Samvinna um að ná árangri í loftslagsmálum

Atvinnumál Samgöngur

""

Reykjavíkurborg og Festa, miðstöð um samfélagsábyrgð fyrirtækja, hafa boðið 300 stærstu fyrirtækjum landsins til samstarfs um að ná mælanlegum árangri í loftslagsmálum með því að draga úr losun gróðurhúsalofttegunda og myndun úrgangs.

Borgarstjóri býður á mánudag til kynningarfundar með fulltrúum fyrirtækja sem lýst hafa áhuga. Fundurinn verður haldinn í Höfða og hefst kl. 8.30.  Nú þegar hafa mörg fyrirtæki skráð sig til þátttöku í verkefninu og önnur lýst yfir áhuga á að taka þátt. 

Mælanleg markmið og fræðsla

Verkefnið er hugsað sem hvatning til rekstraraðila um að draga úr losun gróðurhúsalofttegunda á eigin forsendum og sýna þar með frumkvæði og ábyrgð gagnvart umhverfinu og samfélaginu. Fyrirtækjum sem taka þátt býðst einnig fræðsla um loftslagsmál, bæði hvernig nálgast á viðfangsefnið með praktískum hætti og reynslusögur annarra fyrirtækja af því að draga úr losun gróðurhúsalofttegunda í rekstri.

Fulltrúar fyrirtækjanna sem taka þátt skrifa undir sameiginlega yfirlýsingu um loftslagsmál í Höfða um miðjan nóvember. Með aðild að yfirlýsingunni skuldbinda fyrirtækin sig til að setja sér markmið og fylgja þeim eftir með aðgerðum sem miða að því að draga úr losun gróðurhúsalofttegunda og minnka myndun úrgangs. Þau munu einnig mæla árangurinn og gefa reglulega út upplýsingar um stöðu mála.

Stefna Reykjavíkur í loftslagsmálum er að draga úr losun gróðurhúsalofttegunda um 35% fyrir árið 2020.  Stefnan var fyrst sett fram árið 2009 og er nú hluti af Aðalskipulagi Reykjavíkur. Einnig er unnið að stefnumörkun borgarinnar í að draga úr losun gróðurhúsalofttegunda vegna eigins reksturs borgarinnar.

Fyrst um sinn verður aðildarfyrirtækjum Festu, stofnunum og fyrirtækjum Reykjavíkurborgar og 300 stærstu fyrirtækjum á Íslandi boðin þátttaka í verkefninu.

Loftslagsmál hafa bein áhrif á afkomu fyrirtækjanna

Ketill B. Magnússon framkvæmdastjóri Festu segir að stjórnendur margra íslenskra fyrirtækja hafi áttað sig á að loftslagsmál tengjast afkomu fyrirtækja með beinum hætti. Losun gróðurhúsalofttegunda stafi að miklu leyti af eldsneytisnotkun og urðun sorps. Minni eldsneytisnotkun kosti minna og minnki mengun. Urðun sorps sé einnig kostnaðarsöm fyrir fyrirtæki. „Fyrirtæki eru mörg hver farin að sjá beinan hag í að nýta hráefni betur, endurnýta og endurvinna úrgang,“ segir Ketill. „Markviss vinna í loftslagsmálum er því eitt skýrasta dæmið um gagnkvæman ávinning. Þar fer saman samfélagsábyrgð fyrirtækja og fjárhagslegur ávinningur fyrir þau.“

Frumkvæði borga og fyrirtækja er mikilvægt

Ketill segir mikilvægt að borgir og fyrirtæki taki frumkvæði. Þjóðir heims hafi sett sér markmið um að draga verulega úr losun gróðurhúsalofttegunda og hefur Ísland ásamt ríkjum Evrópusambandsins og fleirum lýst því yfir að dregið verði úr losun um 40%. „Á Íslandi glímum við ekki við mengandi rafmagnsframleiðslu eða húshitun líkt og margar þjóðir en ein helsta áskorun okkar eru mengandi samgöngur og losun úrgangs,“ segir hann.

Á loftslagsráðstefnu Sameinuðu þjóðanna sem fram fer í París í desember verður rammasamningur þeirra vegna loftslagsbreytinga (UNFCCC) samþykktur en markmið hans er að sporna við hnattrænni hlýnun og draga úr losun gróðurhúsalofttegunda.

Yfirlýsingin sem fyrirtæki og Reykjavíkurborg munu skrifa undir verður afhent í tengslum við ráðstefnuna í París. Fyrirtæki um allan heim hafa í vaxandi mæli tekið skýra afstöðu í umhverfismálum og er nærtækt að nefna áskorun fyrirtækja frá 130 löndum þar sem kallað er eftir metnaðarfullum markmiðum á fyrirhugaðri loftslagsráðstefnu.  Ketill segir að Reykjavíkuryfirlýsingin sé enn eitt lóð á vogaskálarnar í að ná samstöðu í þessu mikilvæga máli.

Nánari upplýsingar