Elsta sveit Skólahljómsveitar Árbæjar og Breiðholts fór með stjórnanda sínum, Snorra Heimissyni, til Gautaborgar á dögunum. Þar gerði hljómsveitin sér lítið fyrir og lenti í öðru sæti í hljómsveitakeppni.
Alls tóku tuttugu og fimm hljómsveitir þátt í hátíðinni í Gautaborg. Þær kepptu ekki einungis innbyrðis heldur settu þær svip á borgina með því að marsera um götur og leika fyrir gesti og gangandi á meðan á dvöl þeirra stóð.
Á lokahátíð keppninnar var Skólahljómsveit Árbæjar og Breiðholts svo beðin að flytja útsetningu stjórnanda síns af „Shape of you“ eftir Ed Sheeran og vakti flutningurinn mikinn fögnuð áheyrenda. Það voru kátir og stoltir nemendur sem snéru aftur heim til Íslands að keppni lokinni.
Til hamingju Skólahljómsveit Árbæjar og Breiðholts!