Opnað verður fyrir úthlutun á nýjum leyfum fyrir götu- og torgsölu fimmtudaginn 15. febrúar kl. 9:00 á vef Reykjavíkurborgar og þarf að vera með virkt aðgengi að Mínum síðum í Rafrænu Reykjavík til að geta sótt um.
Götusala er leyfisskyld og tekur til hvers kyns sölustarfsemi sem fer fram á almannafæri utanhúss svo sem á torgum, gangstéttum og í almenningsgörðum. Undir götu og torgsölu fellur ekki námskeiðshald, kennsla, kynningar, sýningar, minniháttar góðgerðasala og viðburðir, hvort sem er í vögnum, bílum, gámum eða undir beru lofti.
Gerðar eru kröfur um góða umgengni og að starfsemi standist allar heilbrigðisreglur. Götu- og torgsala á að auka fjölbreytni og þjónustu í sátt við umhverfið og sóst er eftir fjölbreyttri þjónustu.
Jafnræði við úthlutun
Umsóknir eru afgreiddar í þeirri röð sem þær berast og ræður það forgangi við úthlutun. Reglan „fyrstur kemur fyrstur fær“ er þannig í gildi og skapar ákveðið jafnræði með umsækjendum. Eins og áður segir verður opnað fyrir umsóknir um götu- og torgsölu fimmtudaginn 15. febrúar kl. 9:00 á „mínum síðum” á vef Reykjavíkurborgar (Rafræn Reykjavík). Umsækjendur eru hvattir til að kynna sér nýja samþykkt og hafa til reiðu þau fylgiskjöl sem fylgja þurfa umsókn. Minnt er á að öll matsala er leyfisskyld og sótt er um leyfi hjá Heilbrigðiseftirliti Reykjavíkur. Fylgiskjöl með umsókn eru meðal annars mynd af söluaðstöðu, sem og skýrsla skoðunarstofu fyrir rafmagn og gas.