Snjallvæddar jólavættir Reykjavíkurborgar

Menning og listir Mannlíf

""

Jólavættaleikur Reykjavíkurborgar er hafinn og venju samkvæmt er 13 jólavættir að finna víðs vegar um borgina.

Ratleikurinn hefur nú verið snjallvæddur og auðvelt er að nálgast hann á síðunni Safnaðu.is þar sem jafnframt má finna á einum stað allt það sem söfn borgarinnar hafa að bjóða á aðventunni.

Jólavættaleiknum er ætlað að hvetja borgarbúa og aðra gesti til að njóta miðborgarinnar á aðventunni. Jafnframt því er verið að upphefja íslenska sagnahefð og tengja íbúa borgarinnar við gesti hennar í gegnum samtöl og sögur. Gunnar Karlsson myndlistarmaður teiknaði vættirnar sem hafa lífgað upp á miðborgina á aðventunni frá árinu 2011.

Leppalúði, Leiðindaskjóða, Stekkjastaur, Jólakötturinn og fleiri furðuverur verða búnar að koma sér fyrir á húsveggjum víða í miðbænum í desember og úr verður skemmtilegur ratleikur fyrir alla fjölskylduna.  Þátttakan felst í því að leita uppi vættirnar og svara laufléttum spurningum.

Dregið verður úr svarseðlum 19. desember og vegleg verðlaun í boði fyrir þrjá heppna þátttakendur sem eru með öll svör rétt. 

Farðu inn á Safnaðu.is og taktu þátt í skemmtilegum jólaratleik.

Góða skemmtun!