Gæða á hverfiskjarnana í Arnarbakka og við Völvufell nýju lífi og flýta fyrir uppbyggingu þeirra. Reykjavíkurborg festi á síðasta ári kaup á fasteignum með þetta að markmiði og nú er unnið að breytingum á deiliskipulagi.
Meðan verkefnið er í skipulagsferli vill borgin nýta húsnæðið sem hún á til uppbyggjandi samfélagslegra verkefna og var í vetur auglýst eftir samstarfsaðilum og leigjendum. Gengið hefur verið frá leigusamningum og voru þeir kynntir í borgarráði nýlega.
Karlar í skúrum og Hjólakraftur í Arnarbakka
Fimm nýir aðilar flytja í húsnæðið í Arnarbakka 2, 4 og 6 eftir því sem það losnar:
- Karlar í skúrum - Rauði kross Íslands
- SmiRey - smíðastofa fyrir einhverfa karla - Velferðarsvið Reykjavíkurborgar
- Verkstæði og kennslurými - Áhugahópur kennara og handverksmanna
- Hjólafærni - Hjólakraftur á Íslandi
- Kistan, upptökuver - Óli Gneisti Sóleyjarson
Starfsemi sem er nú þegar í húsnæðinu og verður áfram er Hársnyrtistofan Arnarbakka, Sveinsbakarí og Matvöruverslunin Iceland.
Stelpur Rokka! og sjálfbær ræktun í Völvufelli.
Nýlistasafnið, sem er nú með safnageymslur og vinnurými og Listaháskóli Íslands, sem er með sýningarsal í Völvufelli 13-21 fá nýja nágranna sem eru:
- Stelpur Rokka! - tónlistarmiðstöð
- Seljagarður 109, sjálfbær ræktun – matjurtaræktun í borgarumhverfi
Umbætur í umhverfinu
Í borgarráði var samþykkt að leigjendur sem engar tekjur hafa í sinni starfsemi fái húsnæði til leigu án endurgjalds en þeir sem hafa einhverjar tekjur greiði kr.1.000 fyrir hvern fermetra. Leigusamningum verður hægt að segja upp með 1-3 mánaða fyrirvara.
Bæta á gæði umhverfisins á báðum svæðum og verða húsin lagfærð í sumar til bráðabirgða. Ekki er gert ráð fyrir miklum framkvæmdum við húsnæðið, en nokkrir leigutakar gera ráð fyrir að standsetja sjálfir sitt leigurými.