Dagur B. Eggertsson og Áslaug Einarsdóttir, framkvæmdastjóri Stelpur rokka! undirrituðu nýjan samstarfssamning Reykjavíkurborgar við félagasamtökin í morgun. Stelpur rokka! eru sjálfboðaliðasamtök sem starfa eftir femínískri hugsjón til að efla ungar stelpur og trans krakka í gegnum tónlistarsköpun.
Kjarninn í starfinu eru rokksumarbúðir, þar sem þátttakendur læra á hljóðfæri, spila saman í hljómsveit, kynnast farsælum tónlistarkonum, fræðast um ýmsar hliðar tónlistar og jafnréttisbaráttu. Haldnir eru lokatónleikar þar sem krakkarnir koma fram og spila fyrir vini og fjölskyldu.
Síðastliðin 5 ár hafa yfir 400 stelpur, konur, trans og kynsegin einstaklingar tekið þátt í rokkbúðum Stelpur rokka! og myndað yfir 80 hljómsveitir. Þátttakendur hafa öðlast aukið sjálfstraust, frumkvæði og þor með því að starfa saman og virkja eigin sköpunarhæfileika. Stelpur rokka! vilja með starfi sínu byggja upp mikilvæga fagþekkingu og stuðla að jafnréttismiðuðu tómstundastarfi á Íslandi.
Samningur Reykjavíkurborgar og Stelpur rokka! er til þriggja ára og nemur styrkurinn 4 milljónum króna á ári. Samningurinn tók gildi 1. janúar 2018 og gildir til 31. desember 2020.
Sjá nánar um samtökin á heimasíðu: www.stelpurrokka.org