Dagur B. Eggertsson, borgarstjóri og Gunnar Björnsson, forseti Skáksambands Íslands skrifuðu í dag undir samstarfssamning.
Í samningnum er kveðið á um að Reykjavíkurborg muni styðja við kostnað af mótshaldi við Reykjavíkurskákmót með því að veita árlegan styrk að fjárhæð kr.3.900.000.- á tímabilinu 2018 til 2020. Samtals nemur fjárhæðin kr. 11.700.000.- á samningstímanum.
Fyrsta Reykjavíkurskákmótið var haldið þann 14. janúar til 1. febrúar árið 1964 í Lídó og tóku 16 keppendur þátt í mótinu. Reykjavíkurborg hefur allar götur síðan styrkt Reykjavíkurskákmótið sem í dag er orðið eitt stærsta og virtasta alþjóðlega mót hvers árs í skákheiminum. Á þessu ári tóku 248 keppendur frá 34 löndum þátt í mótinu.