Skapandi börn verðlaunuð | Reykjavíkurborg

Skapandi börn verðlaunuð

mánudagur, 23. apríl 2018

Verðlaunahátíðin SÖGUR fór fram í fyrsta sinn sunnudagskvöldið 22. apríl. Hátíðin var haldin í Eldborgarsal Hörpu og var öll hin glæsilegasta.

  • Felix Bergsson og Sigyn Blöndal voru kynnar og hér stíga þau dans og syngja með hópi barna á hátíðinni
    Felix Bergsson og Sigyn Blöndal voru kynnar og hér stíga þau dans og syngja með hópi barna á hátíðinni
  • Fullur salur í Eldborg
    Fullur salur í Eldborg
  • Dansað og sungið
    Dansað og sungið
  • Litagleði og söngur
    Litagleði og söngur
  • Verðlaunaafhending fyrir besta leikritið, Bláa Hnöttinn og bestu leikarana í leikritinu.
    Verðlaunaafhending fyrir besta leikritið, Bláa Hnöttinn og bestu leikarana í leikritinu.
  • Úlfur Emilio Tinnuson flutti eitt lag
    Úlfur Emilio Tinnuson flutti eitt lag
  • Forseti Íslands, Guðni Th. Jóhannesson var viðstaddur hátíðina
    Forseti Íslands, Guðni Th. Jóhannesson var viðstaddur hátíðina
  • Friðrik Dór mætti á svæðið
    Friðrik Dór mætti á svæðið

Um 2.000 börn á aldrinum 6-12 ára kusu það besta á sviði tónlistar, bókmennta, sjónvarps og leikhúss, auk þess sem skapandi börn voru verðlaunuð.

Amma best eftir Gunnar Helgason hlaut Bókaverðlaun barnanna sem besta frumsamda bókin og Dagbók Kidda klaufa – furðulegt ferðalag eftir Jeff Kinney í þýðingu Helga Jónssonar var kosin besta þýdda bókin. Sögusteininn, heiðursverðlaun IBBY á Íslandi, hlaut Guðrún Helgadóttir fyrir æviframlag sitt í þágu barnamenningar á Íslandi.

Í flokki tónlistar var B.O.B.A. með JóaPé og Króla valið lag ársins en Daði Freyr og Gagnamagnið sigruðu í flokknum Tónlistarflytjandi árins og áttu einnig lag ársins, Hvað með það? Blái hnötturinn var valinn besta leiksýningin og börnin í Bláa hnettinum voru kosin bestu leikarar og leikkonur ársins. Skólahreysti var kosin barnasjónvarpsþáttur ársins, Fjörskyldan hlaut verðlaun sem fjölskydusjónvarpsþáttur ársins og loks var sjónvarpþáttaröðin Loforð valið besta leikna efnið í sjónvarpi eða kvikmyndum.

Þá voru sigurvegarar í sögusamkeppni KrakkaRÚV einnig verðlaunaðir. Árni Hrafn Hallsson og Eyvör Stella Þeba Guðmundsdóttir hlutu verðlaun fyrir smásögur ársins, Sunna Stella Stefánsdóttir og Iðunn Ólöf Berndsen fyrir leikrit ársins og Silvía Lind Tórshamar fyrir útvarpsleikrit ársins. Svandís Huld Bjarnadóttir, Ísak Helgi Jensson, Sara Einarsdóttir og Sóldís Perla Marteinsdóttir hlutu verðlaun fyrir stuttmyndir sínar. Leikritin sem báru sigur úr býtum verða sett upp í Borgarleikhúsinu og Útvarpsleikhúsinu á næsta leikári. Úrval af smásögum barnanna kemur út á rafbók hjá Menntamálastofnun í dag, og er aðgengileg á mms.is/sogur, lesendum að kostnaðarlausu.

Að hátíðinni stóðu SÖGUR – samtök um barnamenningu, í samstarfi við KrakkaRÚV, SÍUNG, IBBY á Íslandi, Barnamenningarhátíð Reykjavíkurborgar, Reykjavík bókmenntaborg UNESCO, Borgarbókasafnið, Borgarleikhúsið, Menntamálastofnun, Skóla- og frístundasvið Reykjavíkur, Hörpu og Miðstöð skólaþróunar við HA. Hátíðin var send út í beinni útsendingu á RÚV og hægt er að horfa á hana í Sarpinum á www.ruv.is. SÖGUR er hluti af afmælisdagskrá 100 ára fullveldisafmæli Íslands.