Sundlaug og menningarmiðstöð í Úlfarsárdal | Reykjavíkurborg

Sundlaug og menningarmiðstöð í Úlfarsárdal

mánudagur, 22. janúar 2018

Borgarráð ákvað á síðasta fundi að heimila umhverfis- og skipulagssviði Reykjavíkurborgar að bjóða út áframhaldandi framkvæmdir á skóla og íþróttamannvirkjum í Úlfarsárdal.

  • Framkvæmdir við Dalskóla í Úlfarsárdal eru á fullu og er reiknað með að taka fyrsta hluta hans í notkun næsta haust.
    Framkvæmdir við Dalskóla í Úlfarsárdal eru á fullu og er reiknað með að taka fyrsta hluta hans í notkun næsta haust.
  • Skóflustunga að fyrsta áfanga var tekin haustið 2015.
    Dagur B. Eggertsson borgarstjóri tók fyrstu skóflustunguna að skóla og íþróttamannvirkjum í Úlfarsárdal ásamt fjölmennum hópi barna úr hverfinu. Fyrsti áfanginn var leikskólabygging.
  • Haustið 2016 var leikskólabyggingin klár aðeins ári eftir að framkvæmdir hófust.
    Leikskólabyggingin var tekin í notkun haustið 2016 og hefur verið notuð til kennslu fyrir eldri börn grunnskólans.
  • Sundlaugin. Myndin er tölvuteiknuð og sýnir ekki endanlegt útlit. Mynd: VA arkitektar.
    Sundlaugin í Úlfarsárdal. Myndin er tölvuteiknuð og sýnir ekki endanlegt útlit. Mynd: VA arkitektar.
  • Menningarmiðstöð og bókasafn.
    Menningarmiðstöð og sundlaug verða samtengdar skólanum í Úlfarsárdal.

Framkvæmdir hafa staðið yfir við skólamannavirki í Úlfarsárdal frá árinu 2015 og var fyrsti áfanginn, 820 fermetra leikskólabygging, tekinn í notkun haustið 2016. Þessi misserin er verið að byggja grunnskólann sem er 6852 fermetrar að stærð. Skólinn verður tekinn í notkun í áföngum og er stefnt að því að fyrsti hluti hans verði tekinn í notkun í haust.

Borgarráð heimilaði nú að áframhaldandi framkvæmdir við mannvirkin í Úlfarsárdal yrðu boðin út. Hafist verður handa við að byggja menningarmiðstöð ásamt inni- og útisundlaug en einnig sameiginleg rými sem tengja grunnskólann, menningarmiðstöðina og sundlaugina. Áætlað er þessi áfangi kosti 3.300 milljónir króna sem er með stærri útboðum hjá Reykjavíkurborg. 

Lagt er upp með að hefja framkvæmdir við í apríl á þessu ári.

Samningur við íþróttafélagið Fram var samþykktur í borgarráði í júlí síðastliðnum. Skipuð var sérstök byggingarnefnd með fulltrúum félagsins. Áætlað er að hönnun íþróttamannvirkja í Úlfarsárdal verði lokið á þessu ári og framkvæmdir hefjist þá strax.

Áætlaður heildarkostnaður uppbyggingar í Úlfarsárdal er tæpir tólf milljarðar króna.