Frítt verður í sund í tólf sundlaugum á höfuðborgarsvæðinu á Sundlauganótt Vetrarhátíðar frá kl. 17 - 22 í kvöld. Í sundlaugunum verðar alls konar viðburðir í boði eins og tónleikar, zumba og miðbæjarflot.
Sundlauganótt verður haldin í kvöld, laugardagskvöldið 9. febrúar 2019, en þá verður frítt í sund frá klukkan 17 til 22 í tólf sundlaugum höfuðborgarsvæðisins. Þær laugar sem taka þátt í Sundlauganótt eru: Laugardalslaug, Vesturbæjarlaug, Sundhöll Reykjavíkur, Breiðholtslaug, Klébergslaug, Grafarvogslaug, Árbæjarlaug, Salalaug, Lágafellslaug, Seltjarnarneslaug, Ásgarðslaug, Ásvallalaug.
Boðið verður upp á fjölbreytta viðburði í laugunum og munu gestir fá að upplifa einstaka og óvenjulega kvöldstund í mögnuðu myrkri. Tónlist, dans og leikhús verða allsráðandi, þar sem gestir eru hvattir til að taka þátt með því að dansa, syngja eða slaka á og njóta stundarinnar.
Í Sundhöll Reykjavíkur verður boðið upp á miðbæjarflot í umsjón Ellýjar Ármannsdóttur flotþerapista sem ætlar að stýra kyrrlátu og heilandi samfloti í innilauginni. Flothettur verða á staðnum. Kósýheit og kyndlar á útisvæði.
Í Laugardalslaug verður kayak Í barnalauginni sem krakkar fá að prófa með aðstoð félaga úr Kayakklúbbnum. Þar verður einnig sundkeppni í flugsundi, tónlist, skemmtun og ljósasýning. Ennfremur verður boðið upp á jóga í vatni undir ljúfum tónum DJ Kjerúlf.
Í Grafarvogslaug verður Circus Íslands með glæsilega sýningu fyrir alla fjölskylduna. Jóhann Helgason mun spila fjöruga harmónikkutónlist, Korpusystkin, kór Korpúlfa, syngja nokkur lög og loks tekur Bræðrabandið nokkur lög á harmónikku og sög. Noðurljósaflot undir stjórn Gyðu Dísar flotþerapista verður svo í innilauginni undir norðurljósasýningu. Flothettur á staðnum.
Zumba, plötusnúðar, töframenn, Júlladiskó og vatnapóló - það verður eitthvað fyrir alla í sundlaugunum á Sundlauganótt Vetrarhátíðar. Umfram allt verður samt boðið upp á notalega stemningu í sundlaugunum. Góða skemmtun!
Nánari dagskrá