Verðlaunin eru í formi viðurkenningar og verðlaunagrips, listaverks eftir Ingu Elínu leirlistakonu.
Að lokinni verðlaunaafhendingu í Gerðubergi hélt Hrund Gunnsteinsdóttir frumkvöðull skemmtilegt erindi sem hún kallaði Hafa rækjur tilfinningar? og fjallaði m.a. um hvaða hæfni helst ber að rækta í börnum og unglingum í ljósi fjórðu iðnbyltingarinnar.
Að loknu erindi var boðið upp á fjölmargar málstofur þar sem starfsfólk í frístundastarfinu miðlaði af reynslu sinni af hinum fjölmörgu verkefnum sem eru í gangi um alla borg með börnum og unglingum.