Ný göngubryggja rís við Norræna húsið | Reykjavíkurborg

Ný göngubryggja rís við Norræna húsið

föstudagur, 11. maí 2018

Dagur B. Eggertsson borgarstjóri heimsótti Norræna húsið í morgun og kynnti sér framkvæmdir við nýja göngubryggju við Hústjörn.

  • Við Norræna húsið.
    Mikkel Harder forstjóri Norræna hússins, Dagur B. Eggertsson borgarstjóri og Guðmundur Jónasson frá Mannviti sem sér um framkvæmdirnar við Norræna húsið.
  • Ný göngubryggja rís við Norræna húsið.
    Nýja göngubryggjan er vel á veg komin en reiknað er með að framkvæmdum ljúki í byrjun júlí.
  • Borgastjóri skoðaði teikningar af mannvirkinu sem er að rísa.
    Borgarstjóri skoðaði teikningar af nýju göngubryggjunni en hún mun gefa fólki kost á því að nálgast vatnsborðið og þar með fuglalífið í Vatnsmýrinni á auðveldan hátt.
  • Norræna húsið er einstaklega fallegt.
    Norræna húsið er einstaklega fallegt enda hannað af hinum heimsfræga finnska arkitekt Alvar Aalto.
  • Teikning af nýju göngubrúnni við Hústjörn
    Teikning af nýju göngubrúnni við Hústjörn

Verkið er nokkuð vel á veg komið og er unnið samkvæmt niðurstöðum samkeppni sem haldin var um heildarskipulag fyrir svæðið á milli Sturlugötu, Sæmundargötu, Hringbrautar og Njarðargötu. Lögð var áhersla á að tengja svæðið betur við aðra borgarhluta auk þess að opna gátt á milli Tjarnar og Vatnsmýrar. Norræna húsið, Háskóli Íslands og Reykjavíkurborg efndu til samkeppninnar.

Nýja göngubryggjan við Hústjörn mun hafa tengingar við göngustíga borgarinnar og Norræna húsið. Hún mun bæta umferð gangandi vegfarenda, undirrstrikar sérstöðu friðlandsins í Vatnsmýri og býður upp á upplifun og aðgengi fyrir alla. Göngubryggjan skapar tækifæri til að fylgjast betur með villtu fuglalífi og til að njóta náttúrunnar í friðlandinu.

Kostnaður við framkvæmdina er 50 milljónir en Mannvit sér um framkvæmdirnar. Eru framkvæmdalok áætluð í byrjun júlí.

Norræna húsið kostar framkvæmdir við stíga og yfirborðsfrágang innan lóðar.